ತವರಿಗೆ ಮರಳಿದ ಭಾರತೀಯ ಮಹಿಳೆ: ಸುಷ್ಮಾ ಸ್ವರಾಜ್'ಗೆ ಧನ್ಯವಾದ ಹೇಳಿದ ಉಜ್ಮಾ ಸಹೋದರ

ನವದೆಹಲಿ: ಪಾಕಿಸ್ತಾನದಲ್ಲಿ ಚಿತ್ರಹಿಂಸೆ ಅನುಭವಿಸುತ್ತಿದ್ದ ತಮ್ಮ ಸಹೋದರಿಯನ್ನು ಭಾರತಕ್ಕೆ ಕರೆ ತಂದಿದ್ದಕ್ಕೆ ಭಾರತೀಯ ಮಹಿಳೆ ಉಜ್ಮಾ ಸಹೋದರ ವಾಸೀಂ ಅಹ್ಮದ್ ಅವರು ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರಿಗೆ ಗುರುವಾರ ಧನ್ಯವಾದಗಳನ್ನು ಹೇಳಿದ್ದಾರೆ. 

ಈ ಕುರಿತಂತೆ ಮಾತನಾಡಿರುವ ಅವರು, ನನಗೆ ಬಹಳ ಸಂತಸವಾಗುತ್ತಿದೆ. ಇಂದು ಬೆಳಿಗ್ಗೆ ಸುಷ್ಮಾ ಸ್ವರಾಜ್ ಅವರು ನನಗೆ ಕರೆ ಮಾಡಿದ್ದರು. ಉಜ್ಮಾ ವಾಘಾ ಗಡಿ ದಾಟಿರುವುದಾಗಿ ತಿಳಿಸಿದರು. ಆದರೆ, ಯಾವ ಸಮಯಕ್ಕೆ ಆಕೆ ಭಾರತಕ್ಕೆ ಬಂದಳು ಎಂಬುದನ್ನು ಹೇಳಲಿಲ್ಲ. ಇಷ್ಟು ಬೇಗ ಈ ರೀತಿ ಬೆಳವಣಿಗೆಗಳು ಆಗುತ್ತವೆ ಎಂದು ತಿಳಿದಿರಲಿಲ್ಲ. ಭಾರತ ಸರ್ಕಾರ ನಮಗೆ ಬಹಳ ಸಹಾಯವನ್ನು ಮಾಡಿದೆ. ಈ ಮೂಲಕ ಸುಷ್ಮಾ ಸ್ವರಾಜ್ ಹಾಗೂ ಭಾರತ ಸರ್ಕಾರಕ್ಕೆ ಧನ್ಯವಾದಗಳನ್ನು ಹೇಳುತ್ತೇನೆಂದು ಹೇಳಿದ್ದಾರೆ. 

ಉಜ್ಮಾ ಕುರಿತಂತೆ ಸುಧೀರ್ಘವಾಗಿ ಮಾಹಿತಿಗಳನ್ನು ನೀಡುತ್ತಿದ್ದರು. ಕಚೇರಿಯಿಂದಲೇ ನನಗೆ ಕರೆ ಮಾಡುತ್ತಿದ್ದ ಸುಷ್ಮಾ ಸ್ವರಾಜ್ ಅವರು, ಉಜ್ಮಾ ಭಾರತೀಯ ರಾಯಭಾರಿ ಕಚೇರಿಯಲ್ಲಿದ್ದು, ಸುರಕ್ಷಿತಳಾಗಿದ್ದಾಳೆಂದು ಹೇಳಿದ್ದರು. ಉಜ್ಮಾ ಕೂಡ ಫೋನಿನಲ್ಲಿ ಮಾತನಾಡಿ ಪೊಲೀಸರು ತನಗೆ ರಕ್ಷಣೆ ಹಾಗೂ ಬೆಂಬಲ ನೀಡುತ್ತಿರುವುದಾಗಿ ಹೇಳಿದ್ದಳು. ಇದೀಗ ಉಜ್ಮಾ ಭಾರತಕ್ಕೆ ಮರಳಿ ಬಂದಿರುವುದು ಬಹಳ ಸಂತಸವನ್ನು ತಂದಿದೆ ಎಂದು ತಿಳಿಸಿದ್ದಾರೆ.