ಕೆನಡಾ ಪ್ರಧಾನಿ ಬಳಿ ಖಾಲಿಸ್ತಾನ್ ವಿಷಯ ಪ್ರಸ್ತಾಪಿಸಿದ ಪಂಜಾಬ್ ಸಿಎಂ

ಚಂಡೀಗಢ: ಭಾರತ ಪ್ರವಾಸದಲ್ಲಿರುವ ಕೆನಡಾ ಪ್ರಧಾನಿ ಜಸ್ಟಿನ್ ಟ್ರುಡ್ಯೂ ಅವರನ್ನುಪಂಜಾಬ್ ಮುಖ್ಯಮಂತ್ರಿ ಅಮರಿಂದರ್ ಸಿಂಗ್ ಅವರು ಬುಧವಾರ  ಭೇಟಿ ಮಾಡಿದ್ದು, ಖಾಲಿಸ್ತಾನ ವಿವಾದ ಪ್ರಸ್ತಾಸಿದ್ದಾರೆ.

ಇಂದು ಸಿಎಂ ಅಮರಿಂದ್ ಸಿಂಗ್ ಅವರು ಗೃಹ ಸಚಿವ ಹರಿಜೀತ್ ಸಿಂಗ್ ಸಜ್ಜನ್ ಅವರೊಂದಿಗೆ ಕೆನಡಾ ಪ್ರಧಾನಿ ಭೇಟಿ ಮಾಡಿ, ಪಂಜಾಬ್ ನಲ್ಲಿ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿರುವ ಕೆನಡಾ ಮೂಲದ ವ್ಯಕ್ತಿಗಳ ಪಟ್ಟಿಯನ್ನು ನೀಡಿದರು.

ಈ ವೇಳೆ ಟ್ರುಡ್ಯೂ ಅವರು ಭಾರತ ಸೇರಿದಂತೆ ಇತರೆ ಕಡೆಯೂ ಯಾವುದೇ ಪ್ರತ್ಯೇಕವಾದಿ ಚಳವಳಿಗೆ ಕೆನಡಾ ಬೆಂಬಲ ನೀಡುವುದಿಲ್ಲ ಎಂದು ಪಂಜಾಬ್ ಸಿಎಂಗೆ ಭರವಸೆ ನೀಡಿದ್ದಾರೆ.

ಕೆನಡಾ ಪ್ರಧಾನಿ ಮತ್ತು ಪಂಜಾಬ್ ಸಿಎಂ ಸಭೆಯ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಮುಖ್ಯಮಂತ್ರಿಗಳ ಮಾಧ್ಯಮ ಸಲಹೆಗಾರ ರವೀನ್ ತುಕ್ರಾಲ್ ಅವರು, ಟ್ರುಡ್ಯೂ ಅವರು ಕ್ಯೂಬೆಕ್ ಪ್ರತ್ಯೇಕವಾದಿಗಳ ಹೋರಾಟದ ಉದಾಹರಣೆ ನೀಡುತ್ತ, ನಾನು ನನ್ನ ಜೀವನದಲ್ಲಿ ಇಂತಹ ಹಲವು ಬೆದರಿಕೆಗಳನ್ನು ಎದುರಿಸಿದ್ದೇನೆ ಮತ್ತು ಹಿಂಸಾಚಾರದ ಅಪಾಯದ ಬಗ್ಗೆಯೂ ನನಗೆ ಅರಿವಿದೆ ಎಂದು ಹೇಳಿರುವುದಾಗಿ ತಿಳಿಸಿದರು.