ಸುಳ್ಳು ಹೇಳಲು ನಾಚಿಕೆಯಾಗದೇ ಮೋದಿಜೀ: ರಾಹುಲ್ ಕಿಡಿ

ನವದೆಹಲಿ: ಅಮೇಥಿ ಲೋಕಸಭಾ ಕ್ಷೇತ್ರದಲ್ಲಿ ಶಸ್ತ್ರಾಸ್ತ್ರ ತಯಾರಿಕಾ ಘಟಕ ಸ್ಥಾಪನೆಗೆ ಅಡಿಪಾಯ ಹಾಕುವ ವಿಚಾರದಲ್ಲಿ  ಪ್ರಧಾನಿ  ಮೋದಿ ಜನರನ್ನು ದಿಕ್ಕು ತಪ್ಪಿಸಿ ಸುಳ್ಳು ಹೇಳುತ್ತಿದ್ದಾರೆ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಆರೋಪಿಸಿದ್ದಾರೆ.

ಈಗಾಗಲೇ ಈ ಘಟಕಕ್ಕೆ  ಕಳೆದ 2010ರಲ್ಲೇ ತಾವು  ಅಡಿಪಾಯ ಹಾಕಿದ್ದು ಪ್ರಧಾನಿ ಮೋದಿ ಅವರು ಅವರು ತಾವೇ ಇದಕ್ಕೆ ಅಡಿಪಾಯ ಹಾಕುತ್ತಿರುವುದಾಗಿ ಹೇಳುವ ಮೂಲಕ ಜನರಿಗೆ ಹಸಿ ಸುಳ್ಳು ಹೇಳುತ್ತಿದ್ದಾರೆ ಎಂದು ರಾಹುಲ್ ಗಾಂಧಿ  ಕಿಡಿಕಾರಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಹಾಕಿರುವ ರಾಹುಲ್ ಗಾಂಧಿ ಅವರು, ಪ್ರಿಯ ಪ್ರಧಾನ ಮಂತ್ರಿ ಜೀ, ಈಗಾಗಲೇ 2010 ರಲ್ಲಿ ಕಾರ್ಖಾನೆಗೆ ನಾನು ಅಡಿಪಾಯ ಹಾಕಿದ್ದೇನೆ ಎಂಬುದನ್ನು ಮರೆತು ಬಿಟ್ಟಿದ್ದೀರಾ.. ಸಣ್ಣ ಶಸ್ತ್ರಾಸ್ತ್ರಗಳ ಉತ್ಪಾದನೆಯು ಕಳೆದ ಹಲವಾರು ವರ್ಷಗಳಿಂದ ಕಾರ್ಖಾನೆಯಲ್ಲಿ ನಡೆಯುತ್ತಿದೆ ಎಂಬುದು ನಿಮಗೆ ಗೊತ್ತಿಲ್ಲವೇ ಎಂದು ರಾಹುಲ್ ಕಿಡಿ ಕಾರಿದ್ದಾರೆ.

ನೀವು ಭಾನುವಾರದಂದು ಅಮೇಥಿಗೆ ಭೇಟಿ ನೀಡಿದ್ದೀರಿ ಮತ್ತು ನಿಮ್ಮ ಅಭ್ಯಾಸ ಸುಳ್ಳು ಹೇಳುವುದು ಮತ್ತೆ ಅದನ್ನೇ ಸಾಬೀತು ಪಡಿಸಲು ಹೊರಟ ನಿಮಗೆ ನಾಚಿಕೆ ಆಗುವುದಿಲ್ಲವೇ.. ಎಂದು ಖಾರವಾಗಿ ರಾಹುಲ್ ಪ್ರಶ್ನೆ ಮಾಡಿದ್ದಾರೆ.

ಇನ್ನು ನಿನ್ನೆ ಅಮೇಥಿಯಲ್ಲಿ ನಡೆದ ಸಮಾವೇಶದಲ್ಲಿ ಮಾತನಾಡಿದ್ದ ಪ್ರಧಾನಿ ಅವರು, ಹಿಂದಿನ ಸರ್ಕಾರಗಳ ಕಾರಣದಿಂದಾಗಿ ಅಮೇಥಿಯಲ್ಲಿ ನಡೆಯುತ್ತಿರುವ ಅಭಿವೃದ್ಧಿ ಕಾರ್ಯಗಳು ಕುಂಠಿತವಾಗಿವೆ ಎಂದು ಆರೋಪಿಸಿದ್ದರು. ಅಂತೆಯೇ  ಈ ಕೆಲಸವನ್ನು ಎಂಟು ರಿಂದ ಒಂಬತ್ತು ವರ್ಷಗಳ ಹಿಂದೆಯೇ ಮಾಡಬೇಕಿತ್ತು" ಎಂದು ಮೋದಿ ಟೀಕಿಸಿದ್ದರು.  ಇದಕ್ಕೆ ಪ್ರತಿಯಾಗಿ ರಾಹಲ್ ಅವರು ಮೋದಿಗೆ ಅವರಿಗೆ ಸಾಮಾಜಿಕ ಜಾಲತಾಣಗಳ ಮೂಲಕವೇ ಟಾಂಗ್ ಕೊಟ್ಟಿದ್ದಾರೆ.