ಪ್ರಧಾನಿ ಮೋದಿ ಕರೆಗೆ ಚಿಂದಿ ಆಯುವವನ ಮನ ಮಿಡಿಯುವ ಚಪ್ಪಾಳೆ, ವಿಡಿಯೋ!

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಕೊರೋನಾ ವೈರಸ್ ವಿರುದ್ಧದ ಹೋರಾಟಕ್ಕೆ ಮುಂದಡಿಯಾಗಿ ಜನತಾ ಕರ್ಫ್ಯೂಗೆ ಕರೆ ನೀಡಿದ್ದು ಕಂಡು ಕೇಳರಿಯದ ರೀತಿಯಲ್ಲಿ ದೇಶದ ಜನತೆ ಸ್ಪಂದನೆ ನೀಡಿದ್ದರು. 

ನರೇಂದ್ರ ಮೋದಿ ಅವರು ಇಂದು ಜನತಾ ಕರ್ಫ್ಯೂಗೆ ಕರೆ ನೀಡಿದ್ದು ಸಂಜೆ 5 ಗಂಟೆಗೆ ಭಾರತೀಯರ ಆರೋಗ್ಯ ಹಾಗೂ ಸುರಕ್ಷತೆಗಾಗಿ ಶ್ರಮಿಸುತ್ತಿರುವ ವೈದ್ಯರು, ದಾದಿಯರು, ಆಸ್ಪತ್ರೆಯ ಸಿಬ್ಬಂದಿಗಳಿಗೆ ಚಪ್ಪಾಳೆ ತಟ್ಟುವ ಮೂಲಕ ಕೃತಜ್ಞತೆ ಸಲ್ಲಿಸಿ ಎಂದು ಹೇಳಿದ್ದರು. 

ಅದೇ ರೀತಿ ಇಂದು ಸಂಜೆ 5 ಗಂಟೆ ಸುಮಾರಿಗೆ ದೇಶಾದ್ಯಂತ ಜನತೆ ತಮ್ಮ ಮನೆಗಳ ಮುಂದೆ ಜಾಗಟೆ, ಶಂಖ, ತಮಟೆ, ಚಪ್ಪಾಳೆ ಮತ್ತು ಗಂಟೆ ಬಾರಿಸುವ ಮೂಲಕ ಕೃತಜ್ಞತೆ ಸಲ್ಲಿಸಿದ್ದರು. ಇನ್ನು ಬಾಲಿವುಡ್ ಗಣ್ಯರಿಂದ ಸಾಮಾನ್ಯರು ಸಹ ಚಪ್ಪಾಳೆ ತಟ್ಟಿದ್ದರು. ಈ ಚಪ್ಪಾಳೆಯಲ್ಲಿ ಚಿಂದಿ ಆಯುವ ವ್ಯಕ್ತಿಯೋರ್ವನ ಚಪ್ಪಾಳೆ ಇಡೀ ದೇಶದ ಗಮನ ಸೆಳೆದಿದೆ. ಈ ವಿಡಿಯೋ ಇದೀಗ ವೈರಲ್ ಆಗಿದೆ.

ಟೀಂ ಇಂಡಿಯಾದ ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಅವರು ಈ ವಿಡಿಯೋವನ್ನು ಟ್ವೀಟ್ ಮಾಡಿ ಈ ಚಪ್ಪಾಳೆಗೆ ಬೆಲೆ ಕಟ್ಟಲಾಗದು ಎಂದು ಬರೆದುಕೊಂಡಿದ್ದಾರೆ.