ಉತ್ತರ ಪ್ರದೇಶ: ಅಕ್ರಮ ಮಾಂಸ ದಂಧೆ ಆರೋಪದ ಮೇಲೆ ಮಾಜಿ ಸಚಿವ ಯಾಕೂಬ್ ಖುರೇಷಿ ಹಾಗೂ ಪುತ್ರನ ಬಂಧನ

ಮೀರತ್‌(ಉತ್ತರಪ್ರದೇಶ): ಅಕ್ರಮ ಮಾಂಸ ದಂಧೆ ನಡೆಸುತ್ತಿದ್ದ ಆರೋಪದ ಮೇಲೆ ಹಾಜಿ ಯಾಕೂಬ್ ಖುರೇಷಿ ಮತ್ತು ಅವರ ಹಿರಿಯ ಪುತ್ರ ಇಮ್ರಾನ್ ಯಾಕೂಬ್ ನನ್ನು ಪೊಲೀಸರು ಬಂಧಿಸಿದ್ದಾರೆ.

ಕಳೆದ ಒಂಬತ್ತು ತಿಂಗಳಿನಿಂದ ತಲೆಮರೆಸಿಕೊಂಡಿದ್ದ ತಂದೆ-ಮಗನನ್ನು ಇಬ್ಬರನ್ನೂ ಮೀರತ್ ಪೊಲೀಸರು ದೆಹಲಿಯಿಂದ ಬಂಧಿಸಿದ್ದಾರೆ. ಕೆಲ ದಿನಗಳ ಹಿಂದೆ ಇಬ್ಬರ ವಿರುದ್ಧ ಗೂಂಡಾ ಕಾಯ್ದೆಯನ್ನು ದಾಖಲಿಸಲಾಗಿತ್ತು.

ಹಾಜಿ ಯಾಕೂಬ್ ಮತ್ತು ಅವರ ಕುಟುಂಬದ ವಿರುದ್ಧ ಮಾರ್ಚ್ 2022ರಲ್ಲಿ ಮೀರತ್‌ನ ಖಾರ್ಖೋಂಡಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಈ ಪ್ರದೇಶದಲ್ಲಿ ಯಾಕೂಬ್‌ನ ಅಕ್ರಮ ಮಾಂಸದ ಕಾರ್ಖಾನೆಯು ಹೊರಗಿನಿಂದ ತಂದ ಮಾಂಸದ ಪ್ಯಾಕೇಜಿಂಗ್ ವ್ಯವಹಾರವನ್ನು ನಡೆಸುತ್ತಿದೆ ಎಂದು ಆರೋಪಿಸಲಾಗಿದೆ. ಕಾರ್ಖಾನೆಯ ಪರವಾನಿಗೆ ಅವಧಿ ಮುಗಿದಿದ್ದರೂ ಕಾರ್ಯಾಚರಣೆ ನಡೆಸಲಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಇದನ್ನೂ ಓದಿ: ಉತ್ತರ ಪ್ರದೇಶ: ಶಾಲಾ ಬಾಲಕನಿಗೆ ಕಾರು ಡಿಕ್ಕಿ, 1 ಕಿ.ಮೀ ಎಳೆದೊಯ್ದ ಪಾಪಿ ಚಾಲಕ!

ಪೊಲೀಸರ ದಾಳಿಯಲ್ಲಿ ಟನ್‌ಗಟ್ಟಲೆ ಮಾಂಸ ಪತ್ತೆಯಾಗಿದ್ದು, ಕಾರ್ಖಾನೆಯಲ್ಲಿ ಕೆಲಸ ಮಾಡುತ್ತಿದ್ದ ಹಲವರನ್ನು ಪೊಲೀಸರು ಬಂಧಿಸಿದ್ದಾರೆ. ಈ ಪ್ರಕರಣದಲ್ಲಿ ಯಾಕೂಬ್ ಜೊತೆಗೆ ಆತನ ಇಬ್ಬರು ಪುತ್ರರು ಹಾಗೂ ಆತನ ಪತ್ನಿಯನ್ನೂ ಪೊಲೀಸರು ಆರೋಪಿಗಳನ್ನಾಗಿ ಮಾಡಿದ್ದರು.

ತಲೆಮರೆಸಿಕೊಂಡಿದ್ದ ತಂದೆ-ಮಗನ ಸುಳಿವಿಗಾಗಿ ಆರಂಭದಲ್ಲಿ 25-25 ಸಾವಿರ ಬಹುಮಾನ ಘೋಷಿಸಲಾಗಿತ್ತು. ನಂತರ ಪೊಲೀಸರು ಅದನ್ನು 50 ಸಾವಿರಕ್ಕೆ ಹೆಚ್ಚಿಸಿದ್ದರು. ಈ ಪ್ರಕರಣದಲ್ಲಿ ಯಾಕೂಬ್ ಖುರೇಷಿ, ಸಂಜೀದಾ ಖುರೇಷಿ, ಇಮ್ರಾನ್ ಖುರೇಷಿ, ಫಿರೋಜ್ ಖುರೇಷಿ, ಮೋಹಿತ್ ತ್ಯಾಗಿ, ಫೈಜಾಬ್ ಮತ್ತು ಮುಜೀಬ್ ಅಕ್ರಮ ಚಟುವಟಿಕೆಗಳಲ್ಲಿ ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾಗಿದೆ. ಒಟ್ಟು 7 ಜನರ ವಿರುದ್ಧ ದರೋಡೆಕೋರರ ಕಾಯ್ದೆಯನ್ನು ಹಾಕಲಾಗಿದ್ದು, 17 ಜನರ ವಿರುದ್ಧ ಪ್ರಕರಣ ದಾಖಲಾಗಿದೆ.