ಭಾರತ-ಫ್ರಾನ್ಸ್ ನಡುವೆ 63,000 ಕೋಟಿ ರೂ ಮೌಲ್ಯದ ರಫೇಲ್-ಎಂ ಒಪ್ಪಂದ: ಏನಿದು, ಇದರ ಮಹತ್ವವೇನು?

ನವದೆಹಲಿ: ಭಾರತ ಮತ್ತು ಫ್ರಾನ್ಸ್ ಮುಂದಿನ ವಾರ 26 ರಫೇಲ್-ಎಂ ಯುದ್ಧ ವಿಮಾನಗಳ ಬಹುನಿರೀಕ್ಷಿತ 63,000 ಕೋಟಿ ರೂಪಾಯಿ ಒಪ್ಪಂದವನ್ನು ಔಪಚಾರಿಕವಾಗಿ ಮಾಡಲಿದೆ. ಇದು ಭಾರತೀಯ ನೌಕಾಪಡೆಯ ಕಡಲ ಯುದ್ಧ ಸಾಮರ್ಥ್ಯಗಳನ್ನು ಗಮನಾರ್ಹವಾಗಿ ಹೆಚ್ಚಿಸುವ ಗುರಿಯನ್ನು ಹೊಂದಿದೆ.

ಫ್ರೆಂಚ್ ರಕ್ಷಣಾ ಸಚಿವ ಸೆಬಾಸ್ಟಿಯನ್ ಲೆಕೋರ್ನು ಅವರ ದೆಹಲಿ ಭೇಟಿಯ ಸಮಯದಲ್ಲಿ ಸಹಿ ಹಾಕಲು ನಿರ್ಧರಿಸಲಾಗಿತ್ತು, ಆದರೆ ವೈಯಕ್ತಿಕ ಕಾರಣಗಳಿಗಾಗಿ ಅವರ ಪ್ರವಾಸವನ್ನು ಮುಂದೂಡಲಾಗಿದ್ದರಿಂದ ಸೋಮವಾರ ವರ್ಚುವಲ್ ಆಗಿ ಒಪ್ಪಂದವನ್ನು ಅಂತಿಮಗೊಳಿಸಲಾಗುತ್ತದೆ.

ಭಾರತೀಯ ರಕ್ಷಣಾ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿಂಗ್ ಮತ್ತು ಫ್ರೆಂಚ್ ರಾಯಭಾರಿ ಡಾ. ಥಿಯೆರ್ರಿ ಮ್ಯಾಥೌ ಅವರು ಸೋಮವಾರ ಸರ್ಕಾರದಿಂದ ಸರ್ಕಾರಕ್ಕೆ (G2G) ಒಪ್ಪಂದವನ್ನು ಔಪಚಾರಿಕವಾಗಿ ಘೋಷಿಸುವ ನಿರೀಕ್ಷೆಯಿದೆ, ಇದನ್ನು ಈ ತಿಂಗಳ ಆರಂಭದಲ್ಲಿ ಭದ್ರತೆಯ ಸಂಪುಟ ಸಮಿತಿ (CCS) ಅನುಮೋದಿಸಿದೆ. ಜಿ2ಜಿ ಎಂಬುದು ಆಮದುದಾರ ದೇಶದ ಸರ್ಕಾರ ಮತ್ತು ರಫ್ತುದಾರ ದೇಶದ ನಡುವೆ ನೇರ ಮಾತುಕತೆಯನ್ನು ಒಳಗೊಂಡಿರುವ ರಕ್ಷಣಾ ಖರೀದಿ ವಿಧಾನವಾಗಿದೆ.

ಏಪ್ರಿಲ್ 9 ರಂದು ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್(The New Indian Express) ವರದಿ ಮಾಡಿದಂತೆ ಸರ್ಕಾರದ ಅತ್ಯುನ್ನತ ನಿರ್ಧಾರ ತೆಗೆದುಕೊಳ್ಳುವ ಸಂಸ್ಥೆಯಾದ ಭದ್ರತೆಯ ಕುರಿತಾದ ಸಂಪುಟ ಸಮಿತಿಯು ಈ ಒಪ್ಪಂದವನ್ನು ಅಂಗೀಕರಿಸಿದೆ ಎಂದು ವರದಿ ಮಾಡಿತ್ತು.

ಈ ಖರೀದಿಯಲ್ಲಿ 22 ಸಿಂಗಲ್-ಸೀಟರ್ ಮತ್ತು ನಾಲ್ಕು ಅವಳಿ-ಸೀಟರ್ ತರಬೇತಿ ವಿಮಾನಗಳು ಸೇರಿವೆ. ಈ ವಾಹಕ-ಸಮರ್ಥ ಯುದ್ಧ ವಿಮಾನಗಳನ್ನು ನೌಕಾಪಡೆಯ ಸ್ಥಳೀಯ ವಿಮಾನವಾಹಕ ನೌಕೆಯಾದ ಐಎನ್‌ಎಸ್ ವಿಕ್ರಾಂತ್‌ನಲ್ಲಿ ನಿಯೋಜಿಸಲು ಉದ್ದೇಶಿಸಲಾಗಿದೆ.

ರಷ್ಯಾ ಮೂಲದ ಹಳೆಯ ಮಿಗ್-29ಕೆ ಫ್ಲೀಟ್ ಕಾರ್ಯಾಚರಣೆಯ ಸವಾಲುಗಳನ್ನು ಎದುರಿಸುತ್ತಿರುವುದರಿಂದ, ಸ್ಥಳೀಯ ಟ್ವಿನ್ ಎಂಜಿನ್ ಡೆಕ್-ಆಧಾರಿತ ಫೈಟರ್ (TEDBF) ನಿಯೋಜನೆಗೆ ಸಿದ್ಧವಾಗುವವರೆಗೆ ರಫೇಲ್-ಎಂ ಜೆಟ್‌ಗಳು ಅಲ್ಪಾವಧಿಯ ಪರಿಹಾರವಾಗಿ ಕಾರ್ಯನಿರ್ವಹಿಸುತ್ತವೆ.

ವಾಹಕ-ಆಧಾರಿತ ಯುದ್ಧ ವಿಮಾನಗಳ ಅಗತ್ಯಕ್ಕೆ ದೀರ್ಘಾವಧಿಯ ಪರಿಹಾರವಾಗಿ ಭಾರತ ತನ್ನದೇ ಆದ ಅವಳಿ-ಎಂಜಿನ್ ಡೆಕ್-ಆಧಾರಿತ ಯುದ್ಧ ವಿಮಾನಗಳನ್ನು ಅಭಿವೃದ್ಧಿಪಡಿಸುವ ಕೆಲಸ ಮಾಡುತ್ತಿದೆ. ನೌಕಾ ಕಾರ್ಯಾಚರಣೆಗಳಿಗಾಗಿ ವಿನ್ಯಾಸಗೊಳಿಸಲಾದ ರಫೇಲ್-ಎಂ ಜೆಟ್‌ಗಳು ಬಲವರ್ಧಿತ ಅಂಡರ್‌ಕ್ಯಾರೇಜ್‌ಗಳೊಂದಿಗೆ ಸಜ್ಜುಗೊಂಡಿವೆ.

ವಾಹಕ ನೌಕೆಗಳಲ್ಲಿ ಬಳಸುವ ಭಾರತೀಯ ನೌಕಾಪಡೆಯ STOBAR (ಶಾರ್ಟ್ ಟೇಕ್-ಆಫ್ ಆದರೆ ಅರೆಸ್ಟೆಡ್ ರಿಕವರಿ) ವ್ಯವಸ್ಥೆಯೊಂದಿಗೆ ಹೊಂದಿಕೊಳ್ಳುತ್ತವೆ. ಈ ವಾಹಕಗಳಿಂದ ಉಡಾಯಿಸಲಾದ ವಿಮಾನಗಳು ಕರಾವಳಿಯಿಂದ ದೂರದಲ್ಲಿ ಕಾರ್ಯನಿರ್ವಹಿಸಬಹುದು.