ಕಳ್ಳರನ್ನು ಬೆಂಬಲಿಸುವುದಿಲ್ಲ, ಪಕ್ಷವನ್ನು ಹಾಳು ಮಾಡುವವರನ್ನು ಬದಿಗಿಟ್ಟರೆ ಮಾತ್ರ ಅದರೊಂದಿಗೆ ಕೆಲಸ: ನವಜೋತ್ ಕೌರ್ ಸಿಧು

ಪಟಿಯಾಲ (ಪಂಜಾಬ್): ಇತ್ತೀಚೆಗೆ ಪಕ್ಷದಿಂದ ಅಮಾನತುಗೊಂಡಿರುವ ಕಾಂಗ್ರೆಸ್ ಮಾಜಿ ಶಾಸಕಿ ನವಜೋತ್ ಕೌರ್ ಸಿಧು, ಹೈಕಮಾಂಡ್ ಜೊತೆ ಮಾತುಕತೆ ನಡೆಸುತ್ತಿದ್ದೇನೆ. ಆದರೆ, ಕಳ್ಳರನ್ನು ಬೆಂಬಲಿಸುವುದಿಲ್ಲಎಂದು ಒತ್ತಿ ಹೇಳಿದ್ದಾರೆ.

'ನಾನು ಹೈಕಮಾಂಡ್ ಜೊತೆ ಮಾತುಕತೆ ನಡೆಸುತ್ತಿದ್ದೇನೆ. ಆದರೆ, ನನಗೆ ಒಂದು ಷರತ್ತು ಇದೆ. ನಾನು ಕಳ್ಳರನ್ನು ಯಾವುದೇ ಕಾರಣಕ್ಕೂ ಬೆಂಬಲಿಸುವುದಿಲ್ಲ. ನಾವು ಸರ್ಕಾರ ರಚಿಸಲು ಬಯಸಿದರೆ, ಕಾಂಗ್ರೆಸ್ ಪಕ್ಷವನ್ನು ಹಾಳುಮಾಡುತ್ತಿರುವ ನಾಲ್ಕೈದು ಜನರನ್ನು ಬದಿಗಿಟ್ಟರೆ, ನಾನು ಅದರ ಬಗ್ಗೆ ಯೋಚಿಸುತ್ತೇನೆ...' ಎಂದು ಅವರು ಹೇಳಿದರು.

ತಾನು ರಾಜ್ಯಪಾಲರನ್ನು ಭೇಟಿ ಮಾಡಲು ಹೋದಾಗ, ಮಾಧ್ಯಮಗಳು ತನ್ನ ಹೇಳಿಕೆಗಳನ್ನು ತಿರುಚಿದವು. ಇದಲ್ಲದೆ, ತನ್ನ ಹೇಳಿಕೆಗಳಿಂದ ತೊಂದರೆಗೊಳಗಾದವರು ಶಿವಾಲಿಕ್ ಶ್ರೇಣಿಯಲ್ಲಿ 10,000 ಎಕರೆ ಭೂಮಿಯನ್ನು ಹೊಂದಿದ್ದಾರೆ ಮತ್ತು ಈಗ, ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಅವರ ಸಹಯೋಗದೊಂದಿಗೆ, ಅವರು ಈ ಭೂಮಿಯನ್ನು ಕಾನೂನುಬದ್ಧಗೊಳಿಸಲು ಯತ್ನಿಸುತ್ತಿದ್ದಾರೆ. ಆದರೆ, ನಾನು ಅದರ ವಿರುದ್ಧ ದೃಢವಾಗಿ ನಿಂತಿದ್ದೇನೆ ಎಂದರು.

ಮೊದಲಿಗೆ ನಾನು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರ ಮೂಲಕ ತಮ್ಮ ಸಮಸ್ಯೆಗಳನ್ನು ಎತ್ತಲು ಬಯಸಿದ್ದರು. ಆದರೆ, ಅದಕ್ಕೂ ಮೊದಲು ರಾಜ್ಯಪಾಲರನ್ನು ಭೇಟಿ ಮಾಡಲು ಅಪಾಯಿಂಟ್ಮೆಂಟ್ ಪಡೆದೆ. ಶಿವಾಲಿಕ್ ವ್ಯಾಪ್ತಿಯಲ್ಲಿ ಕೋಟ್ಯಂತರ ರೂಪಾಯಿ ಮೌಲ್ಯದ ಆಸ್ತಿಯನ್ನು ಹೊಂದಿರುವ ಈ ಕೆಲವೇ ಜನರ ವಿಷಯವನ್ನು ಎತ್ತಿದಾಗ ಎಲ್ಲರೂ ಅಸಮಾಧಾನಗೊಂಡಿದ್ದಾರೆ' ಎಂದು ಅವರು ಹೇಳಿದ್ದಾರೆ.

'ರಾಹುಲ್ ಗಾಂಧಿ ಈ ಸಮಸ್ಯೆಗಳನ್ನು ಪರಿಹರಿಸುತ್ತಾರೆ ಮತ್ತು 'ಹೀರೋ' ಆಗುತ್ತಾರೆ ಎಂದು ನಾನು ಆಶಿಸಿದ್ದೆ... ಅವರ ಸುತ್ತಲಿನ ಜನರು ಅವರನ್ನು ದಾರಿ ತಪ್ಪಿಸಿದರು. ಪರಿಣಾಮವಾಗಿ ವಿಳಂಬವಾಯಿತು... ಬಳಿಕ ನನಗೆ ರಾಜ್ಯಪಾಲರೊಂದಿಗೆ ಅಪಾಯಿಂಟ್ಮೆಂಟ್ ಸಿಕ್ಕಿತು... ರಾಹುಲ್ ಗಾಂಧಿ ಈ ಪ್ರಸ್ತುತಿಯನ್ನು ಅಲ್ಲಿ ನೀಡಬೇಕೆಂದು ನಾನು ಬಯಸಿದ್ದೆ ಏಕೆಂದರೆ ಇದು ಪಂಜಾಬ್‌ನ ಗೆಲುವಿನ ವಿಷಯವಾಗಿದೆ' ಎಂದರು.

ಸುಖಜಿಂದರ್ ರಾಂಧವ ಕಳುಹಿಸಿದ ಕಾನೂನು ನೋಟಿಸ್ ಬಗ್ಗೆ ಪ್ರತಿಕ್ರಿಯಿಸಿದ ಅವರು, 'ಅವರು ತಮ್ಮ ಪತ್ನಿಯ ಗೆಲುವನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಾಗಲಿಲ್ಲ ಮತ್ತು ರಾಜಸ್ಥಾನದಲ್ಲಿ ಅವರು ಕೋಟ್ಯಂತರ ರೂಪಾಯಿಗಳಿಗೆ ಟಿಕೆಟ್‌ಗಳನ್ನು ಬಹಿರಂಗವಾಗಿ ಮಾರಾಟ ಮಾಡಿದ್ದಾರೆ. ಮಾಧ್ಯಮಗಳಲ್ಲಿ ನಾನು ಈ ಕುರಿತಾದ ಸಾಕ್ಷ್ಯಗಳನ್ನು ನೋಡಿದ್ದೇನೆ ಮತ್ತು ಕಾಂಗ್ರೆಸ್ ಹೈಕಮಾಂಡ್‌ಗೆ ಸಾಕ್ಷ್ಯವನ್ನು ಕಳುಹಿಸಿದ್ದೇನೆ. ಹೈಕಮಾಂಡ್‌ಗೆ ತಮ್ಮ ಕಡೆಯಿಂದ ಹೇಳಿಕೆ ನೀಡಿದ್ದೇನೆ ಮತ್ತು ಹೈಕಮಾಂಡ್‌ಗೆ ಸತ್ಯವನ್ನು ಮಾತನಾಡುವ ಜನರು ಅಗತ್ಯವಿದ್ದರೆ, ಅವರು ತಮ್ಮೊಂದಿಗೆ ನಿಲ್ಲುತ್ತಾರೆ' ಎಂದು ಅವರು ಹೇಳಿದರು.

ಎಐಸಿಸಿ ತಮ್ಮನ್ನು ಬೆಂಬಲಿಸುತ್ತದೆ ಮತ್ತು ಕಾಂಗ್ರೆಸ್ ಪಕ್ಷದ ಶೇ 70 ರಷ್ಟು ಜನರು ತಮ್ಮೊಂದಿಗಿದ್ದಾರೆ. ಎಲ್ಲ ಕಾಂಗ್ರೆಸ್ ನಾಯಕರು ತಮ್ಮ ಸಂಪರ್ಕದಲ್ಲಿದ್ದಾರೆ ಮತ್ತು ಅವರ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳುವುದನ್ನು ತಪ್ಪಿಸಲು ಅವರು ಈಗ ಯಾರ ಹೆಸರನ್ನು ಬಹಿರಂಗಪಡಿಸಲು ಬಯಸುವುದಿಲ್ಲ ಎಂದು ನವಜೋತ್ ಕೌರ್ ಸಿಧು ಹೇಳಿದರು.

ಈಮಧ್ಯೆ, ಪಂಜಾಬ್ ಕಾಂಗ್ರೆಸ್ ಅಧ್ಯಕ್ಷ ಅಮರಿಂದರ್ ಸಿಂಗ್ ರಾಜಾ ವಾರಿಂಗ್ ವಿರುದ್ಧ ಮಾಜಿ ಶಾಸಕಿ ನವಜೋತ್ ಕೌರ್ ಸಿಧು ಅವರು ಮಾಡಿದ ಸಾರ್ವಜನಿಕ ಆರೋಪಗಳ ಸರಣಿಯ ನಂತರ ಅವರನ್ನು ಕಾಂಗ್ರೆಸ್‌ನಿಂದ ಅಮಾನತುಗೊಳಿಸಲಾಗಿದೆ. ಮುಖ್ಯಮಂತ್ರಿ ಹುದ್ದೆಯನ್ನು ಪಡೆಯಲು 500 ಕೋಟಿ ರೂ. ನೀಡಬೇಕು ಎಂಬ ಅವರ ಹೇಳಿಕೆ ಪಕ್ಷದೊಳಗೆ ರಾಜಕೀಯ ಅಶಾಂತಿಗೆ ಕಾರಣವಾಗಿದೆ.