ರಣಥಂಬೋರ್‌ ನಲ್ಲಿ ಅಪರೂಪದ ದೃಶ್ಯ: ಒಟ್ಟಿಗೆ ಕಾಣಿಸಿಕೊಂಡ ಹುಲಿ, ಚಿರತೆ, ಚೀತಾ

ರಣಥಂಬೋರ್‌: ಕಾಡಿನ ಅತ್ಯಂತ ಅಪರೂಪದ ಪರಭಕ್ಷಕಗಳು ಒಟ್ಟಿಗೆ ಕಾಣಿಸಿಕೊಂಡಿರುವ ಅಪರೂಪದ ಮತ್ತು ಗಮನಾರ್ಹ ಕ್ಷಣ ರಣಥಂಬೋರ್ ಅರಣ್ಯದಲ್ಲಿ ದಾಖಲಾಗಿದೆ.

ಹುಲಿ, ಚಿರತೆ ಮತ್ತು ಚೀತಾ, ರಣಥಂಬೋರ್‌ನ ವಲಯ 9 ರಲ್ಲಿ ಒಂದೇ ಲ್ಯಾಂಡ್ ಸ್ಕೇಪ್ ಮತ್ತು ಸಮಯದ ಚೌಕಟ್ಟಿನೊಳಗೆ ಕಾಣಿಸಿಕೊಂಡಿವೆ ಎಂದು ರಾಜಸ್ಥಾನ ಅರಣ್ಯ ಇಲಾಖೆ ತಿಳಿಸಿದೆ.

ಹುಲಿ ಮೀಸಲು ಪ್ರದೇಶದಿಂದ ಸುಮಾರು 45 ನಿಮಿಷಗಳ ದೂರದಲ್ಲಿರುವ ಮತ್ತು ಚಕಲ್ ನದಿಯ ದಡದಲ್ಲಿರುವ ಅರಣ್ಯದ ವಲಯ 9 ರಲ್ಲಿ ಈ ದೃಶ್ಯ ಕಂಡುಬಂದಿದೆ.

ಅಧಿಕಾರಿಗಳು ಇದನ್ನು ಅದ್ಭುತ ಕ್ಷಣ ಎಂದು ಬಣ್ಣಿಸಿದ್ದಾರೆ, ಇದು ರಣಥಂಬೋರ್‌ನ ಅಭಿವೃದ್ಧಿ ಹೊಂದುತ್ತಿರುವ ಜೀವವೈವಿಧ್ಯತೆ ಮತ್ತು ಅದರ ವನ್ಯಜೀವಿ ಆವಾಸಸ್ಥಾನದ ಸೂಕ್ಷ್ಮ ಸಮತೋಲನವನ್ನು ಒತ್ತಿಹೇಳುತ್ತದೆ.

"ಇಂತಹ ಕ್ಷಣಗಳು ಅಪರೂಪದ್ದಾಗಿದ್ದು, ನಮ್ಮ ಕಾಡುಗಳು ನಿಜವಾಗಿಯೂ ಸಮರ್ಥವಾಗಿವೆ ಎಂಬುದನ್ನು ನಮಗೆ ತಿಳಿಸುತ್ತವೆ. ನೀವೂ ರಣಥಂಬೋರ್ ಗೆ ಬನ್ನಿ, ಈ ಅದ್ಭುತವನ್ನು ಆಸ್ವಾದಿಸಿ. ರಣಥಂಬೋರ್ ಕಾಯುತ್ತಿದೆ" ಎಂದು ರಾಜಸ್ಥಾನ ಅರಣ್ಯ ಇಲಾಖೆ ಸಾಮಾಜಿಕ ಮಾಧ್ಯಮ ವೇದಿಕೆ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್‌ನಲ್ಲಿ ತಿಳಿಸಿದೆ.

ಇಂಥಹ ದೃಶ್ಯಗಳು ಅತ್ಯಂತ ಅಸಾಮಾನ್ಯವಾಗಿದ್ದು, ಅರಣ್ಯ ಪರಿಸರ ವ್ಯವಸ್ಥೆಯ ಶ್ರೀಮಂತಿಕೆ ಮತ್ತು ಅನಿರೀಕ್ಷಿತತೆಯ ಒಂದು ನೋಟವನ್ನು ನೀಡುತ್ತದೆ.

ಆಗ್ನೇಯ ರಾಜಸ್ಥಾನದ ಸವಾಯಿ ಮಾಧೋಪುರ್ ಜಿಲ್ಲೆಯಲ್ಲಿರುವ ರಣಥಂಬೋರ್ ಹುಲಿ ಮೀಸಲು ಪ್ರದೇಶ ಭಾರತದ ಅತ್ಯಂತ ಪ್ರಸಿದ್ಧ ವನ್ಯಜೀವಿ ಉದ್ಯಾನವನಗಳಲ್ಲಿ ಒಂದಾಗಿದೆ. ಸುಮಾರು 1,334 ಚದರ ಕಿ.ಮೀ. ವಿಸ್ತೀರ್ಣದಲ್ಲಿ ಹರಡಿರುವ ಈ ಪ್ರದೇಶ ಒಂದು ಕಾಲದಲ್ಲಿ ಜೈಪುರ ರಾಜಮನೆತನದ ಬೇಟೆಯಾಡುವ ಸ್ಥಳವಾಗಿತ್ತು. ಅಧಿಕಾರಿಗಳು ಇದನ್ನು 1955 ರಲ್ಲಿ ವನ್ಯಜೀವಿ ಅಭಯಾರಣ್ಯವೆಂದು ಘೋಷಿಸಿದರು ಮತ್ತು 1973 ರಲ್ಲಿ ಇದನ್ನು ಪ್ರಾಜೆಕ್ಟ್ ಟೈಗರ್‌ನಲ್ಲಿ ಸೇರಿಸಿದರು.

ಈ ಮೀಸ ಪ್ರದೇಶ ತನ್ನ ದಟ್ಟವಾದ ಕಾಡುಗಳು, ರಮಣೀಯ ಸರೋವರಗಳು ಮತ್ತು ಉದ್ಯಾನವನದೊಳಗಿನ ಬೆಟ್ಟದ ಮೇಲೆ ನೆಲೆಗೊಂಡಿರುವ ಭವ್ಯವಾದ ರಣಥಂಬೋರ್ ಕೋಟೆಯೊಂದಿಗೆ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಹುಲಿಗಳು ಇಲ್ಲಿನ ಪ್ರಮುಖ ಆಕರ್ಷಣೆಯಾಗಿದ್ದು, ಹೆಚ್ಚಾಗಿ ಹಗಲು ಹೊತ್ತಿನಲ್ಲಿ ಕಾಣಬಹುದಾಗಿದೆ. ಇದು ಹೆಚ್ಚಿನ ಹುಲಿ ಆವಾಸಸ್ಥಾನಗಳಲ್ಲಿ ಅಪರೂಪದ್ದಾಗಿದೆ. ಈ ಉದ್ಯಾನವನ ಭಾರತದ ಹುಲಿ ಸಂರಕ್ಷಣಾ ಪ್ರಯತ್ನಗಳಿಗೆ ಸಕ್ರಿಯವಾಗಿ ಕೊಡುಗೆ ನೀಡುತ್ತದೆ ಮತ್ತು ಹಲವಾರು ಪ್ರಸಿದ್ಧ ಹುಲಿಗಳಿಗೆ ಆಶ್ರಯ ನೀಡಿದೆ.

ರಣಥಂಬೋರ್ ಚಿರತೆಗಳು, ಕರಡಿಗಳು, ಕಾಡುಹಂದಿಗಳು, ಹೈನಾಗಳು, ಮೊಸಳೆಗಳು ಮತ್ತು 300 ಕ್ಕೂ ಹೆಚ್ಚು ಪ್ರಭೇದದ ಪಕ್ಷಿಗಳನ್ನು ಸಹ ಹೊಂದಿದೆ.

ಈ ರೀತಿಯ ಮುಖಾಮುಖಿಗಳು ಭಾರತದ ಕಾಡುಗಳು ಯಾವುದೇ ತೊಂದರೆಯಿಲ್ಲದೆ ಬಿಟ್ಟಾಗ ಏನನ್ನು ಮಾಡಬಹುದು ಎಂಬುದನ್ನು ನೆನಪಿಸುತ್ತವೆ ಎಂದು ಅರಣ್ಯ ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಸ್ತುತ ಕುನೊ ರಾಷ್ಟ್ರೀಯ ಉದ್ಯಾನವನವು, ವಯಸ್ಕ ಚೀತಾ ಮತ್ತು ಮರಿಗಳು ಸೇರಿದಂತೆ 54 ಚೀತಾಗಳಿಗೆ ನೆಲೆಯಾಗಿದೆ.