ಗಜಿಯಾಬಾದ್ ನ ಅಭಯ್ ಖಂಡ್ನ ಇಂದಿರಾಪುರಂ ಪ್ರದೇಶದಲ್ಲಿರುವ ಗೌರ್ ಗ್ರೀನ್ ಅವೆನ್ಯೂ ಅಪಾರ್ಟ್ಮೆಂಟ್ನಲ್ಲಿ ಇಂದು ಬುಧವಾರ ಬೆಳಗ್ಗೆ ಭಾರೀ ಅಗ್ನಿ ಅವಘಡ ಸಂಭವಿಸಿ ನಿವಾಸಿಗಳಲ್ಲಿ ಭೀತಿಯ ವಾತಾವರಣ ಉಂಟಾಯಿತು. ಒಂದು ಫ್ಲ್ಯಾಟ್ನಲ್ಲಿ ಆರಂಭವಾದ ಬೆಂಕಿ ಶೀಘ್ರವೇ ವ್ಯಾಪಿಸಿ ತೀವ್ರಗೊಂಡು, ದಟ್ಟ ಹೊಗೆ ಆಕಾಶದತ್ತ ದೂರದಿಂದಲೂ ಕಾಣಿಸುತ್ತಿತ್ತು.
ಒಂಬತ್ತನೇ ಮಹಡಿಯಲ್ಲಿ ಬೆಂಕಿ ಆರಂಭ
ಪ್ರಾಥಮಿಕ ಮಾಹಿತಿಯ ಪ್ರಕಾರ, ಒಂಬತ್ತನೇ ಮಹಡಿಯ ಫ್ಲ್ಯಾಟ್ನಲ್ಲಿ ಬೆಂಕಿ ಹೊತ್ತಿ ಉರಿಯಲಾರಂಭಿಸಿ ಮೇಲಿನ10ನೇ ಮಹಡಿಯವರೆಗೂ ವ್ಯಾಪಿಸಿದೆ. ಆರಂಭದಲ್ಲಿ ಒಂದೇ ಫ್ಲ್ಯಾಟ್ಗೆ ಸೀಮಿತವಾಗಿದ್ದ ಬೆಂಕಿ ನಂತರ ಕಟ್ಟಡದ ಹಲವು ಮನೆಗಳಿಗೆ ಹರಡಿದೆ. ಅಂದಾಜು ಪ್ರಕಾರ ಸುಮಾರು 10 ರಿಂದ 12 ಫ್ಲ್ಯಾಟ್ಗಳು ಗಂಭೀರವಾಗಿ ಹಾನಿಗೊಳಗಾಗಿವೆ. ಏರ್ಕಂಡೀಷನರ್ಗೆ ಸಂಬಂಧಿಸಿದ ವಿದ್ಯುತ್ ದೋಷವೇ ಈ ಅವಘಡಕ್ಕೆ ಕಾರಣವಾಗಿರಬಹುದು ಎಂದು ಅಧಿಕಾರಿಗಳು ಶಂಕಿಸುತ್ತಿದ್ದು, ನಿಖರ ಕಾರಣ ತನಿಖೆ ಬಳಿಕವೇ ಗೊತ್ತಾಗಲಿದೆ.
ಅಗ್ನಿಶಾಮಕ ದಳದ ತುರ್ತು ಕ್ರಮ
ಅಗ್ನಿ ಅವಘಡದ ಮಾಹಿತಿ ಸಿಕ್ಕ ತಕ್ಷಣವೇ ಹಲವಾರು ಅಗ್ನಿಶಾಮಕ ವಾಹನಗಳು ಸ್ಥಳಕ್ಕಾಗಮಿಸಿ ಬೆಂಕಿ ನಂದಿಸುವ ಕಾರ್ಯ ಆರಂಭಿಸಿವೆ. ಬೆಂಕಿ ಇನ್ನಷ್ಟು ವ್ಯಾಪಿಸದಂತೆ ತಡೆಯಲು ಇನ್ನೂ ಹಲವು ವಾಹನಗಳು ಕಾರ್ಯನಿರ್ವಹಿಸುತ್ತಿವೆ. ರಕ್ಷಣಾ ತಂಡಗಳು ಎಲ್ಲಾ ನಿವಾಸಿಗಳು ಸುರಕ್ಷಿತರಾಗಿರುವುದನ್ನು ಖಚಿತಪಡಿಸಿಕೊಳ್ಳುತ್ತಿದ್ದು, ಯಾರೂ ಒಳಗೆ ಸಿಲುಕಿಲ್ಲವೆಂಬುದನ್ನು ಪರಿಶೀಲಿಸುತ್ತಿವೆ.
ನಿವಾಸಿಗಳಲ್ಲಿ ಆತಂಕ, ತುರ್ತು ಸ್ಥಳಾಂತರ
ಹಠಾತ್ ಬೆಂಕಿ ವ್ಯಾಪಿಸಿದ ಕಾರಣ ಅಪಾರ್ಟ್ ಮೆಂಟ್ ವಾಸಿಗಳಲ್ಲಿ ತೀವ್ರ ಆತಂಕ ಉಂಟಾಗಿ, ನಿವಾಸಿಗಳು ತಮ್ಮ ಫ್ಲ್ಯಾಟ್ಗಳಿಂದ ಹೊರಗೆ ಧಾವಿಸಿದರು. ಹಲವರು ಸುರಕ್ಷತೆಗಾಗಿ ಆವರಣದ ತೆರೆದ ಜಾಗಗಳಲ್ಲಿ ಸೇರಿಕೊಂಡರು. ರೋಹಿತ್ ಎಂಬ ನಿವಾಸಿಯೊಬ್ಬರು ಸುಮಾರು ಡಜನ್ಗಟ್ಟಲೆ ಫ್ಲ್ಯಾಟ್ಗಳು ಬೆಂಕಿಗೆ ಆಹುತಿಯಾಗಿವೆ ಎಂದು ಹೇಳಿ, ವಿದ್ಯುತ್ ಸಮಸ್ಯೆಯೇ ಕಾರಣವಾಗಿರಬಹುದು ಎಂದು ಶಂಕಿಸಿದ್ದಾರೆ. ಆದರೆ ಸಂಪೂರ್ಣ ವಿವರಗಳು ಇನ್ನೂ ಸ್ಪಷ್ಟವಾಗಿಲ್ಲ.
ಈ ಘಟನೆ ಬಗ್ಗೆ ಮಾಹಿತಿ ಪಡೆದುಕೊಂಡ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ, ಪೊಲೀಸ್ ಆಯುಕ್ತರು ಮತ್ತು ಜಿಲ್ಲಾಧಿಕಾರಿಗಳಿಗೆ ತಕ್ಷಣ ಸ್ಥಳಕ್ಕಾಗಮಿಸಿ ರಕ್ಷಣಾ ಮತ್ತು ಪರಿಹಾರ ಕಾರ್ಯಗಳನ್ನು ಕೂಡಲೇ ಕೈಗೊಳ್ಳುವಂತೆ ಸೂಚಿಸಿದ್ದಾರೆ. ಸದ್ಯಕ್ಕೆ ಯಾವುದೇ ಸಾವು-ನೋವು ವರದಿಯಾಗಿಲ್ಲ, ಆದರೆ ಹಾನಿಯ ಸಂಪೂರ್ಣ ಪ್ರಮಾಣವನ್ನು ಮೌಲ್ಯಮಾಪನ ಮಾಡಲಾಗುತ್ತಿದೆ.
Advertisement
