ಶಿಮ್ಲಾ: ಹಿಮಾಚಲ ಪ್ರದೇಶದಲ್ಲಿ ಭಾರೀ ಮಳೆ ಮುಂದುವರೆದಿದ್ದು, ರಾಜ್ಯದ ಹಲವೆಡೆ ಭೂಕುಸಿತ ಹಾಗೂ ಹಠಾತ್ ಪ್ರವಾಹ ಉಂಟಾಗಿದೆ.
ಶಿಮ್ಲಾ ಹವಾಮಾನ ಇಲಾಖೆ ಶುಕ್ರವಾರ ರಾಜ್ಯದ ಕೆಲ ಪ್ರತ್ಯೇಕ ಪ್ರದೇಶಗಳಲ್ಲಿ ಆಗಸ್ಟ್ 6ರವರೆಗೆ ಭಾರೀ ಮಳೆಯಾಗುವ ಸಾಧ್ಯತೆ ಇರುವುದಾಗಿ ಯೆಲ್ಲೋ ಅಲರ್ಟ್ ಘೋಷಿಸಿದೆ.
ರಾಜ್ಯ ತುರ್ತು ಕಾರ್ಯಾಚರಣೆ ಕೇಂದ್ರದ (SEOC) ಮಾಹಿತಿ ಪ್ರಕಾರ, ಭಾರೀ ಮಳೆಯ ಪರಿಣಾಮ 31 ಕುಡಿಯುವ ನೀರು ಸರಬರಾಜು ಯೋಜನೆಗಳು ಮತ್ತು 19 ವಿದ್ಯುತ್ ಟ್ರಾನ್ಸ್ಫಾರ್ಮರ್ಗಳು ಕಾರ್ಯನಿರ್ವಹಣೆ ಸ್ಥಗಿತಗೊಂಡಿವೆ.
ಧರ್ಮಶಾಲಾದಲ್ಲಿ ದಾಖಲೆಯ ಮಳೆ
ಇನ್ನು ಕಳೆದ 24 ಗಂಟೆಗಳಲ್ಲಿ ಧರ್ಮಶಾಲಾದಲ್ಲಿ 149.2 ಮಿ.ಮೀ. ಮಳೆಯಾಗಿದ್ದು, ಭಾರೀ ಮಳೆಯ ಹಿನ್ನೆಲೆಯಲ್ಲಿ ರಾಜ್ಯದ ಹಲವೆಡೆ ಭೂಕುಸಿತ ಹಾಗೂ ಹಠಾತ್ ಪ್ರವಾಹ ಉಂಟಾಗಿದ್ದು, 122 ರಸ್ತೆಗಳು ಸಂಚಾರಕ್ಕೆ ಬಂದ್ ಆಗಿವೆ.
ಎಲ್ಲಿ ಎಷ್ಟು ಮಳೆ?
ಕಳೆದ 24 ಗಂಟೆಗಳಲ್ಲಿ ಹಿಮಾಚಲ ಪ್ರದೇಶದಲ್ಲಿ ವ್ಯಾಪಕ ಮಳೆಯಾಗಿದ್ದು, ಧರ್ಮಶಾಲಾದಲ್ಲಿ ದಾಖಲೆಯ 149.2 ಮಿ.ಮೀ. ಮಳೆಯಾಗಿದೆ. ಉಳಿದಂತೆ ಜೋಟ್ – 76.8 ಮಿ.ಮೀ, ಭಟ್ಟಿಯಾತ್ – 75.3 ಮಿ.ಮೀ, ಗೋಹರ್ – 60 ಮಿ.ಮೀ, ನಿಚಾರ್ – 52 ಮಿ.ಮೀ, ಸರಹಾನ್ – 39 ಮಿ.ಮೀ, ಪಾಲಂಪುರ – 38 ಮಿ.ಮೀ, ಕೋಠಿ – 34.8 ಮಿ.ಮೀ ಮತ್ತು ಶಿಮ್ಲಾದಲ್ಲಿ 34 ಮಿ.ಮೀ. ಮಳೆಯಾಗಿದೆ.
ಮಂಡಿ ಜಿಲ್ಲೆಗೆ ಹೆಚ್ಚು ಹೊಡೆತ: 122 ರಸ್ತೆ ಬಂದ್
ಇನ್ನು ಬಿಜೆಪಿ ಸಂಸದೆ ಕಂಗನಾ ರಣಾವತ್ ಪ್ರತಿನಿಧಿಸುತ್ತಿರುವ ಮಂಡಿ ಜಿಲ್ಲೆ ಕೂಡ ಮಳೆಯಿಂದಾಗಿ ವ್ಯಾಪಕ ಹೊಡೆತ ತಿಂದಿದೆ. ಭಾರೀ ಮಳೆಯಿಂದ ಮಂಡಿ ಜಿಲ್ಲೆ ಅತ್ಯಂತ ಹೆಚ್ಚು ಹಾನಿಗೊಳಗಾಗಿದ್ದು, ಅಲ್ಲಿ 54 ರಸ್ತೆಗಳು ಬಂದ್ ಆಗಿವೆ. ಇದರ ನಂತರ ಕುಲ್ಲು ಜಿಲ್ಲೆಯಲ್ಲಿ 41, ಚಂಬಾದಲ್ಲಿ 8, ಶಿಮ್ಲಾದಲ್ಲಿ 7, ಕಾಂಗ್ರಾ ಮತ್ತು ಸಿರ್ಮೌರ್ ಜಿಲ್ಲೆಗಳಲ್ಲಿ ತಲಾ 5, ಹಾಗೂ ಊನಾ ಜಿಲ್ಲೆಯಲ್ಲಿ 2 ರಸ್ತೆಗಳು ಸಂಚಾರಕ್ಕೆ ಬಂದ್ ಆಗಿವೆ.
ಆಗಸ್ಟ್ 6ರವರೆಗೆ ಯೆಲ್ಲೋ ಅಲರ್ಟ್
ಇದೇ ವೇಳೆ, ಕಾಂಗ್ರಾ ಹಾಗೂ ಸುಂದರನಗರ ಪ್ರದೇಶಗಳಲ್ಲಿ ಗುಡುಗು-ಮಿಂಚು ಸಹಿತ ಮಳೆಯೂ ಸುರಿದಿದ್ದು, ಸ್ಥಳೀಯ ಆಡಳಿತ ಸಾರ್ವಜನಿಕರು ಅಗತ್ಯ ಮುನ್ನೆಚ್ಚರಿಕೆ ವಹಿಸುವಂತೆ ಸೂಚಿಸಿದೆ.
ಹವಾಮಾನ ಇಲಾಖೆ ಮುಂದಿನ ಕೆಲವು ದಿನಗಳ ಕಾಲ ರಾಜ್ಯದ ಹಲವೆಡೆ ಭಾರೀ ಮಳೆಯ ಸಾಧ್ಯತೆ ಇರುವುದರಿಂದ ಭೂಕುಸಿತ, ಹಠಾತ್ ಪ್ರವಾಹ ಹಾಗೂ ಸಂಚಾರ ಅಡಚಣೆ ಸಂಭವಿಸುವ ಸಾಧ್ಯತೆ ಇದೆ ಎಂದು ಎಚ್ಚರಿಕೆ ನೀಡಿದೆ.
ಅಲ್ಲದೆ ಆಗಸ್ಟ್ 6ರವರೆಗೆ ಯೆಲ್ಲೋ ಅಲರ್ಟ್ ಘೋಷಣೆ ಮಾಡಿದೆ.
