ಪಾಟ್ನಾ (ಬಿಹಾರ): ಚುನಾವಣೆಗೂ ಮುನ್ನ ಎಲ್ಲರಿಗೂ ಉಚಿತ ವಿದ್ಯುತ್ ಎಂದು ಘೋಷಿಸುವ ರಾಜಕೀಯ ಪಕ್ಷಗಳು ಅಧಿಕಾರಕ್ಕೆ ಬಂದ ಮೇಲೆ ಯೋಜನೆ ಜಾರಿ ಮಾಡಿ, ನಂತರ ಅದಕ್ಕೆ ಹಣ ಜೋಡಿಸಲು ತೀವ್ರ ಕಷ್ಟ ಪಡುತ್ತವೆ. ಅದಕ್ಕೆ ಬಿಹಾರದ ಈ ಉದಾಹರಣೆಯೇ ಸಾಕ್ಷಿ. ಹೌದು, ಬಿಹಾರದಲ್ಲಿ ಆರ್ಥಿಕವಾಗಿ ಸದೃಢರಾಗಿರುವವರು ಮತ್ತು ಆದಾಯ ತೆರಿಗೆ ಪಾವತಿದಾರರು ತಮಗೆ ಸಿಗುತ್ತಿರುವ 125 ಯೂನಿಟ್‌ಗಳ ಉಚಿತ ವಿದ್ಯುತ್ ಸೌಲಭ್ಯವನ್ನು ಸ್ವಯಂಪ್ರೇರಿತರಾಗಿ ತ್ಯಜಿಸಬೇಕು ಎಂದು ಬಿಹಾರ ಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ ಅವರು ಮನವಿ ಮಾಡಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಸಬ್ಸಿಡಿಯನ್ನು ಸರ್ಕಾರಕ್ಕೆ ಮರಳಿ ನೀಡಿದರೆ...
ಪಾಟ್ನಾದಲ್ಲಿ ನಡೆದ ಎರಡು ದಿನಗಳ ಪಾಟಲಿಪುತ್ರ ರಾಷ್ಟ್ರೀಯ ಯುವ ಸಂಸತ್ತು-2.0 ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಬಿಹಾರ ಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ, ಪ್ರಸ್ತುತ ಬಿಹಾರದಲ್ಲಿ ಆರ್ಥಿಕ ತಾರತಮ್ಯವಿಲ್ಲದೆ ಎಲ್ಲಾ ವರ್ಗಗಳ ಗ್ರಾಹಕರಿಗೂ ಪ್ರತಿ ತಿಂಗಳು 125 ಯೂನಿಟ್‌ಗಳವರೆಗೆ ಉಚಿತ ವಿದ್ಯುತ್ ನೀಡಲಾಗುತ್ತಿದೆ. ಆದರೆ, ಆರ್ಥಿಕವಾಗಿ ಸದೃಢರಾಗಿರುವವರು ಮತ್ತು ತೆರಿಗೆ ಪಾವತಿದಾರರು ತಮಗಾಗಿ ನಿಗದಿಪಡಿಸಿರುವ ಈ ಸಬ್ಸಿಡಿಯನ್ನು ಸರ್ಕಾರಕ್ಕೆ ಮರಳಿ ನೀಡಿದರೆ, ಆ ಹಣವನ್ನು ರಾಜ್ಯದ ಇತರ ಮೂಲಸೌಕರ್ಯ ಮತ್ತು ಯುವಕರ ಅಭಿವೃದ್ಧಿಗೆ ಬಳಸಬಹುದು. ಈ ಮೂಲಕ ರಾಜ್ಯದ ಅಭಿವೃದ್ಧಿಗೆ ಕೊಡುಗೆ ನೀಡಬೇಕು ಎಂದು ಕೋರಿದ್ದಾರೆ.
ಕೋಟಿಗಟ್ಟಲೆ ಸಬ್ಸಿಡಿ ಹೊರೆ2025ರ ಬಿಹಾರ ವಿಧಾನಸಭಾ ಚುನಾವಣೆಗೂ ಮುನ್ನ ಅಂದಿನ ಮುಖ್ಯಮಂತ್ರಿ ನಿತೀಶ್ ಕುಮಾರ್ ನೇತೃತ್ವದ ಜೆಡಿಯು-ಬಿಜೆಪಿ ಸರ್ಕಾರವು ಯಾವುದೇ ಆರ್ಥಿಕ ತಾರತಮ್ಯವಿಲ್ಲದೆ ರಾಜ್ಯದ ಎಲ್ಲಾ ಗೃಹ ಬಳಕೆದಾರರಿಗೂ ತಿಂಗಳಿಗೆ 125 ಯೂನಿಟ್ ಉಚಿತ ವಿದ್ಯುತ್ ನೀಡುವ ಯೋಜನೆಯನ್ನು ಜಾರಿಗೆ ತಂದಿತ್ತು. ಆದರೆ, ಸದ್ಯ ಸರ್ಕಾರವು ಈ ವಿದ್ಯುತ್ ಸಬ್ಸಿಡಿಗಾಗಿ ವಾರ್ಷಿಕವಾಗಿ ಬರೋಬ್ಬರಿ ₹23,000 ಕೋಟಿ ರೂಪಾಯಿ ಖರ್ಚು ಮಾಡುತ್ತಿದೆ. ಅಂದರೆ ಪ್ರತಿ ಕುಟುಂಬಕ್ಕೆ ಸರಾಸರಿ ವರ್ಷಕ್ಕೆ ₹8,000 ರಿಂದ ₹10,000 ರಷ್ಟು ಸಬ್ಸಿಡಿ ವೆಚ್ಚವಾಗುತ್ತಿದೆ.
ಒಟ್ಟಾರೆಯಾಗಿ, ಕೇಂದ್ರ ಸರ್ಕಾರದ LPG ಸಬ್ಸಿಡಿ ಬಿಟ್ಟುಕೊಡಿ ಅಭಿಯಾನದ ಮಾದರಿಯಲ್ಲೇ, ಈಗ ಬಿಹಾರದಲ್ಲೂ ಉಚಿತ ವಿದ್ಯುತ್ ಸೌಲಭ್ಯವನ್ನು ಬಿಟ್ಟುಕೊಡುವಂತೆ ಶ್ರೀಮಂತ ವರ್ಗಕ್ಕೆ ಮನವಿ ಮಾಡಿರುವುದು ಹೊಸ ಚರ್ಚೆಗೆ ಕಾರಣವಾಗಿದೆ.
