ಭೋಪಾಲ್: ಚಿರತೆ ಎಂದು ತಪ್ಪಾಗಿ ಭಾವಿಸಿ ಬೇಟೆಗಾರರು ಗುಂಡು ಹಾರಿಸಿದ ಪರಿಣಾಮ ಕುನೋ ರಾಷ್ಟ್ರೀಯ ಉದ್ಯಾನದಲ್ಲಿ ಜನಿಸಿದ್ದ 19 ತಿಂಗಳ ಗಂಡು ಚೀತಾ ಮೃತಪಟ್ಟ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರು ಸಹೋದರರನ್ನು ಮಧ್ಯಪ್ರದೇಶದ ವಿಶೇಷ ಕಾರ್ಯಪಡೆ (ಎಸ್‌ಟಿಎಫ್) ಬಂಧಿಸಿದೆ.
ಅಲ್ಲದೆ, ಚೀತಾ ಹತ್ಯೆಗೆ ಬಳಸಲಾಗಿದೆ ಎನ್ನಲಾದ ಹಳೆಯ ಕಾಲದ ಎರಡು ನಳಿಕೆಗಳ ಬಂದೂಕನ್ನೂ ವಶಪಡಿಸಿಕೊಂಡಿದೆ. ಬೇಟೆಯ ವೇಳೆ ಚೀತಾ ಕೇವಲ 12ರಿಂದ 15 ಅಡಿ ದೂರದಲ್ಲಿದ್ದಾಗ ಆರೋಪಿಗಳಲ್ಲೊಬ್ಬ ಗುಂಡು ಹಾರಿಸಿದ್ದಾನೆ ಎಂಬುದು ತನಿಖೆಯಿಂದ ತಿಳಿದುಬಂದಿದೆ.
ಬಂಧಿತರನ್ನು ಮಧ್ಯಪ್ರದೇಶದ ಮೊರೆನಾ ಜಿಲ್ಲೆಯ ಪಹಾರ್‌ಗಢ್ ತಾಲ್ಲೂಕಿನ ನವಲ್‌ಪುರ-ಬೆಹರಾರಾ ಗ್ರಾಮದ ಭಗವಾನ್ ಸಿಂಗ್ ಮತ್ತು ಆತನ ಸಹೋದರ ಪ್ರೀತಮ್ ಸಿಂಗ್ ಎಂದು ಗುರುತಿಸಲಾಗಿದೆ. ರಾಜ್ಯ ಪೊಲೀಸ್ ವಿಶೇಷ ಕಾರ್ಯಪಡೆ ಹಾಗೂ ಅರಣ್ಯ ಇಲಾಖೆಯ ವಿಶೇಷ ಹುಲಿ ದಾಳಿ ತಡೆ ಪಡೆ (ಎಸ್‌ಟಿಎಸ್‌ಎಫ್) ಜಂಟಿಯಾಗಿ ಕಾರ್ಯಾಚರಣೆ ನಡೆಸಿ ಇಬ್ಬರನ್ನು ಬಂಧಿಸಿವೆ. ಬಂಧಿತರು ಅಲೆಮಾರಿ ಮಂಗಿಯಾ ಸಮುದಾಯಕ್ಕೆ ಸೇರಿದವರು ಎಂದು ಮೂಲಗಳು ತಿಳಿಸಿವೆ.
ಅಕ್ಟೋಬರ್ 24ರಂದು ಶಿಯೋಪುರ ಜಿಲ್ಲೆಯ ವಿಜಯಪುರ ಪ್ರದೇಶದ ನಿತನ್‌ವಾಸ್ ಗ್ರಾಮದ ಸಮೀಪ ಇಬ್ಬರೂ ಬೇಟೆಗೆ ತೆರಳಿದ್ದರು. ಕಾಡುಹಂದಿಯನ್ನು ಬೇಟೆಯಾಡಲು ಕಾಯುತ್ತಿದ್ದಾಗ ಇದ್ದಕ್ಕಿದ್ದಂತೆ 12ರಿಂದ 15 ಅಡಿ ದೂರದಲ್ಲಿ ಚೀತಾ ಕಾಣಿಸಿಕೊಂಡಿದೆ ಎಂದು ವಿಚಾರಣೆ ವೇಳೆ ಭಗವಾನ್ ಸಿಂಗ್ ಹೇಳಿದ್ದಾನೆ ಎನ್ನಲಾಗಿದೆ.
ಚಿರತೆ ಎಂದು ಭಾವಿಸಿದ್ದ ಬೇಟೆಗಾರರು
ಆದರೆ, ಚೀತಾವನ್ನು ಚಿರತೆ ಎಂದು ತಪ್ಪಾಗಿ ಭಾವಿಸಿದ ಆತ, ಹಳೆಯ ಕಾಲದ ಮುಂಭಾಗದಿಂದ ಗುಂಡು ತುಂಬುವ ಎರಡು ನಳಿಕೆಗಳ ಬಂದೂಕಿನಿಂದ ಗುಂಡು ಹಾರಿಸಿದ್ದಾನೆ. ಬಳಿಕ ಸ್ಥಳದಿಂದ ಪರಾರಿಯಾಗಿದ್ದಾನೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.
ಗುಂಡಿನ ದಾಳಿಗೆ ಬಲಿಯಾದ ಚೀತಾ ಕೆಎನ್‌ಜಿ-22. ಕುನೋ ರಾಷ್ಟ್ರೀಯ ಉದ್ಯಾನದಲ್ಲಿ ಜನಿಸಿದ್ದ ಈ ಗಂಡು ಚೀತಾಗೆ ರೇಡಿಯೋ ಕಾಲರ್ ಅಳವಡಿಸಲಾಗಿತ್ತು. ಗುಂಡಿನ ದಾಳಿಯಿಂದ ಶ್ವಾಸಕೋಶ ಛಿದ್ರಗೊಂಡ ಪರಿಣಾಮ ಕೆಲವೇ ಗಂಟೆಗಳಲ್ಲಿ ಅದರ ಆರೋಗ್ಯ ಸ್ಥಿತಿ ಗಂಭೀರವಾಗಿತ್ತು.
ಚಿಕಿತ್ಸೆ ಫಲಕಾರಿಯಾಗದೆ ಅಕ್ಟೋಬರ್ 27ರಂದು ಮೃತಪಟ್ಟಿತ್ತು. ಪ್ರಾಜೆಕ್ಟ್ ಚೀತಾ ಯೋಜನೆ 2022ರ ಸೆಪ್ಟೆಂಬರ್‌ನಲ್ಲಿ ಆರಂಭವಾದ ಬಳಿಕ ಚೀತಾವೊಂದು ಗುಂಡಿನ ದಾಳಿಗೆ ಬಲಿಯಾದ ಮೊದಲ ಪ್ರಕರಣ ಇದಾಗಿದೆ. ಪ್ರಕರಣದ ತನಿಖೆಗಾಗಿ ರಾಜ್ಯ ಸರ್ಕಾರ ಅರಣ್ಯ ಮತ್ತು ಪೊಲೀಸ್ ಅಧಿಕಾರಿಗಳನ್ನು ಒಳಗೊಂಡ ನಾಲ್ವರು ಸದಸ್ಯರ ವಿಶೇಷ ಕಾರ್ಯಪಡೆಯನ್ನು ರಚಿಸಿತ್ತು.
ಅಕ್ಟೋಬರ್ 31ರಂದು ಭಗವಾನ್ ಸಿಂಗ್‌ನನ್ನು ಬಂಧಿಸಲಾಗಿತ್ತು. ಆತನ ವಿಚಾರಣೆ ವೇಳೆ ದೊರೆತ ಮಾಹಿತಿ ಆಧರಿಸಿ ಸಹೋದರ ಪ್ರೀತಮ್ ಸಿಂಗ್‌ನನ್ನು ಮಧ್ಯಪ್ರದೇಶದ ಹೊರಭಾಗದಲ್ಲಿ ಪತ್ತೆಹಚ್ಚಿ ವಶಕ್ಕೆ ಪಡೆಯಲಾಗಿದೆ. ಬಳಿಕ ಇಬ್ಬರನ್ನೂ ಶಂಕಿತ ಅಪರಾಧ ನಡೆದ ಸ್ಥಳಕ್ಕೆ ಕರೆದೊಯ್ದು ಘಟನೆಯ ಮರುಸೃಷ್ಟಿ ಮಾಡಲಾಗಿದೆ.
ಆರೋಪಿಗಳು ನೀಡಿದ ಮಾಹಿತಿಯ ಆಧಾರದ ಮೇಲೆ ಮೊರೆನಾ ಅರಣ್ಯ ವಿಭಾಗದ ವ್ಯಾಪ್ತಿಯಲ್ಲಿ ಬಂದೂಕನ್ನು ವಶಪಡಿಸಿಕೊಳ್ಳಲಾಗಿದೆ. ಇದೀಗ ಬಂದೂಕಿನ ವಿಧಿವಿಜ್ಞಾನ ಮತ್ತು ಬ್ಯಾಲಿಸ್ಟಿಕ್ ಪರೀಕ್ಷೆ ನಡೆಸಲಾಗುತ್ತದೆ. ಚೀತಾದ ದೇಹದಲ್ಲಿ ಪತ್ತೆಯಾದ ಗುಂಡುಗಳು ಇದೇ ಬಂದೂಕಿನಿಂದ ಹಾರಿಸಲಾಗಿದೆಯೇ ಎಂಬುದನ್ನು ಪರೀಕ್ಷೆಯ ಮೂಲಕ ಖಚಿತಪಡಿಸಿಕೊಳ್ಳಬೇಕಿದೆ.
ಹಳೆಯ ಬಂದೂಕಿನಿಂದ ಗುಂಡಿನ ದಾಳಿ
ವಶಪಡಿಸಿಕೊಂಡಿರುವ ಬಂದೂಕು ಹಳೆಯ ಕಾಲದ, ಮುಂಭಾಗದಿಂದ ಗುಂಡು ತುಂಬುವ ಎರಡು ನಳಿಕೆಗಳ ಮಸ್ಕೆಟ್ ಮಾದರಿಯ ಬಂದೂಕಾಗಿದೆ. ಆಧುನಿಕ ಬಂದೂಕುಗಳಂತೆ ಹಿಂಭಾಗದಿಂದ ಕಾರ್ಟ್ರಿಡ್ಜ್ ತುಂಬುವ ವ್ಯವಸ್ಥೆ ಇದರಲ್ಲಿ ಇರುವುದಿಲ್ಲ. ಈ ಬಂದೂಕಿನ ಪ್ರತಿ ನಳಿಕೆಯಲ್ಲೂ ಪ್ರತ್ಯೇಕವಾಗಿ ಗನ್‌ಪೌಡರ್ ಮತ್ತು ಗುಂಡುಗಳನ್ನು ತುಂಬಬೇಕಾಗುತ್ತದೆ.
ಗುಂಡುಗಳನ್ನು ಸರಿಯಾದ ಸ್ಥಾನದಲ್ಲಿ ಇರಿಸಲು ವಾಡ್ ಎಂಬ ವಸ್ತುವನ್ನು ಬಳಸಲಾಗುತ್ತದೆ. ಟ್ರಿಗರ್ ವ್ಯವಸ್ಥೆಗೆ ಜೋಡಿಸಲಾದ ಪರ್ಕಷನ್ ಕ್ಯಾಪ್‌ಗೆ ಹ್ಯಾಮರ್ ಹೊಡೆದಾಗ ಬೆಂಕಿ ಉತ್ಪತ್ತಿಯಾಗಿ ಗನ್‌ಪೌಡರ್ ಸ್ಫೋಟಗೊಳ್ಳುತ್ತದೆ. ಬಳಸುವ ಮದ್ದುಗುಂಡಿನ ಆಧಾರದ ಮೇಲೆ ಒಂದೇ ಗುಂಡು ಅಥವಾ ಹಲವು ಲೋಹದ ಚೂರುಗಳು ಹೊರಬರುತ್ತವೆ ಎಂದು ಅಧಿಕಾರಿಗಳು ವಿವರಿಸಿದ್ದಾರೆ.
2 ನಳಿಕೆಗಳಿಗೂ ಪ್ರತ್ಯೇಕ ಫೈರಿಂಗ್ ವ್ಯವಸ್ಥೆಯಿದ್ದು, ಅವುಗಳನ್ನು ಸ್ವತಂತ್ರವಾಗಿ ಬಳಸಬಹುದು. ಚೀತಾ ದೇಹದಲ್ಲಿ ಹಲವು ಲೋಹದ ಗುಂಡುಗಳು ಪತ್ತೆಯಾಗಿರುವುದು, ಹತ್ತಿರದಿಂದ ಗುಂಡು ಹಾರಿಸಲಾಗಿದೆ ಎಂಬ ಅಂಶ ತನಿಖೆಯಲ್ಲಿ ಮಹತ್ವ ಪಡೆದುಕೊಂಡಿದೆ.
ತಜ್ಞರು ಬಂದೂಕಿನ ನಳಿಕೆಗಳು, ಗುಂಡು ಹಾರಿಸುವ ವ್ಯವಸ್ಥೆ ಹಾಗೂ ಬಳಸಿದ ಮದ್ದುಗುಂಡುಗಳ ಗುಣಲಕ್ಷಣಗಳನ್ನು ವೈದ್ಯಕೀಯ ಮತ್ತು ವಿಧಿವಿಜ್ಞಾನ ವರದಿಗಳೊಂದಿಗೆ ಹೋಲಿಕೆ ಮಾಡಲಿದ್ದಾರೆ. ಈ ಪರೀಕ್ಷೆಯ ಬಳಿಕವೇ ಚೀತಾ ಸಾವಿಗೂ ವಶಪಡಿಸಿಕೊಂಡ ಬಂದೂಕಿಗೂ ಇರುವ ನೇರ ಸಂಬಂಧ ದೃಢಪಡಲಿದೆ.
