ದೀದಿ ನನಗೆ ಮೋಸ ಮಾಡಿದಳು, ದಾದಾನೇ ನನ್ನ ರಕ್ಷಕ: ಸುವೇಂದು ಅಧಿಕಾರಿ ಭೇಟಿ ಬಳಿಕ ಅಕ್ಕ ಮಮತಾ ಬ್ಯಾನರ್ಜಿ ವಿರುದ್ಧ ಬಾಬುನ್ ಬ್ಯಾನರ್ಜಿ ಕಿಡಿ

ಕೋಲ್ಕತ್ತಾ (ಪಶ್ಚಿಮ ಬಂಗಾಳ): ಪಶ್ಚಿಮ ಬಂಗಾಳದ ರಾಜಕಾರಣದಲ್ಲಿ ಭಾರಿ ಸಂಚಲನ ಮೂಡಿಸಿರುವ ಘಟನೆಯೊಂದರಲ್ಲಿ, ಮಾಜಿ ಮುಖ್ಯಮಂತ್ರಿ ಹಾಗೂ ಟಿಎಂಸಿ ವರಿಷ್ಠೆ ಮಮತಾ ಬ್ಯಾನರ್ಜಿ ಅವರ ಕಿರಿಯ ಸಹೋದರ ಬಾಬುನ್ ಬ್ಯಾನರ್ಜಿ ಅವರು ಹಾಲಿ ಮುಖ್ಯಮಂತ್ರಿ ಹಾಗೂ ಬಿಜೆಪಿ ನಾಯಕ ಸುವೇಂದು ಅಧಿಕಾರಿ ಅವರನ್ನು ಭೇಟಿಯಾಗಿ ತಮ್ಮದೇ ಅಕ್ಕನ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:

ಅಕ್ಕನ ವಿರುದ್ಧ ದ್ರೋಹದ ಆರೋಪ

ಕೋಲ್ಕತ್ತಾದ ಕಾಳಿಘಾಟ್‌ನಲ್ಲಿ ಬಾಬುನ್ ಬ್ಯಾನರ್ಜಿ ನೇತೃತ್ವದ ಕ್ಲಬ್ ಆಯೋಜಿಸಿದ್ದ ಕಾಳಿ ಪೂಜಾ ಕಾರ್ಯಕ್ರಮಕ್ಕೆ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಭೇಟಿ ನೀಡಿದ್ದರು. ಈ ವೇಳೆ ಸುವೇಂದು ಅವರ ಕಾಲು ಮುಟ್ಟಿ ಆಶೀರ್ವಾದ ಪಡೆದ ಬಾಬುನ್, ಮಾಧ್ಯಮಗಳ ಮುಂದೆ ಮಮತಾ ಬ್ಯಾನರ್ಜಿ ಹಾಗೂ ತೃಣಮೂಲ ಕಾಂಗ್ರೆಸ್ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ಮಾಧ್ಯಮಗಳೊಂದಿಗೆ ಮಾತನಾಡಿದ ಬಾಬುನ್ ಬ್ಯಾನರ್ಜಿ, "ಮಮತಾ ಬ್ಯಾನರ್ಜಿ ಅವರು ನನಗೆ ಎಂದಿಗೂ ಅಕ್ಕನ ಪ್ರೀತಿಯನ್ನು ತೋರಿಸಿಲ್ಲ. ಅವರು ಮೊದಲಿನಿಂದಲೂ ನನಗೆ ದ್ರೋಹ ಮಾಡುತ್ತಲೇ ಬಂದಿದ್ದಾರೆ. ಕಳೆದ ಕೆಲವು ವರ್ಷಗಳಿಂದ ಅವರು ನನಗೆ 'ಭಾಯಿ ಫೋಟಾ' (ಭಗಿನಿ ಹಬ್ಬ) ಹಬ್ಬಕ್ಕೂ ಆಹ್ವಾನಿಸಿಲ್ಲ, ಇನ್ನು ಮುಂದೆ ಕರೆದರೂ ನಾನು ಹೋಗುವುದಿಲ್ಲ" ಎಂದು ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.

ಸುವೇಂದು ಅಧಿಕಾರಿ ಅವರೇ ನನ್ನ ಪಾಲಿನ ರಕ್ಷಕ

ಸುವೇಂದು ಅಧಿಕಾರಿ ಅವರನ್ನು ತಮ್ಮ ನಾಯಕ ಮತ್ತು ಪೋಷಕ ಎಂದು ಕರೆದಿರುವ ಬಾಬುನ್, "ಸುವೇಂದು ಅವರು ನುಡಿದಂತೆ ನಡೆಯುವ ವ್ಯಕ್ತಿ. ಪಶ್ಚಿಮ ಬಂಗಾಳದ ಹಿತದೃಷ್ಟಿಯಿಂದ ಅವರು ಮತ್ತೊಮ್ಮೆ ಮುಖ್ಯಮಂತ್ರಿಯಾಗಬೇಕು ಎಂದು ನಾನು ಬಯಸುತ್ತೇನೆ. ನಾನು ಜೀವನಪರ್ಯಂತ ಅವರೊಂದಿಗೇ ಇರುತ್ತೇನೆ" ಎಂದು ಬಹಿರಂಗ ಬೆಂಬಲ ಘೋಷಿಸಿದ್ದಾರೆ. ಇದೇ ವೇಳೆ, ಟಿಎಂಸಿ ನಾಯಕರು ಸುವೇಂದು ಅಧಿಕಾರಿ ಅವರನ್ನು 'ಗದ್ದಾರ್' (ದ್ರೋಹಿ) ಎಂದು ಕರೆಯುವ ಕುರಿತು ಉತ್ತರಿಸಿದ ಬಾಬುನ್, "ಸುವೇಂದು ದ್ರೋಹಿಯಲ್ಲ, ನಿಜವಾದ ದ್ರೋಹಿ ಎಂದರೆ ಅದು ಅಭಿಷೇಕ್ ಬ್ಯಾನರ್ಜಿ" ಎಂದು ನೇರವಾಗಿ ಕಿಡಿಕಾರಿದ್ದಾರೆ.

ಮುಂದುವರೆದು, ಈ ಭೇಟಿಯ ಕುರಿತು ಪ್ರತಿಕ್ರಿಯಿಸಿರುವ ಟಿಎಂಸಿ ನಾಯಕ ಕುನಾಲ್ ಘೋಷ್, "ಮಮತಾ ಬ್ಯಾನರ್ಜಿ ಅವರು ಬಾಬುನ್‌ನನ್ನು ಬಹಳ ಹಿಂದೆಯೇ ಕುಟುಂಬದಿಂದ ಹೊರಹಾಕಿದ್ದಾರೆ. ಪಕ್ಷದಲ್ಲೂ ಆತನಿಗೆ ಯಾವುದೇ ಸ್ಥಾನವಿಲ್ಲ. ಮಮತಾ ಅವರ ಹೆಸರನ್ನು ಬಳಸಿಕೊಂಡು ರಾಜಕೀಯ ಮನ್ನಣೆ ಪಡೆಯಲು ಆತ ಯತ್ನಿಸುತ್ತಿದ್ದಾನೆ" ಎಂದು ಲೇವಡಿ ಮಾಡಿದ್ದಾರೆ.

ಹಾಗಾದ್ರೆ, ಅಕ್ಕ-ತಮ್ಮ ಬೇರೆಯಾಗಲು ಕಾರಣವೇನು?

2024ರ ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿ ಹೂಗ್ಲಿ ಕ್ಷೇತ್ರದಿಂದ ಸ್ಪರ್ಧಿಸಲು ಬಾಬುನ್ ಆಕಾಂಕ್ಷಿಯಾಗಿದ್ದರೂ, ಮಮತಾ ಬ್ಯಾನರ್ಜಿ ಅವರು ಮಾಜಿ ಫುಟ್‌ಬಾಲ್ ಆಟಗಾರ ಪ್ರಸೂನ್ ಬ್ಯಾನರ್ಜಿ ಅವರಿಗೆ ಟಿಕೆಟ್ ನೀಡಿದ್ದರು. ಇದರಿಂದ ಅಸಮಾಧಾನಗೊಂಡಿದ್ದ ಬಾಬುನ್ ಬಂಡಾಯ ಎದ್ದಾಗ, ಮಮತಾ ಬ್ಯಾನರ್ಜಿ ಅವರು ಸಾರ್ವಜನಿಕವಾಗಿಯೇ ಬಾಬುನ್ ಜೊತೆಗಿನ ಎಲ್ಲಾ ಕೌಟುಂಬಿಕ ಸಂಬಂಧಗಳನ್ನು ಕಡಿದುಕೊಳ್ಳುವುದಾಗಿ ಪ್ರಕಟಿಸಿದ್ದರು. ಇದಾದ ಬಳಿಕ ಬಾಬುನ್ ಅವರನ್ನು ಹಾಕಿ ಬೆಂಗಾಲ್, ಟೇಬಲ್ ಟೆನಿಸ್ ಸೇರಿದಂತೆ ವಿವಿಧ ಕ್ರೀಡಾ ಸಂಸ್ಥೆಗಳ ಅಧ್ಯಕ್ಷ ಸ್ಥಾನಗಳಿಂದಲೂ ಕೆಳಗಿಳಿಸಲಾಗಿತ್ತು.