ಗೋರಖ್ಪುರ (ಉತ್ತರ ಪ್ರದೇಶ): 2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆ ಘೋಷಣೆಗೂ ಮುನ್ನವೇ ರಣಾಂಗಣ ರಂಗೇರಿದ್ದು, ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಅವರಿಗೆ ಅಯೋಧ್ಯೆ ಕ್ಷೇತ್ರದಿಂದ ತಮ್ಮ ವಿರುದ್ಧ ನೇರ ಚುನಾವಣೆಗೆ ಸ್ಪರ್ಧಿಸುವಂತೆ ಬಹಿರಂಗ ಸವಾಲು ಹಾಕಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಯೋಗಿ ಆದಿತ್ಯನಾಥ್ ಅವರ ನೇರ ಸವಾಲು
ತಮ್ಮ ತವರು ಕ್ಷೇತ್ರ ಗೋರಖ್ಪುರದ ಕ್ಯಾಂಪಿಯರ್ಗಂಜ್ನಲ್ಲಿ ಆಯೋಜಿಸಲಾಗಿದ್ದ ಸಾರ್ವಜನಿಕ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಯೋಗಿ ಆದಿತ್ಯನಾಥ್, "ನೀವು ಶ್ರೀ ಅಯೋಧ್ಯಾ ಧಾಮ ಕ್ಷೇತ್ರದಿಂದ ನಾಮಪತ್ರ ಸಲ್ಲಿಸಿದರೆ, ನಾನೂ ಅಲ್ಲಿಂದಲೇ ನಾಮಪತ್ರ ಸಲ್ಲಿಸುತ್ತೇನೆ. ಧೈರ್ಯವಿದ್ದರೆ ನೇರವಾಗಿ ಮುಖಾಮುಖಿ ಸ್ಪರ್ಧೆ ನಡೆಯಲಿ, ಒಮ್ಮೆ ಅದೃಷ್ಟ ಪರೀಕ್ಷೆ ಮಾಡೋಣ" ಎಂದು ಯೋಗಿ ಆದಿತ್ಯನಾಥ್ ಪಂಥಾಹ್ವಾನ ನೀಡಿದ್ದಾರೆ. ಇದರೊಂದಿಗೆ, ಅಖಿಲೇಶ್ ಯಾದವ್ ಅವರಿಗೆ ತಮ್ಮನ್ನು ನೇರವಾಗಿ ಎದುರಿಸುವ ಧೈರ್ಯವಿಲ್ಲ ಎಂದು ಆರೋಪಿಸಿದ ಯೋಗಿ, "ದುರ್ಬಲರು ಎಂದಿಗೂ ಮುಖಾಮುಖಿಯಾಗಿ ಹೋರಾಡುವುದಿಲ್ಲ, ಅವರು ಹಿಂದಿನಿಂದ ದಾಳಿ ಮಾಡುತ್ತಾರೆ" ಎಂದು ಟೀಕಿಸಿದ್ದಾರೆ.
ಏತನ್ಮಧ್ಯೆ, ಯೋಗಿ ಆದಿತ್ಯನಾಥ್ ಅವರ ಈ ಹೇಳಿಕೆಗೆ ಒಂದು ದಿನ ಮೊದಲು, ಅಖಿಲೇಶ್ ಯಾದವ್ ಅವರು ಗೋರಖ್ಪುರದಲ್ಲಿ 20 ಕಿ.ಮೀ. ಉದ್ದದ 'ಪಿಡಿಎ ರಥಯಾತ್ರೆ' ನಡೆಸಿದ್ದರು. ಈ ವೇಳೆ 2027ರ ಚುನಾವಣೆಯಲ್ಲಿ ಅಯೋಧ್ಯೆಯಿಂದ ಸ್ಪರ್ಧಿಸುವಂತೆ ಯೋಗಿ ಅವರಿಗೆ ಅಖಿಲೇಶ್ ಸವಾಲು ಹಾಕಿದ್ದರು ಮತ್ತು ಇಂದು ಚುನಾವಣೆ ನಡೆದರೆ ಗೋರಖ್ಪುರದಲ್ಲಿ ಬಿಜೆಪಿ ಶೂನ್ಯ ಸಾಧನೆ ಮಾಡಲಿದೆ ಎಂದು ಹೇಳಿದ್ದರು.
ಮುಂದುವರೆದು ಮಾತನಾಡಿದ ಯೋಗಿ, ರಾಮಮಂದಿರ ಚಳವಳಿಯ ಸಂದರ್ಭದಲ್ಲಿ ಕರಸೇವಕರ ಮೇಲೆ ಗುಂಡು ಹಾರಿಸಲು ಆದೇಶಿಸಿದ್ದವರು ಮತ್ತು 'ಜೈ ಶ್ರೀರಾಮ್' ಘೋಷಣೆ ಕೂಗಿದವರ ಮೇಲೆ ಬಲಪ್ರಯೋಗ ಮಾಡಿದ್ದವರು ಈಗ ರಾಜಕೀಯ ಲಾಭಕ್ಕಾಗಿ ಶ್ರೀರಾಮನನ್ನು ಸ್ಮರಿಸುತ್ತಿದ್ದಾರೆ ಎಂದು ಯೋಗಿ ಟೀಕಿಸಿದರು. ರಾಮಾಯಣದ ಮಾರೀಚನ ಪಾತ್ರವನ್ನು ಉಲ್ಲೇಖಿಸಿದ ಅವರು, ವೇಷ ಮರೆಸಿಕೊಂಡು ಬರುವವರ ಬಗ್ಗೆ ಜನರು ಎಚ್ಚರದಿಂದಿರಬೇಕು ಎಂದು ಹೇಳಿದರು. ಅಲ್ಲದೆ, ಹಿಂದಿನ ಎಸ್ಪಿ ಆಡಳಿತಾವಧಿಯಲ್ಲಿ ಮಾಫಿಯಾ, ಗೂಂಡಾಗಿರಿ ಮತ್ತು ನಿರುದ್ಯೋಗ ಹೆಚ್ಚಾಗಿತ್ತು ಎಂದು ಆರೋಪಿಸಿದರು.