ಗುರಗಾಂವ್ (ಹರಿಯಾಣ): ಹರಿಯಾಣದ ಗುರಗಾಂವ್‌ದಲ್ಲಿ ವಿದ್ಯುತ್ ನಿಯಂತ್ರಣ ಮಂಡಳಿಯು ಖಾಸಗಿ ಕಂಪನಿಯೊಂದಕ್ಕೆ ವಿದ್ಯುತ್ ವಿತರಣಾ ಪರವಾನಗಿ ನೀಡಿರುವುದನ್ನು ವಿರೋಧಿಸಿ ವಿದ್ಯುತ್ ಇಲಾಖೆ ನೌಕರರು 3 ದಿನಗಳ ಕಾಲ ಹಮ್ಮಿಕೊಂಡಿರುವ ಮುಷ್ಕರದಿಂದಾಗಿ ಸಾರ್ವಜನಿಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಅದರಂತೆ, ಬುಧವಾರ ರಾತ್ರಿಯಿಂದಲೇ (ಅಕ್ಟೋಬರ್ 21) ಮುಷ್ಕರ ಆರಂಭವಾಗಿದ್ದು, ಗುರುಗ್ರಾಮ, ಫರೀದಾಬಾದ್ ಮತ್ತು ನುಹ್ ಸೇರಿದಂತೆ ಹರಿಯಾಣದ ಪ್ರಮುಖ ನಗರಗಳಲ್ಲಿ ರಾತ್ರಿಯಿಡೀ ವಿದ್ಯುತ್ ಸಂಪರ್ಕ ಕಡಿತಗೊಂಡು ಜನರು ನರಕಯಾತನೆ ಅನುಭವಿಸುತ್ತಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ನೌಕರರ ಮುಷ್ಕರಕ್ಕೆ ಕಾರಣವೇನು?
ಹರಿಯಾಣ ವಿದ್ಯುತ್ ನಿಯಂತ್ರಣ ಆಯೋಗವು, ಇಲೆವೆನ್ ಪವರ್ ಪ್ರೈವೇಟ್ ಲಿಮಿಟೆಡ್ ಎಂಬ ಖಾಸಗಿ ಕಂಪನಿಗೆ ಗುರುಗ್ರಾಮ ಮತ್ತು ನುಹ್ ಜಿಲ್ಲೆಗಳಲ್ಲಿ ಮುಂದಿನ 25 ವರ್ಷಗಳ ಕಾಲ ವಿದ್ಯುತ್ ವಿತರಿಸಲು ಸಮಾನಾಂತರ ಪರವಾನಗಿ ನೀಡಿದೆ. ಸರ್ಕಾರದ ಈ ನಿರ್ಧಾರವು ಸಾರ್ವಜನಿಕ ವಿದ್ಯುತ್ ವಲಯವನ್ನು ದುರ್ಬಲಗೊಳಿಸುತ್ತದೆ ಮತ್ತು ಸುಮಾರು 40,000 ಉದ್ಯೋಗಿಗಳ ಭದ್ರತೆಗೆ ಧಕ್ಕೆ ತರುತ್ತದೆ ಎಂದು ಆರೋಪಿಸಿ ಹರಿಯಾಣ ಬಿಜ್ಲಿ ಕರ್ಮಚಾರಿ ಮತ್ತು ಇಂಜಿನಿಯರ್ಸ್ ಜಂಟಿ ಸಂಘರ್ಷ ಮೋರ್ಚಾ ಮುಷ್ಕರಕ್ಕೆ ಕರೆ ನೀಡಿದೆ.
ಮುಂದುವರೆದು, ಈ ಮುಷ್ಕರದಿಂದ ಗುರಗಾಂವ್ ನಗರದ ಬಹುತೇಕ ಭಾಗಗಳಲ್ಲಿ ಸತತ 16 ಗಂಟೆಗಳಿಗೂ ಹೆಚ್ಚು ಕಾಲ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ಅದರಲ್ಲೂ, ಸುದೀರ್ಘ ವಿದ್ಯುತ್ ಕಡಿತದಿಂದಾಗಿ ಬಹುತೇಕ ಮನೆಗಳ ಇನ್ವರ್ಟರ್‌ಗಳು ಸಂಪೂರ್ಣವಾಗಿ ಸ್ಥಗಿತಗೊಂಡಿವೆ. ಇದರಿಂದಾಗಿ ಮೊಬೈಲ್ ಫ್ಲ್ಯಾಶ್‌ಲೈಟ್ ಬೆಳಕಿನಲ್ಲಿ ಮಕ್ಕಳು ಓದುವಂತಾಗಿದೆ. ಅದರಲ್ಲೂ, ವಿದ್ಯುತ್ ಕೈಕೊಟ್ಟ ಕಾರಣ ವಾಟರ್ ಪಂಪ್‌ಗಳು ಚಾಲನೆಯಾಗದೆ ತೀವ್ರ ಕುಡಿಯುವ ನೀರಿನ ಅಭಾವ ಸೃಷ್ಟಿಯಾಗಿದೆ. ಜೊತೆಗೆ, ಇಂಟರ್ನೆಟ್/ವೈ-ಫೈ ಸಂಪರ್ಕಗಳೂ ಕಡಿತಗೊಂಡಿದ್ದು, ವರ್ಕ್ ಫ್ರಮ್ ಹೋಮ್ ಮಾಡುವ ಉದ್ಯೋಗಿಗಳಿಗೆ ತೊಂದರೆಯಾಗಿದೆ. ಹಾಗಾಗಿ, ತೀವ್ರ ಆಕ್ರೋಶಗೊಂಡ ನಿವಾಸಿಗಳು ಗುರುಗ್ರಾಮದ ಪ್ರಮುಖ ಫ್ಲೈಓವರ್‌ಗಳು (ದೌಲತಾಬಾದ್ ಫ್ಲೈಓವರ್) ಹಾಗೂ ಹೆದ್ದಾರಿಗಳನ್ನು ತಡೆದು ತಡರಾತ್ರಿ ಪ್ರತಿಭಟನೆ ನಡೆಸಿದ್ದಾರೆ.
ಸರ್ಕಾರದ ಮುಂದಿನ ಕ್ರಮವೇನು?
ಪರಿಸ್ಥಿತಿ ಕೈಮೀರುತ್ತಿರುವುದನ್ನು ಗಮನಿಸಿದ ಹರಿಯಾಣ ಇಂಧನ ಸಚಿವ ಅನಿಲ್ ವಿಜ್ ಮತ್ತು ಮುಖ್ಯಮಂತ್ರಿ ನಾಯಬ್ ಸಿಂಗ್ ಸೈನಿ ಅವರು, ಖಾಸಗಿ ಕಂಪನಿಗೆ ಪರವಾನಗಿ ನೀಡಿರುವುದರಲ್ಲಿ ಸರ್ಕಾರದ ಪಾತ್ರವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಈ ಆದೇಶದ ವಿರುದ್ಧ ಸರ್ಕಾರವು ವಿದ್ಯುತ್ ಮೇಲ್ಮನವಿ ನ್ಯಾಯಾಧಿಕರಣದಲ್ಲಿ ಕಾನೂನು ಹೋರಾಟ ನಡೆಸಲಿದೆ ಮತ್ತು ಅಗತ್ಯವಿದ್ದರೆ ಕಾಯ್ದೆಯ ಸೆಕ್ಷನ್ 108 ಅನ್ನು ಬಳಸಿ ಈ ಆದೇಶವನ್ನು ರದ್ದುಗೊಳಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಭರವಸೆ ನೀಡಿದ್ದಾರೆ. ಜೊತೆಗೆ, ಮುಷ್ಕರವನ್ನು ಕೊನೆಗೊಳಿಸಲು ಸರ್ಕಾರವು ಅಕ್ಟೋಬರ್ 23 ರಂದು ನೌಕರರ ಒಕ್ಕೂಟಗಳೊಂದಿಗೆ ಸಂಧಾನ ಸಭೆ ಹಮ್ಮಿಕೊಂಡಿದ್ದು, ಶೀಘ್ರದಲ್ಲೇ ಬಿಕ್ಕಟ್ಟು ಇತ್ಯರ್ಥವಾಗುವ ಸಾಧ್ಯತೆ ಇದೆ.
