ಬೆಂಗಳೂರು: ಸಿದ್ದರಾಮಯ್ಯನವರ ಮಗಳು ಸಿದ್ದಮ್ಮ, ಜಾರ್ಜ್ ಮಗಳು ಮೇರಿಯಮ್ಮನ ಮೇಲೆ ಅತ್ಯಾಚಾರ ಆದಾಗ ಮಾತ್ರ ಇವರು ಜಾಗೃತರಾಗುತ್ತಾರೆ. ಇಲ್ಲ, ಆಗಲೂ ಅನುಮಾನ...!
ಮಾಧ್ಯಮದವರು ಟಿಆರ್ಪಿ ಹೆಚ್ಚಳಕ್ಕಾಗಿ ಅತ್ಯಾಚಾರ ಪ್ರಕರಣಗಳನ್ನು ವೈಭವೀಕರಿಸುತ್ತಾ ಎಂದು ಗೃಹ ಮಂತ್ರಿ ನಾಚಿಕೆ ಬಿಟ್ಟು ಹೇಳುತ್ತಿದ್ದಾನೆ. ನಿನ್ನ ಮಗಳ ಮೇಲೆ ಅತ್ಯಾಚಾರ ಆಗಿದ್ದರೆ ಸುಮ್ಮನೆ ಇರುತ್ತಿದ್ದೆಯಾ? ಅವರ ಮಕ್ಕಳ ಮೇಲಾಗಲಿ ಬರೆಯವರ ಮಕ್ಕಳ ಮೇಲಾಗಲಿ ಅತ್ಯಾಚಾರ ಆಗಬಾರದು ಎಂದು ನಾನು ಬಯಸುತ್ತೇನೆ. ಆದರೆ ಅವರ ಮಕ್ಕಳ ಮೇಲೆ ಅತ್ಯಾಚಾರ ಆದಾಗಷ್ಟೇ ಅವರಿಗೆ ಅದರ ಗಾಂಭೀರ್ಯ ಅರ್ಥವಾಗುವುದೇನೋ...
ಇದು ಬಿಜೆಪಿ ಮುಖಂಡ, ವಿಧಾನ ಪರಿಷತ್ ಪ್ರತಿಪಕ್ಷ ನಾಯಕ ಕೆ.ಎಸ್ ಈಶ್ವರಪ್ಪ ಅವರ ಆಣಿಮುತ್ತು. ಈಶ್ವರಪ್ಪ ಹೇಳಿಕೆ ಬಗ್ಗೆ ಕಾಂಗ್ರೆಸ್ನಿಂದ ತೀಕ್ಷ್ಣ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಅವರ ಮನೆ ಎದುರು ಪಕ್ಷದ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದ್ದಾರೆ.
ಗಣಿಯಲ್ಲಿ ಸಚಿವರ ಪುತ್ರ
ರಾಜ್ಯದಲ್ಲಿ ನಡೆಯುತ್ತಿರುವ ಅಕ್ರಮ ಮರಳು ಗಣಿಗಾರಿಕೆಯಲ್ಲಿ ಲೋಕೋಪಯೋಗಿ ಸಚಿವ ಡಾ.ಎಚ್.ಸಿ ಮಹಾದೇವಪ್ಪ ಅವರ ಪುತ್ರನೂ ಭಾಗಿಯಾಗಿದ್ದಾರೆ. ಅವರ ವಿರುದ್ಧ ದಾಖಲಾಗಿರುವ ಎಫ್ಐಆರ್ ಪ್ರತಿ ನನ್ನ ಬಳಿ ಇದೆ ಎಂದು ಈಶ್ವರಪ್ಪ ಹೇಳಿದ್ದಾರೆ. ಈ ಸಂಬಂಧ ನವೆಂಬರ್ 10ರಂದು ಮತ್ತೊಂದು ಪತ್ರಿಕಾಗೋಷ್ಠಿ ಕರೆದು ದಾಖಲೆ ಬಿಡುಗಡೆ ಮಾಡುತ್ತೇನೆ. ಜತೆಗೆ ಇನ್ನೊಬ್ಬ ಸಚಿವರ ಅಕ್ರಮ ಬಹಿರಂಗಪಡಿಸುತ್ತೇನೆ ಎಂದಿದ್ದಾರೆ.
