ವಾಷಿಂಗ್ಟನ್: ಜಗತ್ತಿನ ಅತಿ ದೊಡ್ಡ ಹಾಗೂ ಅತ್ಯಂತ ಶಕ್ತಿಶಾಲಿ ಅಂತರಿಕ್ಷ ದೂರದರ್ಶಕವನ್ನು ಅಮೆರಿಕ ಬಾಹ್ಯಾಕಾಶ ಸಂಸ್ಥೆ ನಾಸಾ ಉಡಾವಣೆ ಮಾಡಿದೆ. ವಿಶ್ವದ ಲಕ್ಷ ಕೋಟಿ ಕಿಲೋಮೀಟರುಗಳಷ್ಟು ದೂರದ ವಿದ್ಯಮಾನಗಳ ಮೇಲೆ ಕಣ್ಣಿಡಲು ಇದರಿಂದ ಬಲ ದೊರೆಯಲಿದೆ ಎಂದು ಪರಿಣತರು ತಿಳಿಸಿದ್ದಾರೆ.
ನಾಸಾದ ಈ ದೂರದರ್ಶಕದ ಹೆಸರು ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್. ದಕ್ಷಿಣ ಅಮೆರಿಕದ ಫ್ರೆಂಚ್ ಗಯಾನ ಸ್ಥಳದಿಂದ ಈ ದೂರದರ್ಶಕವನ್ನು ಹೊತ್ತ ರಾಕೆಟ್ ಅಂತರಿಕ್ಷಕ್ಕೆ ಪ್ರಯಾಣಿಸಿದೆ. 10 ಶತ ಕೋಟಿ ಡಾಲರ್ ಮೌಲ್ಯದ ಈ ದೂರದರ್ಶಕ ಭೂಮಿಯಿಂದ 16 ಲಕ್ಷ ಕಿ.ಮೀ ದೂರದಲ್ಲಿ ಸ್ಥಾಪಿತಗೊಳ್ಳಲಿದೆ.
ಆ ಕಕ್ಷೆಗೆ ತಲುಪಲು ರಾಕೆಟ್ ಗೆ 1 ತಿಂಗಳು ಹಿಡಿಯುತ್ತದೆ. ಅಲ್ಲದೆ ಈ ದೂರದರ್ಶಕ ಕಾರ್ಯಾರಂಭ ಮಾಡಲು 5 ತಿಂಗಳು ಬೇಕಾಗಲಿದೆ ಎಂದು ನಾಸಾ ತಿಳಿಸಿದೆ. ವಿಶ್ವದ ಉಗಮ, ಭೂಮಿಯ ಹುಟ್ಟು, ನಾವು ಯಾರು, ಎಲ್ಲಿಂದ ಬಂದೆವು ಎಂಬಿತ್ಯಾದಿ ಕುತೂಹಲಭರಿತ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳುವ ಪ್ರಯತ್ನವನ್ನು ಜೇಮ್ಸ್ ವೆಬ್ ಟೆಲಿಸ್ಕೋಪ್ ಮಾಡಲಿದೆ ಎಂದು ನಾಸಾ ತಿಳಿಸಿದೆ.
Advertisement