ನವದೆಹಲಿ: ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (DRDO) ಎತ್ತರ ಪ್ರದೇಶದ ತಂತ್ರಜ್ಞಾನ ಕ್ಷೇತ್ರದಲ್ಲಿ ಎರಡು ಮಹತ್ವದ ಸಾಧನೆಗಳನ್ನು ದಾಖಲಿಸಿದೆ. ಸಮುದ್ರ ಮಟ್ಟದಿಂದ 21 ಕಿ.ಮೀ. ಎತ್ತರದಲ್ಲಿ ಸ್ವದೇಶಿ ಕಣ್ಗಾವಲು ವೇದಿಕೆಯನ್ನು ಯಶಸ್ವಿಯಾಗಿ ಹಾರಿಸಿರುವ DRDO, ಲಡಾಖ್‌ನ ನಿಯೋಮಾದಲ್ಲಿ ಹೊಸ ಪ್ಯಾರಾಚೂಟ್ ವ್ಯವಸ್ಥೆಯ ಮೊದಲ ಲೈವ್ ಜಂಪ್‌ನ್ನೂ ಯಶಸ್ವಿಯಾಗಿ ನಡೆಸಿದೆ.
ಎರಡೂ ವ್ಯವಸ್ಥೆಗಳನ್ನು ಆಗ್ರಾದ ಏರಿಯಲ್ ಡೆಲಿವರಿ ರಿಸರ್ಚ್ ಆ್ಯಂಡ್ ಡೆವಲಪ್‌ಮೆಂಟ್ ಎಸ್ಟಾಬ್ಲಿಷ್‌ಮೆಂಟ್ (ADRDE) ವಿನ್ಯಾಸಗೊಳಿಸಿ ಅಭಿವೃದ್ಧಿಪಡಿಸಿದೆ.
ಹೈ-ಆಲ್ಟಿಟ್ಯೂಡ್ ಪ್ಲಾಟ್‌ಫಾರ್ಮ್ (HAPS) ನ್ನು ದೀರ್ಘಾವಧಿಯ ಸ್ಟ್ರಾಟೋಸ್ಫೆರಿಕ್ ವೈಮಾನಿಕ ಕಣ್ಗಾವಲು ವೇದಿಕೆಯಾಗಿ ಅಭಿವೃದ್ಧಿಪಡಿಸಲಾಗುತ್ತಿದ್ದು, ಅಡ್ವಾನ್ಸ್ಡ್ ಹೈ-ಆಲ್ಟಿಟ್ಯೂಡ್ ಪ್ಯಾರಾಚೂಟ್ (AHAP) ನ್ನು ಎತ್ತರ ಪ್ರದೇಶಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಪ್ಯಾರಾಟ್ರೂಪರ್‌ಗಳನ್ನು ಇಳಿಸಲು ಉದ್ದೇಶಿಸಲಾಗಿದೆ.
ಪ್ರಾಯೋಗಿಕ ಹಾರಾಟದ ವೇಳೆ ಸ್ವದೇಶಿ HAPS ಸಮುದ್ರ ಮಟ್ಟದಿಂದ 21 ಕಿ.ಮೀ. ಎತ್ತರ ತಲುಪಿದೆ. ಬಳಿಕ 20 ಕಿ.ಮೀ. AMSL ಎತ್ತರದಲ್ಲಿ 30 ನಿಮಿಷಗಳಿಗೂ ಹೆಚ್ಚು ಕಾಲ ಉಳಿದು, ನಂತರ ಅದನ್ನು ಕೆಳಕ್ಕೆ ಇಳಿಯುವಂತೆ ನಿಯಂತ್ರಿಸಲಾಯಿತು.
ವ್ಯವಸ್ಥೆಯನ್ನು ಯಶಸ್ವಿಯಾಗಿ ಮರಳಿ ಪಡೆಯಲಾಗಿದ್ದು, ಬಳಿಕ ಅದರ ಹಾರಾಟದ ಕಾರ್ಯಕ್ಷಮತೆಯ ದತ್ತಾಂಶವನ್ನು ವಿಶ್ಲೇಷಿಸಲಾಯಿತು. ಹಾರಾಟದ ಅವಧಿಯುದ್ದಕ್ಕೂ ಗ್ರೌಂಡ್ ಕಂಟ್ರೋಲ್ ಸ್ಟೇಷನ್‌ಗೆ ನೈಜ-ಸಮಯದ ವಿಡಿಯೋ ಹಾಗೂ ಇತರ ವಾಹನ ನಿಯತಾಂಕಗಳು ನಿರಂತರವಾಗಿ ಲಭ್ಯವಾಗಿದ್ದವು.
ವೇದಿಕೆಯು ನಿರೀಕ್ಷಿತ ಹಾರಾಟದ ಕಾರ್ಯಕ್ಷಮತೆಯನ್ನು ಪ್ರದರ್ಶಿಸಿದೆ ಎಂದು ದತ್ತಾಂಶ ತೋರಿಸಿದೆ ಎಂದು DRDO ಹೇಳಿದೆ. HAPSನಲ್ಲಿ ಇನರ್ಷಿಯಲ್ ಮೆಷರ್‌ಮೆಂಟ್ ಯುನಿಟ್, GPS ರಿಸೀವರ್, ಆನ್‌ಬೋರ್ಡ್ ಕ್ಯಾಮೆರಾಗಳು ಹಾಗೂ ಎತ್ತರ ನಿಯಂತ್ರಣ ವ್ಯವಸ್ಥೆ ಸೇರಿದಂತೆ ಹಲವು ಉಪಕರಣಗಳು ಮತ್ತು ನಿಯಂತ್ರಣ ಎಲೆಕ್ಟ್ರಾನಿಕ್ ಪ್ಯಾಕೇಜ್‌ಗಳನ್ನು ಅಳವಡಿಸಲಾಗಿತ್ತು.
HAPS ಒಂದು ಲೈಟರ್-ದ್ಯಾನ್-ಏರ್ ವ್ಯವಸ್ಥೆಯಾಗಿದ್ದು, ಸ್ಟ್ರಾಟೋಸ್ಫಿಯರ್‌ನಲ್ಲಿ ದೀರ್ಘಾವಧಿಯ ವೈಮಾನಿಕ ಕಣ್ಗಾವಲು ವೇದಿಕೆಯಾಗಿ ಕಾರ್ಯನಿರ್ವಹಿಸುವಂತೆ ವಿನ್ಯಾಸಗೊಳಿಸಲಾಗಿದೆ.
ಇನ್ನೊಂದು ಮಹತ್ವದ ಬೆಳವಣಿಗೆಯಲ್ಲಿ, DRDO ಲಡಾಖ್‌ನ ನಿಯೋಮಾದ ಮುದ್ ಡ್ರಾಪ್ ಝೋನ್ನಲ್ಲಿ ಅಡ್ವಾನ್ಸ್ಡ್ ಹೈ-ಆಲ್ಟಿಟ್ಯೂಡ್ ಪ್ಯಾರಾಚೂಟ್ (AHAP)ನ ಮೊದಲ ಲೈವ್ ಜಂಪ್ ನಡೆಸಿತು. ಇದು ಅತ್ಯಂತ ಎತ್ತರದಲ್ಲಿರುವ ಡ್ರಾಪ್ ಝೋನ್‌ಗಳಲ್ಲಿ ಒಂದಾಗಿದೆ.
16,000 ಅಡಿ AMSL ಎತ್ತರದಿಂದ ಜಂಪ್ ನಡೆಸಲಾಗಿದ್ದು, 15,500 ಅಡಿ ಎತ್ತರದಲ್ಲಿ ಪ್ಯಾರಾಚೂಟ್ ತೆರೆದುಕೊಳ್ಳುವಂತೆ ಮಾಡಲಾಯಿತು. ಬಳಿಕ ಪ್ಯಾರಾಟ್ರೂಪರ್ 13,700 ಅಡಿ ಎತ್ತರದಲ್ಲಿರುವ ನಿಯೋಮಾದಲ್ಲಿ ಸುರಕ್ಷಿತವಾಗಿ ಇಳಿದರು.
ಅತ್ಯಂತ ಎತ್ತರದ ಪ್ರದೇಶಗಳಲ್ಲಿ AHAPನ ಪರಿಣಾಮಕಾರಿತ್ವ ಮತ್ತು ಕಾರ್ಯತಂತ್ರದ ಬಳಕೆಯ ಸಾಮರ್ಥ್ಯವನ್ನು ಈ ಜಂಪ್ ಪ್ರದರ್ಶಿಸಿದೆ ಎಂದು DRDO ತಿಳಿಸಿದೆ.
AHAP ಒಂದು ಸ್ಟ್ಯಾಟಿಕ್-ಲೈನ್ ಪ್ಯಾರಾಚೂಟ್ ವ್ಯವಸ್ಥೆಯಾಗಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಪ್ಯಾರಾಟ್ರೂಪರ್‌ಗಳನ್ನು ಇಳಿಸಲು ವಿನ್ಯಾಸಗೊಳಿಸಲಾಗಿದೆ. ಇದು ವಿವಿಧ ರೀತಿಯ ಡಿಪ್ಲಾಯ್‌ಮೆಂಟ್ ವಿಧಾನಗಳನ್ನು ಹೊಂದಿದ್ದು, 18,000 ಅಡಿ ಎತ್ತರದವರೆಗೂ ಕಾರ್ಯನಿರ್ವಹಿಸಬಲ್ಲದು.
ಎತ್ತರ ಪ್ರದೇಶಗಳಲ್ಲಿ ಕಾರ್ಯನಿರ್ವಹಿಸುವ ಭಾರತೀಯ ರಕ್ಷಣಾ ಪಡೆಗಳ ಕಾರ್ಯತಂತ್ರದ ಅಗತ್ಯಗಳಿಗೆ ಅನುಗುಣವಾಗಿ ಸುರಕ್ಷಿತ ಇಳಿಯುವಿಕೆಯ ವೇಗವನ್ನು ಒದಗಿಸುವಂತೆ ಈ ವ್ಯವಸ್ಥೆಯನ್ನು ವಿನ್ಯಾಸಗೊಳಿಸಲಾಗಿದೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ.
ಇಂತಹ ಎತ್ತರದಲ್ಲಿ ಸ್ಟ್ಯಾಟಿಕ್-ಲೈನ್ ಪ್ಯಾರಾಚೂಟ್ ಜಂಪ್‌ಗಳು ಹೆಚ್ಚಿನ ಓಪನಿಂಗ್ ಶಾಕ್ ಮತ್ತು ವೇಗದ ಇಳಿಯುವಿಕೆಯ ಕಾರಣದಿಂದ ಅತ್ಯಂತ ಸಂಕೀರ್ಣ ಹಾಗೂ ಅಪಾಯಕಾರಿಯಾಗಿರುತ್ತವೆ.
AHAP ನ್ನು ಕಾನ್ಪುರದ ಆರ್ಡಿನೆನ್ಸ್ ಪ್ಯಾರಾಚೂಟ್ ಫ್ಯಾಕ್ಟರಿಯಲ್ಲಿ ತಯಾರಿಸಲಾಗಿದೆ. ಇದನ್ನು DGAQA ಪರಿಶೀಲಿಸಿದ್ದು, ಕಾನ್ಪುರದ CEMILAC, RCMA ಪ್ರಮಾಣೀಕರಿಸಿದೆ.
