ಬೆಂಗಳೂರು: ವೆಸ್ಲಿ, ಸ್ಟೀವ್ ಹ್ಯಾನ್ಸನ್ ಮತ್ತು ಅರುಣ್ ಪಾಂಡೆ ಅವರ ತಲಾ ಒಂದು ಗೋಲಿನ ಬಲದಿಂದ ಕಂಗೊಳಿಸಿದ ಕರ್ನಾಟಕ ತಂಡ, 29ನೇ ಅಖಿಲ ಭಾರತ ಪೋಸ್ಟಲ್ ಫುಟ್ಬಾಲ್ ಚಾಂಪಿಯನ್‌ಷಿಪ್‌ನಲ್ಲಿ ಪಶ್ಚಿಮ ಬಂಗಾಳ ತಂಡವನ್ನು ಬಗ್ಗು ಬಡಿದು ಉಪಾಂತ್ಯ ಪ್ರವೇಶಿಸಿದೆ.
ಅಶೋಕ ನಗರದಲ್ಲಿರುವ ರಾಜ್ಯ ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ 'ಬಿ' ಗುಂಪಿನ ತನ್ನ ಎರಡನೇ ಪಂದ್ಯದಲ್ಲಿ ಕರ್ನಾಟಕ ತಂಡ 3-0 ಗೋಲುಗಳಿಂದ ಪಶ್ಚಿಮ ಬಂಗಾಳ ತಂಡವನ್ನು ಸೋಲಿಸಿತು.
ಪಂದ್ಯದ ಮೊದಲಾರ್ಧಲ್ಲೇ ಆಕ್ರಮಣಕಾರಿ ಆಟಕ್ಕಿಳಿದ ರಾಜ್ಯದ ಆಟಗಾರರು ವಿರಾಮಕ್ಕೂ ಮುನ್ನ ಎರಡು ಗೋಲು ಬಾರಿಸಿದರು. ವೆಸ್ಲಿ (20ನೇ ನಿ.), ಅರುಣ್ ಪಾಂಡಿ (28ನೇ ನಿ.) ತಲಾ ಒಂದು ಗೋಲು ತಂದು 2-0 ಅಂತರದಲ್ಲಿ ಆತಿಥೇಯರಿಗೆ ಮುನ್ನಡೆ ಒದಗಿಸಿದರು. ನಂತರ ದ್ವಿತೀಯಾರ್ಧಲ್ಲೂ ಮಿಂಚಿದ ರಾಜ್ಯ ತಂಡಕ್ಕೆ ಸ್ಟೀವ್ ಹ್ಯಾನ್ಸನ್(47ನೇ ನಿ.) ಒಂದು ಗೋಲು ಬಾರಿಸಿ ಜಯದ ಅಂತರವನ್ನು ವಿಸ್ತರಿಸಿದರು.
ಎ ಗುಂಪಿನಲ್ಲಿ ಒಡಿಶಾ ತಂಡ 4-1 ಗೋಲುಗಳಿಂದ ಅಸ್ಸಾಂ ತಂಡವನ್ನು ಮಣಸಿ ಸೆಮಿಫೈನಲ್ ತಲುಪಿತು. ವಿಜೇತ ತಂಡದ ಪರ ಮಾಶ್‌ಕುಮಾರ್ ಸಾಹು (50, 55, 70ನೇ.) ಹ್ಯಾಟ್ರಿಕ್ ಗೋಲು ದಾಖಲಿಸಿದರು.
