ಫ್ಲೋರಿಡಾ: ಅಮೆರಿಕದ ಖ್ಯಾತ ಗಾಲ್ಫ್ ಆಟಗಾರ ಟೈಗರ್‌ವುಡ್ಸ್‌ ರನ್ನು ಕುಡಿದು ವಾಹನ ಚಲಾಯಿಸಿದರೆಂಬ ಆರೋಪದ ಮೇರೆಗೆ ಸೋಮವಾರ ಬಂಧನಕ್ಕೊಳಪಡಿಸಲಾಗಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ವುಡ್ಸ್ ಸೋಮವಾರ ಮುಂಜಾನೆ ಸುಮಾರು 3 ಗಂಟೆಗೆ ದಕ್ಷಿಣ ಫ್ಲೋರಿಡಾದಲ್ಲಿ ಪಾನಮತ್ತರಾಗಿ ವಾಹನ ಚಲಾಯಿಸಿದ್ದಾರೆ ಎಂಬ ಆರೋಪದ ಮೇರೆಗೆ ಸ್ಥಳೀಯ ಪೊಲೀಸರು ಅವರನ್ನು ವಶಕ್ಕೆ ಪಡೆದಿದ್ದಾರೆ. ಫ್ಲೋರಿಡಾ ಜುಪಿಟರ್ ನ ಪಾಲಮ್‌ ಬೀಚ್‌ ನ ಕೌಂಟಿ ಜೈಲಿಗೆ ವುಡ್ಸ್‌ರನ್ನು ಬೆಳಗ್ಗೆ 7 ಗಂಟೆಗೆ ಕರೆತರಲಾಗಿತ್ತು ಮತ್ತು ನಂತರ ವುಡ್ಸ್ ಅವರನ್ನು ಮುಂಜಾನೆ 10.50ಕ್ಕೆ ಜಾಮೀನಿನ ಮೇಲೆ ಬಿಡುಗಡೆಗೊಳಿಸಲಾಯಿತು ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಯಾವುದೇ ದಾಖಲಾತಿಗಳನ್ನು ಪಡೆಯದೇ ವುಡ್ಸ್ ರನ್ನು ಬಿಡುಗಡೆ ಮಾಡಲಾಗಿದೆ ಎಂಬ ಆರೋಪ ಕೂಡ ಪೊಲೀಸರ ವಿರುದ್ಧ ಕೇಳಿಬಂದಿದೆ. ಫ್ಲೋರಿಡಾದ ಜ್ಯೂಪಿಟರ್‌ ಐಸ್‌ ಲ್ಯಾಂಡ್‌ ನಲ್ಲಿ ವುಡ್ಸ್ ಅವರ ಮನೆಯಿದ್ದು, ಕಳೆದ ಏಪ್ರಿಲ್‌ನಲ್ಲಿ ಬೆನ್ನುಹುರಿ ಶಸ್ತ್ರ ಚಿಕಿತ್ಸೆಗೆ ಒಳಗಾಗಿದ್ದ ವುಡ್ಸ್ ಸದ್ಯ ಮೈದಾನದಿಂದ ದೂರ ಉಳಿದಿದ್ದಾರೆ.
ಕುಡಿದಿರಲಿಲ್ಲ, ಆದರೆ ವೈದ್ಯಕೀಯ ಔಷಧಿಗಳ ಪ್ರಭಾವವಿತ್ತು
ಇನ್ನು ಈ ಬಗ್ಗೆ ಮಾಧ್ಯಮಗಳಿಗೆ ಸ್ಪಷ್ಟನೆ ನೀಡಿರುವ ವುಡ್ಸ್ ತಾವು ಕಾರು ಚಲಾಯಿಸುವಾಗ ಕುಡಿದಿರಲಿಲ್ಲ. ಆದರೆ ತಮ್ಮ ಬೆನ್ನುಹುರಿ ಚಿಕಿತ್ಸೆಗಾಗಿ ವೈದ್ಯರು ನೀಡಿದ್ದ ಔಷಧಿ ಮಂಪರು ತರಿಸಿತ್ತು ಎಂದು ಹೇಳಿದ್ದಾರೆ.
Advertisement