ಇಪೊಹ್: ಮಲೇಷಿಯಾದಲ್ಲಿ ನಡೆದ ಸುಲ್ತಾನ್‌ ಅಜ್ಲಾನ್‌ ಶಾ ಕಪ್‌ ಹಾಕಿ ಪಂದ್ಯಾವಳಿಯಲ್ಲಿ ಶನಿವಾರ ಐರ್ಲೆಂಡ್ ವಿರುದ್ಧ ಗೆಲುವು ಸಾಧಿಸಿದ ಭಾರತ 5ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದೆ.
ಇಂದು ಮತ್ತದೇ ಐರ್ಲೆಂಡ್ ವಿರುದ್ಧ ನಡೆದ ಪಂದ್ಯದಲ್ಲಿ ಭಾರತದ ಸರ್ದಾರ್ ಸಿಂಗ್ ಬಳಗ ಅಮೋಘ ಪ್ರದರ್ಶನ ನೀಡುವ ಮೂಲಕ 4-1ರ ಅಂತರದಿಂದ ಭರ್ಜರಿ ಗೆಲುವು ದಾಖಲಿಸಿತು. ಇದರೊಂದಿಗೆ ಶುಕ್ರವಾರದಂದು ಲೀಗ್ ಹಂತದ ಕೊನೆಯ ಪಂದ್ಯದಲ್ಲಿ ಎದುರಾದ ಸೋಲಿಗೆ ಸೇಡು ತೀರಿಸಿಕೊಂಡಿತ್ತು.
ಲೀಗ್ ಹಂತದಲ್ಲಿ ಐರ್ಲೆಂಡ್ ವಿರುದ್ಧ 3-2ರ ಅಂತರದ ಸೋಲಿಗೊಳಗಾಗಿದ್ದ ಭಾರತದ ಫೈನಲ್ ಕನಸು ಭಗ್ನವಾಗಿತ್ತು.
ಭಾರತದ ಪರ ವರುಣ್ ಕುಮಾರ್ (5ನೇ ನಿಮಿಷ ಹಾಗೂ 32ನೇ ನಿಮಿಷ), ಶಿಲಾನಂದ್ ಲಾಕ್ರಾ (27ನೇ ನಿಮಿಷ) ಹಾಗೂ ಗುರ್ಜಾಂಟ್ (37ನೇ ನಿಮಿಷ) ಗೆಲುವಿನ ಗೋಲುಗಳನ್ನು ದಾಖಲಿಸಿದರು. ಅತ್ತ ಐರ್ಲೆಂಡ್ 48ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ ಜೂಲಿಯನ್ ಡೇಲ್ ಸೋಲಿನ ಅಂತರವನ್ನು ತಗ್ಗಿಸಿದರು.
