ಇಂದೋರ್ ವಿಮಾನನಿಲ್ದಾಣದ ರನ್ ವೇ ನಲ್ಲಿ ನರಿ ಸೆರೆ

ಇಂದೋರ್: ಇಂದೋರಿನ ದೇವಿ ಅಹಿಲ್ಯಾಬಾಯಿ ವಿಮಾನನಿಲ್ದಾಣದ ರನ್ ವೇ ನಲ್ಲಿ ಓಡಾಡುತ್ತಿದ್ದ ನರಿಯೊಂದನ್ನು ಶುಕ್ರವಾರ ಸೆರೆ ಹಿಡಿಯಲಾಗಿದೆ ಎಂದು ಅರಣ್ಯಾಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ನರಿಗಳನ್ನು ಹಿಡಿಯಲು ೮ ಬೋನುಗಳನ್ನು ರನ್ ವೇ ಅಕ್ಕಪಕ್ಕ ಇಡಲಾಗಿದ್ದು ಅದರಲ್ಲಿ ಒಂದು ನರಿ ಇಂದು ಬೋನಿಗೆ ಬಿದ್ದಿದೆ ಎಂದು ಅರಣ್ಯ ವಿಭಾಗಾಧಿಕಾರಿ ಎ ಕೆ ಜೋಶಿ ತಿಳಿಸಿದ್ದಾರೆ.

ವಿಮಾನ ನಿಲ್ದಾಣದಲ್ಲಿ ಮತ್ತು ಸುತ್ತಮುತ್ತ ಸುಳಿದಾಡುತ್ತಿದ್ದ ೧೫-೨೦ ನರಿಗಳನ್ನು ಹಿಡಿಯಲು ಬೋನುಗಳನ್ನು ಇಡಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಕನಿಷ್ಟ ಎರಡು ಬಾರಿಯಾದರೂ ನಾವು ರನ್ ವೇ ನಲ್ಲಿ ನರಿಗಳು ಸುಳಿದಾಡುವುದನ್ನು ಕಂಡಿದ್ದೇವೆ ಎನ್ನುವ ವಿಮಾನ ನಿಲ್ದಾಣದ ಅಧಿಕಾರಿ ಬೋನುಗಳನ್ನು ಇಡಲು ಅರಣ್ಯಾಧಿಕಾರಿಗಳಲ್ಲಿ ಮನವಿ ಮಾಡಿದ್ದೆವು ಎಂದಿದ್ದಾರೆ.