ನವದೆಹಲಿ: ಬೇಸಿಗೆಯ ಬೇಗೆಯಲ್ಲಿ ನಗರದಲ್ಲಿ ನೀರಿಗೆ ತೊಂದರೆಯಾಗುವ ಸನ್ನಿವೇಶವಿದ್ದು, ಹಾಗೇನಾದರೂ ಆದರೆ ಪ್ರಧಾನಮಂತ್ರಿ, ರಾಷ್ಟ್ರಪತಿ ಮತ್ತು ರಾಯಭಾರಿಗಳನ್ನು ಹೊರತುಪಡಿಸಿ ದೆಹಲಿಯ ಗಣ್ಯರಿಗೆ ನೀರನ್ನು ಕಡಿತಗೊಳಿಸುವಂತೆ ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಸೂಚನೆ ನೀಡಿದ್ದಾರೆ.
ದೆಹಲಿ ವಿಧಾನಸಭೆಯಲ್ಲಿ ಮಾತನಾಡಿದ ಕೇಜ್ರಿವಾಲ್ ನೀರಿನ ಕೊರತೆಯಾದರೆ ಕೆಲವರನ್ನು ಹೊರತುಪಡಿಸಿ ಎಲ್ಲ ವಿಐಪಿಗಳು ಇದರ ಬೇಗೆಯನ್ನು ಸಹಿಸಿಕೊಳ್ಳಬೇಕು ಎಂದಿದ್ದಾರೆ. ದೆಹಲಿ ಚುನಾವಣೆಯ ನಂತರ ನಗರಕ್ಕೆ ನೀರಿನ ಪೂರೈಕೆಯನ್ನು ಸ್ಥಗಿತಗೊಳಿಸಿರುವ ಬಿಜೆಪಿ ಆಡಳಿತದ ಹರ್ಯಾಣ ರಾಜ್ಯದ ಮೇಲೂ ಹರಿಹಾಯ್ದಿದ್ದಾರೆ.
"ನೀರಿನ ಮೇಲೆ ರಾಜಕೀಯ ಮಾಡಬಾರದು. ಈ ವರ್ಷ ನೀರಿನ ವ್ಯತ್ಯಯ ಆದರೆ, ಆ ತೊಂದರೆ ಎಲ್ಲರೂ ಅನುಭವಿಸುವ ಹಾಗೆ ದೆಹಲಿ ಜಲಮಂಡಲಿ ನೋಡಿಕೊಳ್ಳಬೇಕು. ನೀರಿನ ಪೂರೈಕೆಯ ವ್ಯತ್ಯಯವನ್ನು ನನ್ನನ್ನು ಸೇರಿಸಿದಂತೆ ಎಲ್ಲ ವಿಐಪಿಗಳು ಅನುಭವಿಸಲಿದ್ದಾರೆ. ಪ್ರಧಾನಿ, ರಾಷ್ಟ್ರಪತಿ, ರಾಯಭಾರ ಕಚೇರಿಗಳು ಮತ್ತು ತುರ್ತು ಸೇವೆಗಳನ್ನಷ್ಟೆ ಇದರಿಂದ ಹೊರಗಿಡಲಿದ್ದೇವೆ" ಎಂದಿದ್ದಾರೆ ಕೇಜ್ರಿವಾಲ್.
ಸದ್ಯದ ಪರಿಸ್ಥಿತಿಯಲ್ಲಿ ಕೇಂದ್ರ ಮತ್ತು ರಾಜ್ಯ ಸಚಿವರು, ಲೋಕಸಭಾ ಸದಸ್ಯರು ಮತ್ತು ಅಧಿಕಾರಶಾಹಿಗೆ ನಿರಂತರ ನೀರಿನ ಪೂರೈಕೆ ಇದೆ.
ಪಕ್ಕದ ರಾಜ್ಯಗಳಾದ ಉತ್ತರ ಪ್ರದೇಶ ಮತ್ತು ಹರ್ಯಾಣದ ನೀರು ಪೂರೈಕೆಯ ಮೇಲೆ ದೆಹಲಿ ಅವಲಂಬಿತವಾಗಿದೆ. ಬೇಸಿಗೆಯಲ್ಲಿ ದೆಹಲಿಯಲ್ಲಿ ನೀರಿನ ಪೂರೈಕೆಯಲ್ಲಿ ವ್ಯತ್ಯಯ ಆಗುವುದು ಸರ್ವೇಸಾಮಾನ್ಯ.
