ತಿರುವನಂತಪುರಮ್: ಕಳೆದ ವರ್ಷ ನಡೆದ ಆರ್ ಎಸ್ ಎಸ್ ಕಾರ್ಯಕರ್ತನ ಕೊಲೆ ಪ್ರಕರಣದಲ್ಲಿ ಹಿರಿಯ ಸಿಪಿಐ-ಎಂ ನಾಯಕ ಪಿ ಜಯರಾಜನ್ ಅವರು ಜೂನ್ ೨ ರಂದು ತನಿಖೆಗೆ ಹಾಜರಾಗುವಂತೆ ಸಿಬಿಐ ಆದೇಶಿಸಿದೆ ಎಂದು ಮೂಲಗಳು ತಿಳಿಸಿವೆ.
ಜಯರಾಜನ್ ಸದ್ಯ ಕಣ್ಣೂರು ಜಿಲ್ಲೆಯ ಸಿಪಿಐ-ಎಂ ಕಾರ್ಯದರ್ಶಿಯಾಗಿದ್ದಾರೆ.
೧೯೯೯ರಲ್ಲಿ ಜಯರಾಜನ್ ಮೇಲೆ ದಾಳಿ ಮಾಡಿದ್ದ ವ್ಯಕ್ತಿಗಳಲ್ಲಿ ಆರ್ ಎಸ್ ಎಸ್ ಕಾರ್ಯಕರ್ತ ಕೆ ಟಿ ಮನೋಜ್ ಕೂಡ ಒಬ್ಬರಾಗಿದ್ದರು. ಆದರೆ ಜಯರಾಜನ್ ಆಗ ಉಳಿದಿದ್ದರು. ನಂತರ ಕನ್ನೂರಿನ ಬಳಿಯ ಖತಿರೂರ್ ನಲ್ಲಿ ಕೆ ಟಿ ಮನೋಜ್ ಮೇಲೆ ೧ ನೇ ಸಪ್ಟಂಬರ್ ೨೦೧೪ ರಂದು ಏಳು ಜನರ ಗುಂಪೊಂದು ದಾಳಿ ಮಾಡಿ ಅವರನ್ನು ಹತ್ಯೆಗೈದಿತ್ತು.
ಈ ದಾಳಿಕೋರರು ಮೊದಲು ಆರ್ ಎಸ್ ಎಸ್ ಕಾರ್ಯಕರ್ತನ ವಾಹನದ ಮೇಲೆ ಬಾಂಬ್ ಎಸೆದು ನಂತರ ಅವರನ್ನು ಹತ್ಯೆಗೈದಿದ್ದರು.
ಇದನ್ನು ಮೊದಲು ತನಿಖೆ ನಡೆಸಿದ ಕೇರಳ ಪೊಲೀಸರು ನಂತರ ಸಿಬಿಐಗೆ ವಹಿಸಿಕೊಟ್ಟಿದ್ದರು. ಈ ಪ್ರಕರಣದಲ್ಲಿ ಇಲ್ಲಿಯವರೆಗೂ ೧೯ ಜನರನ್ನು ಆರೋಪಿಗಳು ಎಂದು ಗುರುತಿಸಲಾಗಿದೆ.
ಸಿಪಿಐ-ಎಂ ಮತ್ತು ಬಿಜೆಪಿ-ಆರ್ ಎಸ್ ಎಸ್ ನಡುವಿನ ದ್ವೇಷ ಕಣ್ಣೂರಿನಲ್ಲಿ ಮೊದಲಿನಿಂದಲು ಇದ್ದು, ಇದು ರಾಜಕೀಯ ಕೊಲೆಗಳ ಕೇಂದ್ರ ಭಾಗ ಎಂದು ತಿಳಿಯಲಾಗಿದೆ.
ಈ ಪ್ರಕರಣದಲ್ಲಿ ಜಯರಾಜನ್ ಜಾಮೀನು ಪಡೆದಿದ್ದಾರೆ.
