ಪಾಕ್ ಪ್ರಧಾನಿ ಮಾರಾಟಕ್ಕಿದ್ದಾರೆ, ನವಾಜ್ ಷರೀಫ್ ಬೆಲೆ 62 ಲಕ್ಷ!

ಲಂಡನ್: ಇಂಗ್ಲೆಂಡ್ ನ ಇಕಾಮರ್ಸ್ ವೆಬ್ ಸೈಟ್ ಇಬೇ ಪಾಕಿಸ್ತಾನ ಪ್ರಧಾನಮಂತ್ರಿ ನವಾಜ್ ಷರೀಫ್ ಅವರನ್ನು ಮಾರಾಟಕ್ಕಿಟ್ಟಿದ್ದು, ಅವರಿಗೆ 66,200 ಪೌಂಡ್(ಸುಮಾರು 62 ಲಕ್ಷ ರುಪಾಯಿ) ಬೆಲೆ ನಿಗದಿಪಡಿಸಿದೆ.

ಆರೋಗ್ಯದ ಸಮಸ್ಯೆಯಿಂದ ಸದ್ಯ ಲಂಡನ್​ನಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಷರೀಫ್​ಅವರನ್ನು ಆನ್​ಲೈನ್ ಮಾರುಕಟ್ಟೆಯಲ್ಲಿ ಮಾರಾಟಕ್ಕಿಡಲಾಗಿದೆ. ಅಷ್ಟೇ ಅಲ್ಲ ಷರೀಫ್ ಒಬ್ಬ ನಿರುಪಯೋಗಿ, ನಿಸ್ತೇಜ ಪ್ರಧಾನಿ ಎಂದು ವೆಬ್ ಪುಟದಲ್ಲಿ ಬರೆಯಲಾಗಿದೆ. ಈ ರೀತಿ ಪ್ರಧಾನಿಯನ್ನು ಮಾರಾಟಕ್ಕಿಡಲು ಮುಖ್ಯ ಕಾರಣ ಷರೀಫ್ ನಡೆಸಿದ ಭ್ರಷ್ಟಾಚಾರ.

ಕೆಲವು ದಿನಗಳ ಹಿಂದೆ ಬಹಿರಂಗವಾದ ‘ಪನಾಮಾ ಪತ್ರ’ಗಳಲ್ಲಿ ಪಾಕಿಸ್ತಾನದ ಪ್ರಧಾನಿ ನವಾಜ್ ಷರೀಫ್ ಕುಟುಂಬದ ಹೆಸರು ಹಾಗೂ ಮಾಜಿ ಪ್ರಧಾನಿ ಬೆನಜೀರ್ ಭುಟ್ಟೊ ಹೆಸರು ಉಲ್ಲೇಖಗೊಂಡಿತ್ತು. ಬ್ರಿಟಿಷ್ ವರ್ಜಿನ್ ಐಲ್ಯಾಂಡ್ಸ್​ನಲ್ಲಿ ನವಾಜ್ ಷರೀಫ್​ರ ಇಬ್ಬರು ಪುತ್ರರು, ಪುತ್ರಿ ಕಂಪನಿ ಸ್ಥಾಪಿಸಿದ್ದು, ಈ ಕಂಪನಿ ಲಂಡನ್​ನಲ್ಲಿ ಕನಿಷ್ಠ ಆರು ಸ್ವತ್ತುಗಳನ್ನು ಹೊಂದಿದೆ. ಈ ಪೈಕಿ ಕೆಲವನ್ನು ಡಾಯ್ಚ ಬ್ಯಾಂಕ್​ಗೆ ಅಡವಿಟ್ಟು 66 ಕೋಟಿ ರುಪಾಯಿ ಪಡೆದಿರುವುದು ಬೆಳಕಿಗೆ ಬಂದಿತ್ತು.

ಈ ಕಾರಣಕ್ಕಾಗಿ ಇಬೇ ಪಾಕ್ ಪ್ರಧಾನಿಗೆ ಹಣ ನಿಗದಿ ಮಾಡಿ ಮಾರಾಟಕ್ಕಿಡಲಾಗಿದೆ. ವಿಶೇಷವೆಂದರೇ ಷರೀಫ್​ಗಾಗಿ ಈಗಾಗಲೇ ನೂರು ಜನ ಬಿಡ್ ಮಾಡಿದ್ದಾರೆ.