ಢಾಕಾ: ಬಾಂಗ್ಲಾದೇಶದಲ್ಲಿ ಪ್ರಾಧ್ಯಾಪಕರರೊಬ್ಬರನ್ನು ಮಾರಕಾಸ್ತ್ರಗಳಿಂದ ಕೊಚ್ಚಿ ಹತ್ಯೆ ಮಾಡಲಾಗಿದೆ. ರಾಜ್‌ಶಾಹಿ ನಗರದಲ್ಲಿ ಶನಿವಾರ ಬೆಳಿಗ್ಗೆ ಈ ದುರ್ಘಟನೆ ನಡೆದಿದೆ.
58 ವರ್ಷ ವಯಸ್ಸಿವ ಎಎಫ್‌ಎಂ ರೆಜೌಲ್‌ ಕರೀಮ್ ಸಿದ್ಧಿಕಿ ಮೃತ ಪ್ರಾಧ್ಯಾಪಕ. ರಾಜ್‌ಶಾಹಿ ವಿಶ್ವವಿದ್ಯಾಲಯದಲ್ಲಿ ಇಂಗ್ಲಿಷ್‌ ಪ್ರಾಧ್ಯಾಪಕರಾಗಿ ಕಾರ್ಯನಿರ್ವಹಿಸುತ್ತಿದ್ದರು.ಅವರನ್ನು ಅವರ ಮನೆಯಿಂದ 50 ಮೀಟರ್‌ ದೂರದಲ್ಲೇ ಹತ್ಯೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸಿದ್ಧಿಕಿ ಅವರ ಮೇಲೆ ಮಾರಾಕಾಸ್ತ್ರಗಳಿಂದ ದಾಳಿ ನಡೆಸಿರುವ ಅಪರಿಚಿತ ದುಷ್ಕರ್ಮಿಗಳು, ಅವರನ್ನು ಸಲ್ಬಾಗನ್‌ ಪ್ರದೇಶದ ಬಟ್ಟಾಲಾ ಕ್ರಾಸ್‌ನಲ್ಲಿ ಬಿಟ್ಟುಹೋಗಿದ್ದಾರೆ ಎಂದು ಪೊಲೀಸ್ ಅಧಿಕಾರಿ ಶಾಹದತ್‌ ಹುಸೇನ್‌ ತಿಳಿಸಿರುವುದಾಗಿ ಮಾಧ್ಯಮವೊಂದು ವರದಿ ಮಾಡಿದೆ.
ಹತ್ಯೆಗೆ ಕಾರಣ ತಿಳಿದು ಬಂದಿಲ್ಲ. ಇದುವರೆಗೂ ಯಾವುದೇ ಸಂಘಟನೆಗಳು ಘಟನೆ ಹೊಣೆ ಹೊತ್ತುಕೊಂಡಿಲ್ಲ. ಎರಡು ವರ್ಷ ಹಿಂದೆ ಅದೇ ವಿಶ್ವವಿದ್ಯಾಲಯದ ಬೋಧಕರಾಗಿದ್ದ ಎಕೆಎಂ ಶಫಿವುಲ್ಲಾ ಇಸ್ಲಾಂ ಅವರನ್ನೂ ಹೀಗೇ ಕೊಲೆ ಮಾಡಲಾಗಿತ್ತು.
ಕೆಲವು ವರ್ಷಗಳ ಹಿಂದೆ ರಾಜ್‌ಶಾಹಿ ವಿಶ್ವವಿದ್ಯಾಲಯದ ಇಬ್ಬರು ಪ್ರಾಧ್ಯಾಪಕರನ್ನು ಹತ್ಯೆ ಮಾಡಲಾಗಿತ್ತು. ಕಳೆದ ಕೆಲವು ತಿಂಗಳಿನಿಂದ ಬಾಂಗ್ಲಾದೇಶದಲ್ಲಿ ಅಲ್ಪಸಂಖ್ಯಾತರು, ಜಾತ್ಯತೀತ ಬ್ಲಾಗರ್‌ಗಳು ಹಾಗೂ ವಿದೇಶಿಗರನ್ನು ಗುರಿಯಾಗಿಸಿಕೊಂಡು ವ್ಯವಸ್ಥಿತ ದಾಳಿ ನಡೆಯುತ್ತಿದೆ.
