ಶಾಲೆಗಳ ಮೇಲೆ ದಾಳಿಯ ಎಚ್ಚರಿಕೆ ನೀಡಿದ ಪಾಕ್ ವಿವಿ ದಾಳಿಕೋರರು

ಇಸ್ಲಾಮಾಬಾದ್: ಕಳೆದ ಬುಧವಾರ ಪಾಕಿಸ್ತಾನದ ಬಚಾಖಾನ್ ವಿಶ್ವವಿದ್ಯಾಲದ ಮೇಲೆ ದಾಳಿ ಮಾಡಿದ್ದ ತಾಲಿಬಾನ್ ಉಗ್ರರು, ಈಗ ದೇಶಾದ್ಯಂತ ಇರುವ ಶಾಲೆಗಳ ಹಾಗೂ ನರ್ಸರಿಗಳ ಮೇಲೆ ದಾಳಿ ಮಾಡುವುದಾಗಿ ಶುಕ್ರವಾರ ಎಚ್ಚರಿಸಿದೆ.

ಈ ಸಂಬಂಧ ತೆಹ್ರೀಕ್ ಇ ತಾಲಿಬಾನ್ ಪಾಕಿಸ್ತಾನ(ಟಿಟಿಪಿ) ಉಗ್ರ ಸಂಘಟನೆ ಬಿಡುಗಡೆ ಮಾಡಿರುವ ವಿಡಿಯೋ ಫೇಸ್ ಬುಕ್ ನಲ್ಲಿ ವೈರಲ್ ಆಗಿದ್ದು, ವಿಡಿಯೋದಲ್ಲಿ ಖಲಿಫಾ ಉಮಪ್ ಮನ್ಸೂರ್ ಶಾಲೆಗಳ ಮೇಲೆ ದಾಳಿ ಮಾಡುವ ಮೂಲಕ ಅಲ್ಲಾನ ಕಾನೂನು ಪ್ರಶ್ನಿಸುವವರಿಗೆ ಪಾಠ ಕಲಿಸುವುದಾಗಿ ಎಚ್ಚರಿಸಿದ್ದಾನೆ. ಇದೇ ಮನ್ಸೂರ್ ಬಚಾಖಾನ್ ವಿವಿ ಮೇಲೆ ಟಿಟಿಪಿ ದಾಳಿ ಮಾಡಿರುವುದಾಗಿ ಹೇಳಿಕೊಂಡಿದ್ದ.

ಪಾಕಿಸ್ತಾನದ ಚರ್ಸಾದ್ದಾ ಜಿಲ್ಲೆಯ ಬಚಾಖಾನ್ ವಿಶ್ವವಿದ್ಯಾಲಯದ ಮೇಲೆ ನಡೆದ ದಾಳಿಯಲ್ಲಿ ಕನಿಷ್ಟ 21 ಮಂದಿ ಮೃತಪಟ್ಟಿದ್ದರು ಮತ್ತು 30ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದರು.