ಕಾಬುಲ್: ಅಫ್ಘಾನಿಸ್ಥಾನ ಗಝನಿ ನಗರದ ನ್ಯಾಯಾಲಯ ಆವರಣದ ಮೇಲೆ ಬುಧವಾರ ದಾಳಿ ಮಾಡಿದ ತಾಲಿಬಾನ್ ಉಗ್ರರು ಪೊಲೀಸರೊಂದಿಗೆ ನಡೆಸಿದ ಘರ್ಷಣೆಯಲ್ಲಿ ಐವರು ಉಗ್ರರು ಸೇರಿದಂತೆ ೧೦ ಜನ ಹತರಾಗಿದ್ದಾರೆ.
ಮಹಿಳೆಯೊಬ್ಬರು ಸೇರಿದಂತೆ ೧೨ ಜನ ಗಾಯಗೊಂಡಿದ್ದಾರೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.
ಆತ್ಮಹತ್ಯಾ ಬಾಂಬರ್ ಗಳು ಕೋರ್ಟ್ ಆವರಣಕ್ಕೆ ದಾಳಿಯಿಟ್ಟಾಗ, ಪೊಲೀಸರು ಅವರ ಮೇಲೆ ನಡೆಸಿದ ಪ್ರತಿರೋಧದ ದಾಳಿಯಲ್ಲಿ ಎಲ್ಲ ದಾಳಿಕೋರರು ಮೃತಪಟ್ಟಿದ್ದಾರೆ ಎಂದು ಪ್ರಾಂತ್ಯದ ಪೊಲೀಸ್ ಮುಖ್ಯಸ್ಥ ಅಮೀನುಲ್ಲ ಅಮರ್ಖಿಲ್ ತಿಳಿಸಿದ್ದಾರೆ.
ರಕ್ಷಣಾ ದಳಗಳು ಬಾಂಬ್ ನಿಷ್ಕ್ರಿಯಗೊಳಿಸಿವೆ ಎಂದು ತಿಳಿಯಲಾಗಿದೆ. ಅಮೆರಿಕಾದ ಡ್ರೋನ್ ದಾಳಿಯಲ್ಲಿ ತಾಲಿಬಾನ್ ಮುಖ್ಯಸ್ಥ ಮುಲ್ಲಾ ಅಖ್ತರ್ ಮನ್ಸೂರ್ ಹತ್ಯೆಯಾದ ಮೇಲೆ ದ್ವೇಷ ಸಾಧಿಸಲು ಹವಣಿಸುತ್ತಿರುವ ತಾಲಿಬಾನ್ ದಾಳಿಗಳನ್ನು ಹೆಚ್ಚಿಸಿದೆ.
