ಢಾಕಾ(ಬಾಂಗ್ಲಾದೇಶ): ಇತ್ತೀಚಿನ ಅವ್ಯಾಹತ ಮಳೆ ಮತ್ತು ಭೂ ಕುಸಿತದಿಂದಾಗಿ ಬಾಂಗ್ಲಾದೇಶದಲ್ಲಿ ಮೃತಪಟ್ಟ ನಾಗರಿಕರ ಸಂಖ್ಯೆ 156ಕ್ಕೇರಿದ್ದು, ರಂಗಮತಿಯ ವಿವಿಧ ಪ್ರದೇಶಗಳಿಂದ ನಾಲ್ಕು ಮೃತ ದೇಹಗಳನ್ನು ಅಗ್ನಿಶಾಮಕ ಸಿಬ್ಬಂದಿ ಇಂದು ಹೊರತೆಗೆದಿದ್ದಾರೆ.
ಮಳೆ ಮತ್ತು ಭೂ ಕುಸಿತಕ್ಕೆ ರಂಗಮತಿ ಪ್ರದೇಶವೊಂದರಲ್ಲಿಯೇ ಮೃತಪಟ್ಟವರ ಸಂಖ್ಯೆ 114ಕ್ಕೇರಿದೆ ಎಂದು ಢಾಕಾ ಟ್ರಿಬ್ಯೂನ್ ವರದಿ ಮಾಡಿದೆ. ರಂಗಮತಿಯಲ್ಲಿ ದಿನನಿತ್ಯದ ರಕ್ಷಣಾ ಕಾರ್ಯವನ್ನು ಸ್ಥಳೀಯ ಜಿಲ್ಲಾಡಳಿತ ಹಿಂತೆಗೆದುಕೊಂಡಿದೆ. ನಿಖರ ಮಾಹಿತಿ ಆಧಾರದ ಮೇರೆಗೆ ಅಗ್ನಿಶಾಮಕ ಸಿಬ್ಬಂದಿ ಇನ್ನು ರಕ್ಷಣಾ ಕಾರ್ಯ ನಡೆಸಲಿದೆ.
ಬಾಂಗ್ಲಾದೇಶದ ಚಿತ್ತಗಾಂಗ್, ರಂಗಮತಿ ಮತ್ತು ಬಂದರ್ಬಾನ್ ಪರ್ವತ ಪ್ರದೇಶದಲ್ಲಿ ಅನೇಕ ಮಂದಿ ಕಳೆದ ಮಂಗಳವಾರ ಮೃತಪಟ್ಟಿದ್ದರು. ಇನ್ನೂ ಅನೇಕ ಮಂದಿ ಗಾಯಗೊಂಡಿದ್ದು, ಹಲವರು ಕಾಣೆಯಾಗಿದ್ದಾರೆ.
ಚಿತ್ತಗಾಂಗ್ ಪರ್ವತ ಟ್ರಾಕ್ಟ್ಸ್ ಬಳಿ 300 ಮಿಲಿ ಮೀಟರ್ ಗೂ ಅಧಿಕ ಮಳೆಯಾಗಿತ್ತು. ಚಿತ್ತಗಾಂಗ್ ಒಂದರಲ್ಲಿಯೇ 222 ಮಿಲಿ ಮೀಟರ್ ಮಳೆಯಾಗಿದೆ.
ಇತ್ತೀಚಿನ ವರ್ಷಗಳಲ್ಲಿ ಇಷ್ಟೊಂದು ಮಳೆ ಇಲ್ಲಿ ಬಂದಿರಲೇ ಇಲ್ಲ ಎಂದು ವಿಪತ್ತು ನಿರ್ವಹಣಾ ಇಲಾಖೆಯ ಮಹಾ ನಿರ್ದೇಶಕ ರಿಯಾಜ್ ಅಹ್ಮದ್ ತಿಳಿಸಿದ್ದಾರೆ.
ಸ್ಥಳೀಯ ಜಿಲ್ಲಾಡಳಿತ ಅನೇಕ ಆಶ್ರಯ ಮನೆಗಳನ್ನು ಜನರಿಗಾಗಿ ತೆರೆದಿದ್ದು, 20 ಭೂ ಕುಸಿತ ತಾಣಗಳಿಂದ ಜನರನ್ನು ಸ್ಥಳಾಂತರಗೊಳಿಸಿ ರಕ್ಷಿಸಲಾಗಿದೆ.
ಕಳೆದ ಮಂಗಳವಾರ ರಂಗಮತಿಯ ಮಣಿಕ್ ಚಾರಿ ರಸ್ತೆಯನ್ನು ತೆರವುಗೊಳಿಸುತ್ತಿರುವಾಗ ಭೂ ಕುಸಿತಕ್ಕೆ ಸಿಲುಕಿ ನಾಲ್ಕು ಸೇನಾ ಸಿಬ್ಬಂದಿಯನ್ನು ತೆರವುಗೊಳಿಸಿದ್ದಾರೆ.
ಬಾಂಗ್ಲಾದೇಶ ಅಧ್ಯಕ್ಷ ಅಬ್ದುಲ್ ಹಮೀದ್ ಮತ್ತು ಪ್ರಧಾನ ಮಂತ್ರಿ ಶೇಖ್ ಹಸೀನಾ ಹುತಾತ್ಮರಾದ ಸೇನಾ ಸಿಬ್ಬಂದಿ ಸೇರಿದಂತೆ ಮೃತಪಟ್ಟ ಜನರಿಗೆ ಕಂಬನಿ ಮಿಡಿದಿದ್ದಾರೆ.
