ಗ್ವಾದರ್ನ ಜಿವಾನಿ ಪ್ರದೇಶದ ಪನ್ವಾನ್ನಲ್ಲಿರುವ ಪಾಕಿಸ್ತಾನ ಕರಾವಳಿ ಕಾವಲು ಪಡೆಯ ಶಿಬಿರದ ಮೇಲೆ ನಡೆದ ಮಾರಕ ಆತ್ಮಹತ್ಯಾ ದಾಳಿಯ ಹೊಣೆಯನ್ನು ಬಲೂಚಿಸ್ತಾನ್ ಲಿಬರೇಶನ್ ಆರ್ಮಿ (BLA) ಹೊತ್ತುಕೊಂಡಿದೆ. ದಿ ಬಲೂಚಿಸ್ತಾನ್ ಪೋಸ್ಟ್ ಪ್ರಕಾರ, ಪ್ರತ್ಯೇಕತಾವಾದಿ ಗುಂಪು ದಾಳಿಯಲ್ಲಿ 30ಕ್ಕೂ ಹೆಚ್ಚು ಪಾಕಿಸ್ತಾನಿ ಸೈನಿಕರು ಸಾವನ್ನಪ್ಪಿದ್ದು ಡಜನ್ಗಟ್ಟಲೆ ಸೈನಿಗರು ಗಾಯಗೊಂಡಿದ್ದಾರೆ ಎಂದು ಹೇಳಿಕೊಂಡಿದೆ.
ವರದಿಯ ಪ್ರಕಾರ, ಬಿಎಲ್ಎಯ ಖಾಸ್ ಮಜೀದ್ ಬ್ರಿಗೇಡ್ ಶುಕ್ರವಾರ ಸಂಜೆ ಅಪಾಯಕಾರಿ ಕಾರ್ಯಾಚರಣೆಯನ್ನು ನಡೆಸಿತು. BLAನ ಆತ್ಮಾಹತ್ಯಾ ಬಾಂಬರ್ ಅತಾವುಲ್ಲಾ ಬಲೂಚ್ ಅಲಿಯಾಸ್ ಅಜ್ಮಲ್ ಸ್ಫೋಟಕಗಳನ್ನು ತುಂಬಿದ ಮಜ್ದಾ ಟ್ರಕ್ ಅನ್ನು ನಿನ್ನೆ ಸಂಜೆ 6:32ರ ಸುಮಾರಿಗೆ ಕೋಟೆಯ ಕರಾವಳಿ ಕಾವಲು ಪಡೆಯ ಶಿಬಿರಕ್ಕೆ ಡಿಕ್ಕಿ ಹೊಡೆದು ಭಾರಿ ಸ್ಫೋಟಕ್ಕೆ ಕಾರಣವಾಯಿತು. ಈ ಬೃಹತ್ ಸ್ಫೋಟವು ಕೋಟೆಯ ಕರಾವಳಿ ಕಾವಲು ಪಡೆಯ ಶಿಬಿರವನ್ನು ಸಂಪೂರ್ಣವಾಗಿ ನಾಶಮಾಡಿತು ಎಂದು ಬಿಎಲ್ಎ ವಕ್ತಾರ ಜಿಯಂದ್ ಬಲೂಚ್ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಬಿಎಲ್ಎಯ ಮಾಧ್ಯಮ ವಿಭಾಗವಾದ ಹಕ್ಕಲ್ 43 ಸೆಕೆಂಡುಗಳ ವೀಡಿಯೊ ಕ್ಲಿಪ್ ಅನ್ನು ಬಿಡುಗಡೆ ಮಾಡಿದೆ. ಸ್ಫೋಟಕಗಳನ್ನು ತುಂಬಿದ ಟ್ರಕ್ ಒಂದು ಬೃಹತ್ ಸ್ಫೋಟ ಸಂಭವಿಸುವ ಕೆಲವೇ ಕ್ಷಣಗಳ ಮೊದಲು ಶಿಬಿರದ ಆವರಣಕ್ಕೆ ಪ್ರವೇಶಿಸುತ್ತಿರುವುದನ್ನು ಇದು ತೋರಿಸುತ್ತದೆ. ನಂತರ ಚಾನೆಲ್ ಹಂಚಿಕೊಂಡ ದೃಶ್ಯಗಳಲ್ಲಿ ಮಿಲಿಟರಿ ರಚನೆಯ ಹೆಚ್ಚಿನ ಭಾಗವು ಸಂಪೂರ್ಣವಾಗಿ ನಾಶವಾಗಿದೆ ಎಂದು ತೋರಿಸಲಾಗಿದೆ.
ಗಾಯಗೊಂಡವರು ಮತ್ತು ಅವಶೇಷಗಳ ಅಡಿಯಲ್ಲಿ ಸಿಲುಕಿರುವವರ ಗಂಭೀರ ಸ್ಥಿತಿಯನ್ನು ಗಮನಿಸಿದರೆ, ಪಾಕಿ ಸೈನಿಕರ ಸಾವುನೋವುಗಳ ಸಂಖ್ಯೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು BLA ಹೇಳಿದೆ. ಬಿಎಲ್ಎ ಶೀಘ್ರದಲ್ಲೇ ಕಾರ್ಯಾಚರಣೆಯ ಸಂಪೂರ್ಣ ವಿವರಗಳನ್ನು ತನ್ನ ಅಧಿಕೃತ ಮಾರ್ಗಗಳ ಮೂಲಕ ಬಿಡುಗಡೆ ಮಾಡುವುದಾಗಿ ಹೇಳಿದೆ. ಬಲೂಚಿಸ್ತಾನಕ್ಕೆ ಸಂಪೂರ್ಣ ಸ್ವಾತಂತ್ರ್ಯ ನೀಡುವ ತನ್ನ ಅಂತಿಮ ಗುರಿಯನ್ನು ಸಾಧಿಸುವವರೆಗೆ ಪಾಕಿಸ್ತಾನಿ ಭದ್ರತಾ ಪಡೆಗಳನ್ನು ಗುರಿಯಾಗಿಸಿಕೊಂಡು ತನ್ನ ಸಶಸ್ತ್ರ ಕಾರ್ಯಾಚರಣೆಯು ಅದೇ ತೀವ್ರತೆಯಿಂದ ಮುಂದುವರಿಯುತ್ತದೆ ಎಂದು ನಿಷೇಧಿತ ಸಂಘಟನೆ ಹೇಳಿದೆ.
