ವಾಷಿಂಗ್ಟನ್: ಗಾಜಾ ಯುದ್ಧಕ್ಕೆ ಅಂತ್ಯ ಹಾಡುವ ದಿಕ್ಕಿನಲ್ಲಿ ಮಹತ್ವದ ಬೆಳವಣಿಗೆಯೊಂದನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ.
ಹಮಾಸ್ ತನ್ನ ಶಸ್ತ್ರಾಸ್ತ್ರಗಳನ್ನು ತ್ಯಜಿಸಲು ಹಾಗೂ ಇಸ್ರೇಲ್ ತನ್ನ ಪಡೆಗಳನ್ನು ಗಾಜಾದಿಂದ ಹಂತ ಹಂತವಾಗಿ ಹಿಂಪಡೆಯಲು ಒಪ್ಪಂದಕ್ಕೆ ಬರಲಾಗಿದೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಆದರೆ, ಹಮಾಸ್ ಹಾಗೂ ಇಸ್ರೇಲ್ ಎರಡೂ ಈ ಒಪ್ಪಂದವನ್ನು ಅಧಿಕೃತವಾಗಿ ದೃಢಪಡಿಸಿಲ್ಲ.
ಈ ಘೋಷಣೆ ಅಮೆರಿಕ ಮಧ್ಯಸ್ಥಿಕೆಯಲ್ಲಿ ನಡೆದ ಕದನ ವಿರಾಮ ಒಪ್ಪಂದಕ್ಕೆ ಸುಮಾರು ಒಂಬತ್ತು ತಿಂಗಳುಗಳಾದ ನಂತರ ಹೊರಬಂದಿದೆ. ಕದನ ವಿರಾಮದ ಎರಡನೇ ಹಂತದ ಅನುಷ್ಠಾನ, ಹಮಾಸ್ ನಿಶಸ್ತ್ರೀಕರಣ, ಗಾಜಾ ಪುನರ್ನಿರ್ಮಾಣ ಹಾಗೂ ಆಡಳಿತ ವರ್ಗಾವಣೆ ಕುರಿತಂತೆ ಇಸ್ರೇಲ್ ಮತ್ತು ಹಮಾಸ್ ನಡುವೆ ಮಾತುಕತೆಗಳು ಹಲವು ತಿಂಗಳುಗಳಿಂದ ಸ್ಥಗಿತಗೊಂಡಿದ್ದವು.
ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಣೆ ನೀಡಿರುವ ಟ್ರಂಪ್, "ಒಪ್ಪಂದವನ್ನು ಎಚ್ಚರಿಕೆಯಿಂದ ರೂಪಿಸಲಾದ ವಿವಿಧ ಹಂತಗಳಲ್ಲಿ ಜಾರಿಗೆ ತರಲಾಗುತ್ತದೆ. ಹಮಾಸ್ ನಿಶಸ್ತ್ರೀಕರಣ ಪೂರ್ಣಗೊಂಡಂತೆ ಇಸ್ರೇಲ್ ಸೇನೆ ಗಾಜಾದಿಂದ ಹಿಂತೆಗೆದುಕೊಳ್ಳಲಿದೆ. ಬಳಿಕ ಅಂತರರಾಷ್ಟ್ರೀಯ ಸ್ಥಿರೀಕರಣ ಪಡೆ ಹಾಗೂ ಹೊಸ ಪ್ಯಾಲೆಸ್ಟೀನಿಯನ್ ಪೊಲೀಸ್ ಪಡೆ ಗಾಜಾದ ಭದ್ರತೆಯ ಜವಾಬ್ದಾರಿಯನ್ನು ವಹಿಸಿಕೊಳ್ಳಲಿದೆ" ಎಂದು ಹೇಳಿದ್ದಾರೆ.
ಟ್ರಂಪ್ ಮಂಡಿಸಿರುವ 20 ಅಂಶಗಳ ಕದನ ವಿರಾಮ ಯೋಜನೆಯಲ್ಲಿ ಹಮಾಸ್ ತನ್ನ ಎಲ್ಲ ಶಸ್ತ್ರಾಸ್ತ್ರಗಳನ್ನು ಒಪ್ಪಿಸಬೇಕು, ಗಾಜಾದಾದ್ಯಂತ ನಿರ್ಮಿಸಿರುವ ಸುರಂಗ ಜಾಲವನ್ನು ಧ್ವಂಸಗೊಳಿಸಬೇಕು, ಇಸ್ರೇಲ್ ಸೇನೆ ಹಿಂಪಡೆಯಬೇಕು, ತಾಂತ್ರಿಕ ಪರಿಣಿತರನ್ನೊಳಗೊಂಡ ಹೊಸ ಪ್ಯಾಲೆಸ್ಟೀನಿಯನ್ ಆಡಳಿತ ರಚನೆಯಾಗಬೇಕು ಹಾಗೂ ಅಂತರರಾಷ್ಟ್ರೀಯ ಭದ್ರತಾ ಪಡೆ ನಿಯೋಜನೆಯಾಗಬೇಕು ಎಂದು ಪ್ರಸ್ತಾಪಿಸಲಾಗಿದೆ. ಎರಡು ವರ್ಷಗಳಿಗೂ ಹೆಚ್ಚು ಕಾಲ ನಡೆದ ಯುದ್ಧದಿಂದ ತೀವ್ರ ಹಾನಿಗೊಳಗಾದ ಗಾಜಾದ ಪುನರ್ನಿರ್ಮಾಣವೂ ಈ ಯೋಜನೆಯ ಪ್ರಮುಖ ಭಾಗವಾಗಿದೆ.
ಆದರೆ, ಹಮಾಸ್ ಇದುವರೆಗೆ ಮೊದಲ ಹಂತದ ಕದನ ವಿರಾಮ ಸಂಪೂರ್ಣ ಜಾರಿಯಾದ ಬಳಿಕವೇ ತನ್ನ ಶಸ್ತ್ರಾಸ್ತ್ರಗಳ ಕುರಿತು ಚರ್ಚೆ ನಡೆಸುವುದಾಗಿ ಹೇಳುತ್ತಾ ಬಂದಿದೆ. ಹಮಾಸ್ನ ಮೂಲ ತತ್ವವೇ ಇಸ್ರೇಲ್ ವಿರುದ್ಧ ಸಶಸ್ತ್ರ ಹೋರಾಟವಾಗಿರುವುದರಿಂದ, ರಾಕೆಟ್ಗಳು, ಟ್ಯಾಂಕ್ ವಿರೋಧಿ ಕ್ಷಿಪಣಿಗಳು, ಸ್ಫೋಟಕಗಳು ಸೇರಿದಂತೆ ತನ್ನ ಸೇನಾ ಸಾಮರ್ಥ್ಯವನ್ನು ಬಿಟ್ಟುಕೊಡಲು ಸಂಘಟನೆ ಇದುವರೆಗೆ ಹಿಂದೇಟು ಹಾಕಿದೆ.
ಆದಾಗ್ಯೂ, ಈ ತಿಂಗಳ ಆರಂಭದಲ್ಲಿ ಹಮಾಸ್ ಗಾಜಾದಲ್ಲಿನ ತನ್ನ ಆಡಳಿತವನ್ನು ವಿಸರ್ಜಿಸಿರುವುದಾಗಿ ಹಾಗೂ ವಿಶ್ವಸಂಸ್ಥೆಯ ಬೆಂಬಲದ ತಾಂತ್ರಿಕ ಸಮಿತಿಗೆ ಆಡಳಿತ ವರ್ಗಾಯಿಸಲು ಸಿದ್ಧವಿರುವುದಾಗಿ ಘೋಷಿಸಿತ್ತು. ಇದನ್ನು ಕದನ ವಿರಾಮ ಪ್ರಕ್ರಿಯೆಯ ಭಾಗವೆಂದು ಪರಿಗಣಿಸಲಾಗಿದೆ.
ಶ್ವೇತಭವನದ ಮಾರ್ಗಸೂಚಿಯಂತೆ ಹೆಸರು ಬಹಿರಂಗಪಡಿಸದ ಷರತ್ತಿನಡಿ ಅಮೆರಿಕದ ಅಧಿಕಾರಿಗಳು ಹಾಗೂ 'ಬೋರ್ಡ್ ಆಫ್ ಪೀಸ್' ಅಧಿಕಾರಿಗಳು ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದು, ಟ್ರಂಪ್ ವಿವರಿಸಿದಂತೆಯೇ ಒಪ್ಪಂದ ಹಂತ ಹಂತವಾಗಿ ಜಾರಿಯಾಗಲಿದೆ ಎಂದು ಹೇಳಿದ್ದಾರೆ.
ಗಾಜಾದ ಪೊಲೀಸ್ ಪಡೆ ಮುಂದಿನ ಎರಡು ವಾರಗಳಲ್ಲಿ ತನ್ನ ಬಳಿ ಇರುವ ಶಸ್ತ್ರಾಸ್ತ್ರಗಳನ್ನು ಹೊಸ ತಾಂತ್ರಿಕ ಆಡಳಿತಕ್ಕೆ ಒಪ್ಪಿಸಲಿದೆ ಎಂದು ಅವರು ತಿಳಿಸಿದ್ದಾರೆ.
ಆದರೆ, ಗಾಜಾ ಪಡೆಯ ಬಳಿ ಇರುವ ಶಸ್ತ್ರಾಸ್ತ್ರಗಳು ಸೀಮಿತ ಪ್ರಮಾಣದಲ್ಲಿದ್ದು, ಹಮಾಸ್ನ ಬಹುಪಾಲು ಉಗ್ರರು ಹಾಗೂ ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳು ಈ ಪ್ರಕ್ರಿಯೆಯಲ್ಲಿ ಸೇರಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ಹಮಾಸ್ನ ಭಾರೀ ಶಸ್ತ್ರಾಸ್ತ್ರಗಳ ಶರಣಾಗತಿ, ಸುರಂಗ ಮಾರ್ಗಗಳ ನಿಷ್ಕ್ರಿಯಗೊಳಿಸುವಿಕೆ ಹಾಗೂ ಸೇನಾ ಮೂಲಸೌಕರ್ಯಗಳ ತೆರವು ಪ್ರಕ್ರಿಯೆ ನಂತರದ ಹಂತಗಳಲ್ಲಿ ನಡೆಯಲಿದ್ದು, ಇದಕ್ಕೆ ಸುಮಾರು 200 ರಿಂದ 350 ದಿನಗಳವರೆಗೆ ಸಮಯ ಬೇಕಾಗಬಹುದು ಎಂದು 'ಬೋರ್ಡ್ ಆಫ್ ಪೀಸ್' ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಅಮೆರಿಕದ ಹಿರಿಯ ಅಧಿಕಾರಿಯೊಬ್ಬರ ಪ್ರಕಾರ, ಮಾತುಕತೆಯ ಪ್ರತಿಯೊಂದು ಹಂತದಲ್ಲೂ ಇಸ್ರೇಲ್ ಸರ್ಕಾರವನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಲಾಗಿದೆ. ಹಮಾಸ್ ನಿಜವಾಗಿಯೂ ಶಸ್ತ್ರಾಸ್ತ್ರಗಳನ್ನು ತ್ಯಜಿಸುವುದೇ ಎಂಬ ಬಗ್ಗೆ ಇಸ್ರೇಲ್ಗೆ ಇನ್ನೂ ಅನುಮಾನಗಳಿದ್ದರೂ, ಟ್ರಂಪ್ ಮಂಡಿಸಿದ್ದ ಮೂಲ ಯೋಜನೆಯಲ್ಲಿದ್ದ ಷರತ್ತುಗಳಿಗಿಂತ ಹೆಚ್ಚುವರಿ ಯಾವುದೇ ಬದ್ಧತೆಯನ್ನು ಇಸ್ರೇಲ್ನಿಂದ ಕೇಳಿಲ್ಲ ಎಂದು ಅವರು ಹೇಳಿದ್ದಾರೆ.
ಇದರಲ್ಲಿ ಇಸ್ರೇಲ್ ತನ್ನ ಪಡೆಗಳನ್ನು ಗಾಜಾದಿಂದ ಹಿಂತೆಗೆದುಕೊಳ್ಳುವುದು ಹಾಗೂ ವೈಮಾನಿಕ ದಾಳಿಗಳನ್ನು ನಿಲ್ಲಿಸುವ ಬದ್ಧತೆಯನ್ನು ಪಾಲಿಸಬೇಕಾಗಿದೆ. ಆದರೆ, ಈ ಬಗ್ಗೆ ಇಸ್ರೇಲ್ನ ವಿಶ್ವಸಂಸ್ಥೆ ಪ್ರತಿನಿಧಿ ಕಚೇರಿ ತಕ್ಷಣ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ಇನ್ನೊಂದೆಡೆ, ಹಮಾಸ್ಗೆ ಬೆಂಬಲ ನೀಡುತ್ತಿರುವ ಇರಾನ್ ಈ ಪ್ರಕ್ರಿಯೆಯಲ್ಲಿ ಅನಿಶ್ಚಿತ ಅಂಶವಾಗಿ ಉಳಿದಿದೆ ಎಂದು ಅಮೆರಿಕದ ಅಧಿಕಾರಿಗಳು ತಿಳಿಸಿದ್ದಾರೆ. ಇರಾನ್ ಹಮಾಸ್ಗೆ ಒಪ್ಪಂದ ಒಪ್ಪಿಕೊಳ್ಳಬೇಡಿ ಎಂದು ಸಲಹೆ ನೀಡಿದ್ದರೂ, ಅಮೆರಿಕದೊಂದಿಗೆ ಉದ್ವಿಗ್ನತೆ ಹೆಚ್ಚಿರುವ ಹಿನ್ನೆಲೆಯಲ್ಲಿ ಹಮಾಸ್ಗೆ ಹೆಚ್ಚಿನ ಬೆಂಬಲ ನೀಡುವ ಸ್ಥಿತಿಯಲ್ಲಿ ಇಲ್ಲ ಎಂದು ಅವರು ಹೇಳಿದ್ದಾರೆ.
ಗಮನಾರ್ಹವಾಗಿ, 2023ರ ಅಕ್ಟೋಬರ್ 7ರಂದು ಹಮಾಸ್ ದಕ್ಷಿಣ ಇಸ್ರೇಲ್ ಮೇಲೆ ನಡೆಸಿದ ದಾಳಿಯಲ್ಲಿ ಸುಮಾರು 1,200 ಮಂದಿ ಸಾವನ್ನಪ್ಪಿದ್ದು, 251 ಮಂದಿಯನ್ನು ಒತ್ತೆಯಾಳುಗಳಾಗಿ ಕರೆದೊಯ್ಯಲಾಗಿತ್ತು. ಇದಕ್ಕೆ ಪ್ರತಿಯಾಗಿ ಇಸ್ರೇಲ್ ಆರಂಭಿಸಿದ ವ್ಯಾಪಕ ಸೇನಾ ಕಾರ್ಯಾಚರಣೆಯಲ್ಲಿ ಗಾಜಾದಲ್ಲಿ ಇದುವರೆಗೆ 73,000ಕ್ಕೂ ಹೆಚ್ಚು ಪ್ಯಾಲೆಸ್ಟೀನಿಯನ್ನರು ಸಾವನ್ನಪ್ಪಿದ್ದಾರೆ ಎಂದು ಗಾಜಾ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಪ್ರಸ್ತುತ ಇಸ್ರೇಲ್ ಸೇನೆ ಗಾಜಾದ ಅರ್ಧಕ್ಕಿಂತಲೂ ಹೆಚ್ಚು ಪ್ರದೇಶದ ಮೇಲೆ ನಿಯಂತ್ರಣ ಹೊಂದಿದ್ದು, ಲಕ್ಷಾಂತರ ಪ್ಯಾಲೆಸ್ಟೀನಿಯನ್ನರು ತಾತ್ಕಾಲಿಕ ಟೆಂಟ್ ಶಿಬಿರಗಳು ಹಾಗೂ ತೀವ್ರವಾಗಿ ಹಾನಿಗೊಳಗಾದ ನಗರ ಪ್ರದೇಶಗಳಲ್ಲಿ ಸಂಕಷ್ಟದ ಬದುಕು ನಡೆಸುತ್ತಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಟ್ರಂಪ್ ಘೋಷಿಸಿರುವ ಒಪ್ಪಂದ ಗಾಜಾದಲ್ಲಿ ಶಾಶ್ವತ ಶಾಂತಿ ಸ್ಥಾಪನೆಗೆ ದಾರಿ ಮಾಡಿಕೊಡುತ್ತದೆಯೇ ಅಥವಾ ಮತ್ತೊಂದು ಸುದೀರ್ಘ ಮಾತುಕತೆಯ ಹಂತಕ್ಕೆ ಮಾತ್ರ ಸೀಮಿತವಾಗುತ್ತದೆಯೇ ಎಂಬುದು ಮುಂದಿನ ದಿನಗಳಲ್ಲಿ ಸ್ಪಷ್ಟವಾಗಲಿದೆ.
