ಭಾನುವಾರ ಜಗತ್ತಿನಲ್ಲಿ ಲೋಹದ ಹಕ್ಕಿಗಳ ಪ್ರತ್ಯೇಕ ಅಪಘಾತ ಸಂಭವಿಸಿದೆ. ಈಶಾನ್ಯ ಫ್ರಾನ್ಸ್ನಲ್ಲಿ ಸ್ಕೈಡೈವಿಂಗ್ ವಿಮಾನ ಪತನಗೊಂಡು ಅದರಲ್ಲಿದ್ದ ಎಲ್ಲಾ 11 ಮಂದಿ ಸಾವನ್ನಪ್ಪಿದ್ದರೇ ಸೌದಿ ಅರೇಬಿಯಾದಲ್ಲಿ ಅರಾಮ್ಕೊಗೆ ಸೇರಿದ ಹೆಲಿಕಾಪ್ಟರ್ ಪತನಗೊಂಡು 14 ಮಂದಿ ಸಾವನ್ನಪ್ಪಿದ್ದಾರೆ.
ಸ್ಥಳೀಯ ಸಮಯ ಬೆಳಿಗ್ಗೆ 11:00 ಗಂಟೆಗೆ ನ್ಯಾನ್ಸಿ ನಗರದ ಬಳಿ ವಿಮಾನ ಪತನಗೊಂಡಿತ್ತು. ತುರ್ತು ಸೇವೆಗಳು ತಕ್ಷಣ ಆಗಮಿಸಿದ್ದು ಕಾರ್ಯಾಚರಣೆ ಆರಂಭಿಸಿದರು ಎಂದು ಮಾರ್ಥೆ-ಎಟ್-ಮೊಸೆಲ್ಲೆ ಪ್ರದೇಶದ ಮುಖ್ಯಸ್ಥ ಯೆವ್ಸ್ ಸೆಗುಯ್ ತಿಳಿಸಿದ್ದಾರೆ. ಅಪಘಾತದ ನಿಖರವಾದ ಕಾರಣ ತಿಳಿದಿಲ್ಲ. ತಾಂತ್ರಿಕ ದೋಷ, ಹವಾಮಾನ ಅಥವಾ ಇತರ ಕಾರಣಗಳಿಂದ ವಿಮಾನ ಪತನವಾಗಿದೆಯೇ ಎಂದು ತನಿಖಾ ಸಂಸ್ಥೆಗಳು ನಿರ್ಧರಿಸಲು ಪ್ರಯತ್ನಿಸುತ್ತಿವೆ. ಬ್ಲಾಕ್ ಬಾಕ್ಸ್ ಮತ್ತು ಇತರ ತಾಂತ್ರಿಕ ಡೇಟಾವನ್ನು ಪರಿಶೀಲಿಸಿದ ನಂತರವೇ ನಿಖರವಾದ ಕಾರಣವನ್ನು ನಿರ್ಧರಿಸಲಾಗುವುದು. ಈ ಅಪಘಾತವನ್ನು ಫ್ರಾನ್ಸ್ನ ಇತ್ತೀಚಿನ ಅತ್ಯಂತ ಗಂಭೀರ ವಾಯು ಅಪಘಾತಗಳಲ್ಲಿ ಒಂದು ಎಂದು ಪರಿಗಣಿಸಲಾಗಿದೆ.
ಅರಾಮ್ಕೊಗೆ ಸೇರಿದ ಹೆಲಿಕಾಪ್ಟರ್ ಪತನಗೊಂಡು 14 ಮಂದಿ ಸಾವು
ಸೌದಿ ಅರೇಬಿಯಾದ ಅತಿದೊಡ್ಡ ತೈಲ ಕಂಪನಿ ಅರಾಮ್ಕೊಗೆ ಸೇರಿದ ಹೆಲಿಕಾಪ್ಟರ್ ದೇಶದ ರಾಸ್ ತನುರಾ ಪ್ರದೇಶದಲ್ಲಿ ಪತನಗೊಂಡು 14 ಜನರು ಸಾವನ್ನಪ್ಪಿದ್ದಾರೆ ಎಂದು ಸೌದಿ ಅರೇಬಿಯಾದ ಸರ್ಕಾರಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಹೆಲಿಕಾಪ್ಟರ್ ಅಪಘಾತದ ಕಾರಣ ಇನ್ನೂ ತಿಳಿದಿಲ್ಲ, ಮತ್ತು ತನಿಖೆ ನಡೆಯುತ್ತಿದೆ. ಸೌದಿ ಅರಾಮ್ಕೊ ನಿರ್ವಹಿಸುವ ಪಶ್ಚಿಮ ಏಷ್ಯಾ ಪ್ರದೇಶದ ಅತಿದೊಡ್ಡ ಸಂಸ್ಕರಣಾಗಾರಕ್ಕೆ ರಾಸ್ ತನುರಾ ನೆಲೆಯಾಗಿದೆ. ಸೌದಿ ಪ್ರೆಸ್ ಏಜೆನ್ಸಿಯ ವರದಿಯ ಪ್ರಕಾರ, ಅಪಘಾತದಲ್ಲಿ ಸಾವನ್ನಪ್ಪಿದವರೆಲ್ಲರೂ ಸೌದಿ ನಾಗರಿಕರು ಎಂದು ತಿಳಿದುಬಂದಿದೆ.
