ವಾಷಿಂಗ್ಟನ್: ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಮತ್ತೆ ಸಾಮಾಜಿಕ ಜಾಲತಾಣಗಳಲ್ಲಿ ವಿವಾದದ ಕೇಂದ್ರಬಿಂದುವಾಗಿದ್ದಾರೆ. ಈ ಬಾರಿ ಕಾರಣವಾಗಿರುವುದು ಅವರು ಹಂಚಿಕೊಂಡಿರುವ ಎಐ (ಕೃತಕ ಬುದ್ಧಿಮತ್ತೆ) ಸೃಷ್ಟಿತ ಒಂದು ವಿಚಿತ್ರ ಫೋಟೋ.
ತಮ್ಮದೇ ಸಾಮಾಜಿಕ ಜಾಲತಾಣವಾದ Truth Social ನಲ್ಲಿ ಪೋಸ್ಟ್ ಮಾಡಿರುವ ಈ ಚಿತ್ರವು ಇದೀಗ ಭಾರೀ ಚರ್ಚೆಗೆ ಗ್ರಾಸವಾಗಿದೆ.
ಈ ಫೋಟೋದಲ್ಲಿ ಡೊನಾಲ್ಡ್ ಟ್ರಂಪ್ ಅವರು ಶರ್ಟ್ ಧರಿಸದೆ (shirtless), ಚಿನ್ನದ ಬಣ್ಣದಲ್ಲಿರುವ ಗಾಳಿ ತುಂಬಿದ ಸೋಫಾದ ಮೇಲೆ ಕುಳಿತು ಲಿಂಕನ್ ಮೆಮೋರಿಯಲ್ ರಿಫ್ಲೆಕ್ಟಿಂಗ್ ಪೂಲ್ನಲ್ಲಿ ತೇಲುತ್ತಿರುವಂತೆ ತೋರಿಸಲಾಗಿದೆ.
ಇದೇ ವೇಳೆ ಪಕ್ಕದಲ್ಲಿ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್, ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೋ ಮತ್ತು ಆಂತರಿಕ ಕಾರ್ಯದರ್ಶಿ ಡೌಗ್ ಬರ್ಗಮ್ ಅವರೂ ಕೂಡ ಶರ್ಟ್ ಧರಿಸದೆ ನೀರಿನಲ್ಲಿ ಆನಂದಿಸುತ್ತಿರುವಂತೆ ಬಿಂಬಿಸಲಾಗಿದೆ. ಅಲ್ಲದೆ, ಚಿತ್ರದಲ್ಲಿ ಗುರುತಿಸಲಾಗದ ಮಹಿಳೆಯೊಬ್ಬರು ಬಿಕಿನಿ ಧರಿಸಿ ಅವರ ಹತ್ತಿರ ಈಜುತ್ತಿರುವಂತೆ ತೋರಿಸಲಾಗಿದ್ದು, ಇದು ಇನ್ನಷ್ಟು ವಿವಾದಾತ್ಮಕವಾಗಿಸಿದೆ.
ಈ ಫೋಟೋ ನಿಜವಾದದ್ದು ಅಲ್ಲ, ಸಂಪೂರ್ಣ ಎಐ ತಂತ್ರಜ್ಞಾನ ಬಳಸಿ ರಚಿಸಲ್ಪಟ್ಟದ್ದು ಎಂಬುದು ಸ್ಪಷ್ಟವಾಗಿದೆ. ಆದರೂ, ಸಾರ್ವಜನಿಕ ವೇದಿಕೆಯಲ್ಲಿ ಇಂತಹ ಚಿತ್ರವನ್ನು ಹಂಚಿಕೊಂಡಿರುವುದೇ ದೊಡ್ಡ ಪ್ರಶ್ನೆಗಳನ್ನು ಎಬ್ಬಿಸಿದೆ. ಇಂತಹ ಚಿತ್ರವು ಟ್ರಂಪ್ ಅವರ ಸಾರ್ವಜನಿಕ ವ್ಯಕ್ತಿತ್ವ ಮತ್ತು ಗೌರವಕ್ಕೆ ಧಕ್ಕೆ ಉಂಟುಮಾಡಬಹುದು ಎಂಬ ಮಾತುಗಳು ಕೇಳಿ ಬರುತ್ತಿವೆ.
ಈ ಫೋಟೋ ವೈರಲ್ ಆದ ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಟೀಕೆಗಳು ವ್ಯಕ್ತವಾಗುತ್ತಿವೆ. ಅನೇಕರು ಟ್ರಂಪ್ ವಿರುದ್ಧ ಕಿಡಿಕಾರುತ್ತಿದ್ದು, ರಾಜಕೀಯ ನಾಯಕರು ಇಂತಹ ವಿಷಯಗಳನ್ನು ಹಂಚಿಕೊಳ್ಳುವುದು ಸೂಕ್ತವಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಎಐ ತಂತ್ರಜ್ಞಾನವನ್ನು ಬಳಸಿಕೊಂಡು ನಿಜವಾಗಿರದ ಚಿತ್ರಗಳನ್ನು ಸೃಷ್ಟಿಸಿ ಹಂಚುವುದರಿಂದ ಭವಿಷ್ಯದಲ್ಲಿ ತಪ್ಪು ಮಾಹಿತಿ ಹರಡುವ ಅಪಾಯ ಹೆಚ್ಚುತ್ತದೆ ಎಂಬ ಆತಂಕವೂ ವ್ಯಕ್ತವಾಗಿದೆ.
ಇನ್ನೊಂದೆಡೆ, ಕೆಲವರು ಈ ಪೋಸ್ಟ್ ಅನ್ನು ಕೇವಲ ಹಾಸ್ಯಾತ್ಮಕವಾಗಿ ನೋಡುತ್ತಿದ್ದರೆ, ಟ್ರಂಪ್ ಅವರ ವಿಶಿಷ್ಟ ಮತ್ತು ಕೆಲವೊಮ್ಮೆ ವಿವಾದಾತ್ಮಕ ಶೈಲಿಯ ಭಾಗವೆಂದು ಕೆಲ ಬೆಂಬಲಿಗರು ಇದನ್ನು ಸಮರ್ಥಿಸುತ್ತಿದ್ದಾರೆ. ಆದರೆ, ಸಾರ್ವಜನಿಕ ಜೀವನದಲ್ಲಿ ಇರುವ ವ್ಯಕ್ತಿಯೊಬ್ಬರು ಹಂಚುವ ವಿಷಯಗಳಿಗೆ ಒಂದು ಮಿತಿಯಿರಬೇಕು ಎಂಬ ವಾದವೂ ಜೋರಾಗಿದೆ.
ಈ ಘಟನೆ ಮತ್ತೆ ಎಐ ಬಳಕೆಯ ನೈತಿಕತೆ, ಅದರ ನಿಯಂತ್ರಣ ಮತ್ತು ಸಾರ್ವಜನಿಕ ಜೀವನದಲ್ಲಿ ಅದರ ಪರಿಣಾಮಗಳ ಬಗ್ಗೆ ದೊಡ್ಡ ಮಟ್ಟದ ಚರ್ಚೆಯನ್ನು ಆರಂಭಿಸಿದೆ.
ತಂತ್ರಜ್ಞಾನವು ವೇಗವಾಗಿ ಬೆಳೆಯುತ್ತಿರುವ ಈ ಕಾಲದಲ್ಲಿ, ಅದರ ದುರುಪಯೋಗವನ್ನು ಹೇಗೆ ತಡೆಯಬೇಕು ಮತ್ತು ನಿಜ-ಸುಳ್ಳುಗಳನ್ನು ಹೇಗೆ ಗುರುತಿಸಬೇಕು ಎಂಬ ಪ್ರಶ್ನೆಗಳು ಮೂಡತೊಡಗಿವೆ.
Advertisement
