ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಇಟಲಿ ರಾಜಧಾನಿ ರೋಮ್ ನಲ್ಲಿದ್ದಾರೆ. ಅಲ್ಲಿ ಅವರು ಇಟಲಿ ಪ್ರಧಾನ ಮಂತ್ರಿ ಜಾರ್ಜಿಯಾ ಮೆಲೋನಿ ಅವರನ್ನು ಭೇಟಿ ಮಾಡಿ ಸಹಭೋಜನ ಸವಿದು ‘Melody’ ಚಾಕಲೇಟ್ ಗಳನ್ನು ತುಂಬಿದ ಪ್ಯಾಕೇಟ್ ನ್ನು ಉಡುಗೊರೆಯಾಗಿ ನೀಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.“#Melodi” ಎಂಬ ಹ್ಯಾಶ್ ಟಾಗ್ ನಲ್ಲಿ ಕಮೆಂಟ್ ಗಳ ಸುರಿಮಳೆಯೇ ಹರಿಯುತ್ತಿದೆ.
ಇಟಲಿ ಪ್ರವಾಸದಲ್ಲಿರುವ ಮೋದಿ ಅವರ ಭೇಟಿಯ ವೇಳೆ ಆನ್ಲೈನ್ನಲ್ಲಿ ಹಂಚಿಕೊಳ್ಳಲಾದ ಹಗುರ ಮನರಂಜನಾತ್ಮಕ ವಿಡಿಯೋದಲ್ಲಿ, ನೀಲಿ ಬಣ್ಣದ ಬಂಧ್ಗಲಾ ಉಡುಪಿನಲ್ಲಿ ಕಾಣಿಸಿಕೊಂಡ ಮೋದಿ ಅವರು, ಬಿಳಿ ಬಣ್ಣದ ಸೂಟ್ ಧರಿಸಿದ್ದ ಮೆಲೋನಿ ಅವರಿಗೆ ಪ್ರಸಿದ್ಧ Melody ಟಾಫಿಗಳ ಚೀಲವನ್ನು ನೀಡುತ್ತಿರುವುದು ಕಾಣಿಸಿದ್ದು, ಇಬ್ಬರೂ ನಗುತ್ತಾ ಹಾಸ್ಯಮಯ ಕ್ಷಣವನ್ನು ಹಂಚಿಕೊಂಡಿದ್ದಾರೆ.
ಈ ವಿಡಿಯೋವನ್ನು X ನಲ್ಲಿ ಹಂಚಿಕೊಂಡ ಮೆಲೋನಿ, “ಉಡುಗೊರೆಗೆ ಧನ್ಯವಾದಗಳು ಮೋದಿಯವರೇ” ಎಂದು ಬರೆದಿದ್ದಾರೆ. ವಿಡಿಯೋ ಪೋಸ್ಟ್ ಆದ ಕೆಲವೇ ಸಮಯದಲ್ಲಿ ಅದು ವೈರಲ್ ಆಗಿ, ಒಂದು ಗಂಟೆಯೊಳಗೆ ಸುಮಾರು 10 ಲಕ್ಷ ವೀಕ್ಷಣೆಗಳು, 60 ಸಾವಿರಕ್ಕೂ ಹೆಚ್ಚು ಪ್ರತಿಕ್ರಿಯೆಗಳು ಹಾಗೂ ಸುಮಾರು 5 ಸಾವಿರ ಕಾಮೆಂಟ್ಗಳನ್ನು ಪಡೆದುಕೊಂಡಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಈ ಕ್ಷಣ “ಅತ್ಯಂತ ದೊಡ್ಡ #Melodi ಕ್ರಾಸ್ಓವರ್” ಎಂದು ಬಳಕೆದಾರರು ವರ್ಣಿಸಿದ್ದಾರೆ. X ಹಾಗೂ Instagramನಲ್ಲಿ ಸ್ಕ್ರೀನ್ಶಾಟ್ಗಳು, ಮೀಮ್ಸ್ ಮತ್ತು ಎಡಿಟ್ ಮಾಡಿದ ವಿಡಿಯೋಗಳು ಹರಿದಾಡಿದವು. ಅನೇಕರು ರಾಜಕೀಯ ಮೀಮ್ಸ್ಗಳ ಬಗ್ಗೆ ಮೋದಿ ಅವರಿಗೆ ಇರುವ ಅರಿವನ್ನು ಪ್ರಶಂಸಿಸಿದರು.
ಮೆಲೋಡಿ ಟ್ರೆಂಡ್
“#Melodi” ಎನ್ನುವ ಟ್ರೆಂಡ್ ಕಳೆದ ಮೂರು ವರ್ಷಗಳಿಂದ ಹೆಚ್ಚು ಗಮನ ಸೆಳೆಯುತ್ತಿದೆ. ಮೋದಿ ಮತ್ತು ಮೆಲೋನಿ ಅವರ ಹೆಸರನ್ನು ಸೇರಿಸಿ ರೂಪಿಸಲಾದ ಈ ಪದ, 2023ರ ದುಬೈನಲ್ಲಿ ನಡೆದ COP28 ಸಮ್ಮೇಳನದ ವೇಳೆ ದೊಡ್ಡ ಮಟ್ಟದಲ್ಲಿ ವೈರಲ್ ಆಯಿತು. ಆಗ ಮೆಲೋನಿ, ಮೋದಿ ಅವರೊಂದಿಗೆ ತೆಗೆದ ಸೆಲ್ಫಿಯನ್ನು “Good friends at COP28 #Melodi” ಎಂಬ ಶೀರ್ಷಿಕೆಯಿಂದ ಪೋಸ್ಟ್ ಮಾಡಿದ್ದರು. ಆ ಒಂದೇ ಪೋಸ್ಟ್ ಭಾರತ ಮತ್ತು ಇಟಲಿಯ ಬಳಕೆದಾರರ ನಡುವೆ ಭಾರಿ ಮೀಮ್ ಸಂಭ್ರಮಕ್ಕೆ ಕಾರಣವಾಯಿತು.
ಅದಾದ ಬಳಿಕ ಇಬ್ಬರು ನಾಯಕರು ಸಾರ್ವಜನಿಕವಾಗಿ ಭೇಟಿಯಾದ ಪ್ರತೀ ಕ್ಷಣವೂ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗುತ್ತಲೇ ಬಂದಿದೆ. G7 Summit ಸಭೆಗಳು, ಜಾಗತಿಕ ವೇದಿಕೆಗಳ ಪಕ್ಕದ ದ್ವಿಪಕ್ಷೀಯ ಮಾತುಕತೆಗಳು ಅಥವಾ ಕ್ಯಾಮೆರಾದಲ್ಲಿ ಸೆರೆಹಿಡಿಯಲಾದ ಅನೌಪಚಾರಿಕ ಕ್ಷಣಗಳು—ಪ್ರತಿಯೊಂದೂ “#Melodi” ಹ್ಯಾಶ್ಟ್ಯಾಗ್ ನ್ನು ಮರುಜೀವಂತಗೊಳಿಸಿವೆ.
ಭಾರತೀಯರಿಗೆ ಈ ಕ್ಷಣ ಮತ್ತೊಂದು ಹಳೆಯ ನೆನಪುಗಳ ಅನುಭವವನ್ನೂ ನೀಡಿತು. Melody ಭಾರತದ ಅತ್ಯಂತ ಪರಿಚಿತ ಚಾಕಲೇಟ್ ಬ್ರ್ಯಾಂಡ್ಗಳಲ್ಲಿ ಒಂದಾಗಿದೆ. Parle Products ತಯಾರಿಸುವ ಕ್ಯಾರಮೆಲ್-ಚಾಕೊಲೇಟ್ ಟಾಫಿ, “Melody itni chocolaty kyun hai?” ಎಂಬ ಪ್ರಸಿದ್ಧ ಜಾಹೀರಾತು ಸಾಲಿನ ಮೂಲಕ ಅಪಾರ ಜನಪ್ರಿಯತೆ ಗಳಿಸಿತ್ತು. ಈ ಸಾಲು ಇಂದಿಗೂ ಭಾರತೀಯ ಜನಸಂಸ್ಕೃತಿ ಮತ್ತು ಇಂಟರ್ನೆಟ್ ಜೋಕ್ಸ್ ನಲ್ಲಿ ವಿಶೇಷ ಸ್ಥಾನ ಹೊಂದಿದೆ.
ಈ ವೈರಲ್ #Melodi ಕ್ಷಣ, ಮೋದಿ ಅವರ ಐದು ರಾಷ್ಟ್ರಗಳ ರಾಜತಾಂತ್ರಿಕ ಪ್ರವಾಸದ ಐದನೇ ಮತ್ತು ಅಂತಿಮ ಹಂತವಾದ ರೋಮ್ ಭೇಟಿಯ ವೇಳೆ ನಡೆಯಿತು. ಇಟಲಿಯ ರಾಜಧಾನಿಗೆ ತಲುಪಿದ ಬಳಿಕ, ಪ್ರಧಾನಿ ಮೋದಿ ಅವರು ಮೆಲೋನಿ ಅವರೊಂದಿಗೆ ಭೋಜನ ಸಭೆ ನಡೆಸಿ, ನಂತರ ಐತಿಹಾಸಿಕ ಕೊಲೊಸ್ಸಿಯಮ್ ವೀಕ್ಷಿಸಿದರು. ರೋಮ್ನ ಭಾರತೀಯ ಸಮುದಾಯದಿಂದಲೂ ಅವರಿಗೆ ಆತ್ಮೀಯ ಸ್ವಾಗತ ದೊರಕಿತು.
ಸೋಷಿಯಲ್ ಮೀಡಿಯಾಗಳಲ್ಲಿ ಸಂಭ್ರಮದ ಹಿಂದೆ, ಈ ಭೇಟಿ ಮಹತ್ವದ ರಾಜತಾಂತ್ರಿಕ ಅರ್ಥವನ್ನೂ ಹೊಂದಿದೆ. ಇಬ್ಬರು ನಾಯಕರು ವ್ಯಾಪಾರ, ರಕ್ಷಣಾ ಸಹಕಾರ, ಸಮುದ್ರ ಭದ್ರತೆ, ಸಂಪರ್ಕ ವ್ಯವಸ್ಥೆ ಹಾಗೂ ತಂತ್ರಾತ್ಮಕ ಕ್ಷೇತ್ರಗಳಲ್ಲಿ ಭಾರತ-ಇಟಲಿ ಸಹಕಾರವನ್ನು ಮತ್ತಷ್ಟು ಗಟ್ಟಿಗೊಳಿಸುವ ಬಗ್ಗೆ ಚರ್ಚಿಸುವ ನಿರೀಕ್ಷೆಯಿದೆ.
Advertisement
