ನೊಯ್ಡಾದಲ್ಲಿ ನಡೆದ 'ದಾದಾ ಸಾಹೇಬ್ ಫಾಲ್ಕೆ ಚಲನಚಿತ್ರೋತ್ಸವ 2013'ರಲ್ಲಿ ಬೆಂಗಳೂರು ಸದ್ದು ಮಾಡಿದ್ದು ಸುದ್ದಿಯಾಗಲೇ ಇಲ್ಲ. ಪ್ರತಿಷ್ಠಿತ ಚಿತ್ರೋತ್ಸವದಲ್ಲಿ ನಗರದ ಹುಡುಗ ಪ್ರಶಸ್ತಿ ಗೆದ್ದಿದ್ದಾನೆ. ಮೊಬೈಲ್ ಸಾಕ್ಷ್ಯಚಿತ್ರ ವಿಭಾಗದಲ್ಲಿ ಅವಾರ್ಡ್ ಮುಡಿಗೇರಿಸಿಕೊಂಡಿರುವ ಶ್ರವಣ್ ರಿಗ್ರೆಟ್ ಅಯ್ಯರ್ ಪತ್ರಿಕೋದ್ಯಮ ವಿದ್ಯಾರ್ಥಿ!
ಇರುಳಿಗರ ಸಮುದಾಯದವರ ಜೀವನಕ್ರಮ ಆಧರಿಸಿ ಶ್ರವಣ್ ಮೊಬೈಲ್‌ನಲ್ಲಿ ಚಿತ್ರೀಕರಿಸಿರುವ 'ಇರುಳಿಗಾಸ್- ದಿ ಪೀಪಲ್ ಆಫ್ ದಿ ನೈಟ್‌' (ಐಖ್ಖಔಐಎಆಖ- ಝಿಜ ಕಿಜ್ಟಠಟಜ ್ಟಜಿ ಝಿಜ ಝ್ಝ್ಜಡಿ) ಎಂಬ ಸಾಕ್ಷ್ಯಚಿತ್ರ 'ಬೆಸ್ಟ್ ಮೊಬೈಲ್ ವೀಡಿಯೋ' ವಿಭಾಗದಲ್ಲಿ ಪ್ರಶಸ್ತಿಗೆ ಪಾತ್ರವಾಗಿದೆ. ಜರ್ಮನಿ, ಫ್ರಾನ್ಸ್, ಸ್ಪೇನ್ ಸೇರಿದಂತೆ ವಿಶ್ವದ ನಾನಾ ಭಾಗದಿಂದ ಸುಮಾರು 100 ಸಾಕ್ಷ್ಯಚಿತ್ರಗಳು ಈ ವಿಭಾಗದಲ್ಲಿ ನಾಮಕರಣಗೊಂಡಿದ್ದವು. ಭಾರತೀಯ ಫಿಲ್ಮ್ ಒಕ್ಕೂಟದ ಉಪಾಧ್ಯಕ್ಷ ವಿನೋದ್ ಕೆ. ಲಾಂಬಾ, ಚಿತ್ರ ನಿರ್ಮಾಪಕ ಮತ್ತು ಪತ್ರಕರ್ತ ಸೈಯದ್ ಮೊಹಮ್ಮದ್ ನವಾಜ್, ಶಿಕ್ಷಣತಜ್ಞ ಹಾಗೂ ಚಿತ್ರ ನಿರ್ಮಾಪಕ ಸಿ.ಜಿ. ಜೈನ್‌ರನ್ನು ಒಳಗೊಂಡ ತೀರ್ಪುಗಾರ ಮಂಡಳಿ ಶ್ರವಣ್‌ರ ಸಾಕ್ಷ್ಯಚಿತ್ರವನ್ನು ಶ್ರೇಷ್ಠ ಎಂದು ಘೋಷಿಸಿತು. ಆರು ನಿಮಿಷ ಅವಧಿಯ ಸಾಕ್ಷ್ಯಚಿತ್ರದಲ್ಲಿ ಶ್ರವಣ್, ಇಲಿಗಳನ್ನು ಬೇಟೆಯಾಡಿ ತಿನ್ನುವ ಇರುಳಿಗ ಸಮುದಾಯ ತಮ್ಮ ಸಂಪ್ರದಾಯವನ್ನು ಆಧುನಿಕ ಸಂದರ್ಭದಲ್ಲೂ ಕಾಪಾಡಿಕೊಂಡು ಮುಂದುವರಿಸಿಕೊಂಡು ಹೋಗಲು ಪಡುತ್ತಿರುವ ಬವಣೆಯನ್ನು ಮನೋಜ್ಞವಾಗಿ ಚಿತ್ರಿಸಿದ್ದಾನೆ.
'ನನ್ನ ಸಾಕ್ಷ್ಯಚಿತ್ರದ ಮೂಲಕ ಇರುಳಿಗ ಸೇರಿದಂತೆ ಎಲ್ಲ ಬಗೆಯ ಸಮುದಾಯದವರ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಲು ಪ್ರಯತ್ನಿಸಲಿದ್ದೇನೆ' ಎನ್ನುತ್ತಾನೆ ಶ್ರವಣ್ ರಿಗ್ರೆಟ್ ಅಯ್ಯರ್ (94485 44997).
ಶ್ರವಣ್ ಇದುವರೆಗೆ ನಾನಾ ವಿಷಯವಾಗಿ ಎಂಟು ಮೊಬೈಲ್ ಸಾಕ್ಷ್ಯಚಿತ್ರಗಳನ್ನು ತಯಾರಿಸಿದ್ದಾನೆ. ಇದಕ್ಕಾಗಿ ಆತನಿಗೆ ರಾಜ್ಯ ಮತ್ತು ರಾಷ್ಟ್ರಮಟ್ಟದ ಪ್ರಶಸ್ತಿಗಳೂ ಲಭಿಸಿವೆ. ಆತನಿಗೆ ಶೃತಿ ಅಯ್ಯರ್, ವಿನಯ್ ಎಸ್. ರಿಗ್ರೆಟ್ ಅಯ್ಯರ್ ಸಾಥ್ ನೀಡಿದ್ದಾರೆ.
ಇರುಳಿಗ ಸಮುದಾಯದ ಸಂಪ್ರದಾಯ ಹಲವು ವೈಶಿಷ್ಟ್ಯಗಳಿಂದ ಕೂಡಿದೆ. ಇಂಥ ವಿಶಿಷ್ಟ ಸಂಪ್ರದಾಯದ ಬಗೆಗಿನ ವಿವರಗಳನ್ನು ಸಂಗ್ರಹಿಸಿ ಮುಂದಿನ ಪೀಳಿಗೆಯವರಿಗೆ ಹೇಳಬೇಕಾದ ಅವಶ್ಯಕತೆಯಿದೆ.
- ಶ್ರವಣ್ ರಿಗ್ರೆಟ್ ಅಯ್ಯರ್