ಕ.ಪ್ರ. ವಾರ್ತೆ, ಮಂಗಳೂರು, ಏ.2-
ಖಾಸಗಿ ರಂಗದ ಕರ್ಣಾಟಕ ಬ್ಯಾಂಕ್ 2013-14ನೇ ಆರ್ಥಿಕ ವರ್ಷದಲ್ಲಿ ರು. 78 ಸಾವಿರ ಕೋಟಿ ವಹಿವಾಟು ಗುರಿ ನಿಗದಿಪಡಿಸಿದೆ. ರು. 45,500 ಕೋಟಿ ಠೇವಣಿ ಸಂಗ್ರಹ ಮತ್ತು ರು. 32,500 ಕೋಟಿ ಸಾಲ ನೀಡಲು ಉದ್ದೇಶಿಸಿದ್ದು, ಶೇ.27 ಅಭಿವೃದ್ಧಿ ಹೆಚ್ಚಳವನ್ನು ದಾಖಲಿಸಲಿದೆ ಎಂದು ಬ್ಯಾಂಕಿನ ವ್ಯವಸ್ಥಾಪಕ ನಿರ್ದೇಶಕ ಪಿ.ಜಯರಾಮ ಭಟ್ ಹೇಳಿದ್ದಾರೆ.
ಬ್ಯಾಂಕಿನ ವಹಿವಾಟು ಕುರಿತು ದಿಕ್ಸೂಚಿ ಭಾಷಣ ಮಾಡಿದ ಅವರು, ಬ್ಯಾಂಕ್ ಕಳೆದ ಸಾಲಿನಲ್ಲಿ ಸರ್ವಾಂಗೀಣ ಪ್ರಗತಿ ಸಾಧಿಸಿದ್ದು, ರು. 61,300 ಕೋಟಿ ವಹಿವಾಟು ನಡೆಸಿದೆ. ರು. 36,050 ಕೋಟಿ ಠೇವಣಿ ಸಂಗ್ರಹಿಸಿದ್ದು, ರು. 25,250 ಕೋಟಿ ಮುಂಗಡ ನೀಡಿ ಶೇ.21.62 ಪ್ರಗತಿ ದಾಖಲಿಸಿದೆ.
ಬ್ಯಾಂಕಿಂಗ್ ಕ್ಷೇತ್ರ ಹಣಕಾಸು ಸವಾಲುಗಳನ್ನು ನಿಭಾಯಿಸುತ್ತಿದೆ. ಆರ್ಥಿಕತೆಯಲ್ಲಿ ಚೇತರಿಸಿರುವುದರಿಂದ ಠೇವಣಾತಿ, ಮುಂಗಡ ಹಾಗೂ ವಸೂಲಾತಿ, ಎನ್‌ಪಿಎನಲ್ಲಿ ಸಾಧನೆ ದಾಖಲಿಸಲು ಸಾಧ್ಯವಾಗಿದೆ. ಬ್ಯಾಂಕಿನ ಸೇವಾ ಕೇಂದ್ರಗಳನ್ನು 1,200ಕ್ಕೆ ಹೆಚ್ಚಳ ಮಾಡಿದ್ದು, 600 ಶಾಖೆ, 600 ಎಟಿಎಂ ಸ್ಥಾಪಿಸಲಾಗಿದೆ ಎಂದರು.
ಜೈರಾಮ್ ಹಂದೆ, ಉಪೇಂದ್ರ ಪ್ರಭು, ಎಂ.ವಿ.ಸಿ.ಎಸ್.ಕಾಮತ್, ಮಹಾಬಲೇಶ್ವರ ಭಟ್, ಡಾ.ಮೀರಾ ಅರ್ಹಾನಾ ಹಾಜರಿದ್ದರು.