ನವದೆಹಲಿ: ಸ್ವೇಚ್ಛೆ ಹಾಗೂ ಅಗೌರವ ಪ್ರಗತಿಗೆ ಹೇಗೆ ಮಾರಕವೋ ಅದೇ ರೀತಿ ಅತಿಯಾದ ರಾಜಕೀಯ ದೃಷ್ಟಿಕೋನದಿಂದ ಎಲ್ಲವನ್ನೂ ಸರಿಪಡಿಸುವ ಯತ್ನವೂ ಮಾರಕ ಎಂದು ರಿಸರ್ವ್ ಬ್ಯಾಂಕ್ ಗವರ್ನರ್ ರಘುರಾಮ್ ರಾಜನ್ ಹೇಳಿದ್ದಾರೆ.

ದೆಹಲಿಯ ಇಂಡಿಯನ್ ಇನ್ ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ 46ನೇ ಘಟಿಕೋತ್ಸವದ ಸಂದರ್ಭದ ಸಹಿಷ್ಣುತೆ ಹಾಗೂ ಗೌರವಯುತ ಚರ್ಚೆ ಕುರಿತು ಮಾತನಾಡಿದ ರಾಜನ್, ಪ್ರತಿಯೊಂದಕ್ಕೂ ನಿಷೇಧ ಸೂಕ್ತ ಪರಿಹಾರ ಅಲ್ಲ. ಸಹನೆ ಮತ್ತು ಪರಸ್ಪರ ಗೌರವದಿಂದ ವಿಚಾರ ವಿನಿಮಯಕ್ಕೆ ಸೂಕ್ತ ವಾತಾವರಣ ಸೃಷ್ಟಿಸಬೇಕು ಎಂದು ಹೇಳಿದ್ದಾರೆ.

ಇದೇ ವೇಳೆ ಎಲ್ಲಾ ಸಂಪ್ರದಾಯ, ಕಟ್ಟುಪಾಡುಗಳನ್ನು ಪ್ರಶ್ನಿಸಲು ವಿದ್ಯಾರ್ಥಿಗಳಿಗೆ ಕರೆ ನೀಡಿದ ರಾಜನ್, ಪರಸ್ಪರ ಗೌರವ ಹಾಗೂ ಸಹಿಷ್ಣುತೆಯ ವಾತಾವರಣದಲ್ಲಿ ಮುಕ್ತ ಚರ್ಚೆಯ ಅವಕಾಶಕ್ಕಾಗಿ ಹೋರಾಡಿ ಎಂದರು. ಅಲ್ಲದೆ ಆರ್ಥಿಕ ಪ್ರಗತಿ ಸಾಧಿಸುವ ನಿಟ್ಟಿನಲ್ಲಿ ಚರ್ಚೆ ಮತ್ತು ಮುಕ್ತ ತನಿಖೆ ನಿರ್ಣಾಯಕ ಪಾತ್ರವಹಿಸುವುದು ಎಂದರು.