ನವದೆಹಲಿ : ಜಪಾನಿನ ಬಹುರಾಷ್ಟ್ರೀಯ ದೂರಸಂಪರ್ಕ ಮತ್ತು ಅಂತರ್ಜಾಲ ಸಂಸ್ಥೆ ಸಾಫ್ಟ್‌ಬ್ಯಾಂಕ್‌ ಗ್ರೂಪ್‌ ಕಾರ್ಪ್‌ ಅಧ್ಯಕ್ಷ ಮತ್ತು ಸಿಒಒ ಹುದ್ದೆಗೆ ಭಾರತ ಮೂಲದ ನಿಕೇಶ್‌ ಅರೋರಾ ಅವರು ರಾಜೀನಾಮೆ ನೀಡಿದ್ದಾರೆ.

ನಿಕೇಶ್ ನೀಡಿರುವ ರಾಜೀನಾಮೆ ಇಂದಿನಿಂದಲೇ ಜಾರಿಗೆ ಬರಲಿದ್ದು, ಅರೋರಾ ಅವರು ಸಂಸ್ಥೆಯ ಸಲಹೆಗಾರರಾಗಿ ಒಂದು ವರ್ಷದವರೆಗೆ ಮುಂದುವರೆಯಲಿದ್ದಾರೆ. ಸಾಫ್ಟ್‌ಬ್ಯಾಂಕ್‌ ಚೇರ್ಮನ್‌ ಮತ್ತು ಸಿಇಒ ಮಸಯೋಶಿ ಸನ್‌ ಅವರ ಉತ್ತರಾಧಿಕಾರಿ ಎಂದೇ ಅರೋರಾ ಅವರನ್ನು ಪರಿಗಣಿಸಲಾಗಿತ್ತು. ಮಸಯೋಶಿ ಸನ್‌ (58) ಅವರು ತಮ್ಮ 60ನೆ ಹುಟ್ಟುಹಬ್ಬದ ಸಂದರ್ಭದಲ್ಲಿ ಅರೋರಾ ಅವರಿಗೆ ಅಧ್ಯಕ್ಷ ಹುದ್ದೆ ಹಸ್ತಾಂತರಿಸಲೂ ಉದ್ದೇಶಿಸಿದ್ದರು.

60 ವರ್ಷದ ನಂತರವೂ 5ರಿಂದ 10 ವರ್ಷಗಳವರೆಗೆ ಮಸಯೋಶಿ ಸನ್‌ ಅಧಿಕಾರದಲ್ಲಿ ಮುಂದುವರೆಯಲು ಅವರು ನಿರ್ಧರಿಸಿದ್ದರಿಂದ ಅರೋರಾ ಪದತ್ಯಾಗ ಮಾಡಲು ಮುಂದಾಗಿದ್ದಾರೆ.  ಸದ್ಯಕ್ಕೆ ಚಾಲ್ತಿಯಲ್ಲಿ ಇರುವ ಬ್ರೆಕ್ಸಿಟ್‌ (ಐರೋಪ್ಯ ಒಕ್ಕೂಟದಿಂದ ಬ್ರಿಟನ್‌ ಹೊರನಡೆಯುವುದು), ರೆಕ್ಸಿಟ್‌ ( ಎರಡನೆ ಅವಧಿಗೆ ಮುಂದುವರೆಯದಿರಲು  ಆರ್‌ಬಿಐ ಗವರ್ನರ್‌ ರಘುರಾಂ ರಾಜನ್‌ ನಿರ್ಧಾರ)  ಸಂಕ್ಷಿಪ್ತ ಶಬ್ದಗಳ ಸಾಲಿಗೆ  ಈಗ ನಿಕೇಶ್‌ ಅರೋರಾ ಅವರ ರಾಜೀನಾಮೆ ಕೂಡ (ನೆಕ್ಸಿಟ್‌) ಸೇರ್ಪಡೆಯಾಗಿದೆ.