ನವದೆಹಲಿ: ನೋಟುಗಳ ಅಮಾನ್ಯತೆ ನಂತರ ನಗದು ಠೇವಣಿ ಇರಿಸಿದ ಜನರಿಗೆ ಆನ್ ಲೈನ್ ಮೂಲಕ ಪ್ರತಿಕ್ರಿಯೆ, ಸಂದೇಹಗಳನ್ನು ನೀಡಲು ಅವಧಿಯನ್ನು ಫೆಬ್ರವರಿ 15ರವರೆಗೆ ಮುಂದೂಡಲಾಗಿದೆ ಎಂದು #Operation Clean Money ಎಂಬ ಆದಾಯ ತೆರಿಗೆ ಇಲಾಖೆಯ ಟ್ವಿಟ್ಟರ್ ನಲ್ಲಿ ತಿಳಿಸಲಾಗಿದೆ.

ಜನವರಿ 31ರಂದು ತೆರಿಗೆ ಇಲಾಖೆ ''Operation Clean Money'' ಎಂಬ ಪುಟವನ್ನು ಆರಂಭಿಸಿದ್ದು ಅದರಡಿ ನೋಟು ಅಮಾನ್ಯತೆ ನಂತರ  5 ಲಕ್ಷಕ್ಕಿಂತಲೂ ಹೆಚ್ಚು ಹಣ ಠೇವಣಿಯಿರಿಸಿದ 18 ಲಕ್ಷ ಸಂಶಯಾಸ್ಪದ ಜನರಿಗೆ ಎಸ್ಎಂಎಸ್ ಮತ್ತು ಇಮೇಲ್ ಮೂಲಕ ಉತ್ತರಿಸುವಂತೆ ತಿಳಿಸಲಾಗಿತ್ತು. ಇ-ಮೇಲ್ ಅಥವಾ ಎಸ್ಎಂಎಸ್ ಸಿಕ್ಕಿದ 10 ದಿನಗಳೊಳಗೆ ಐಟಿ ಇಲಾಖೆ ಪೋರ್ಟಲ್ ನಲ್ಲಿ ಉತ್ತರಿಸುವಂತೆ ಸೂಚಿಸಲಾಗಿತ್ತು. 

500 ಮತ್ತು 1000ದ ಹಳೆಯ ನೋಟುಗಳನ್ನು ನವೆಂಬರ್ 8ರಂದು ಚಲಾವಣೆ ರದ್ದುಗೊಳಿಸಿದ ನಂತರ ನೋಟುಗಳಿರುವವರು ಡಿಸೆಂಬರ್ 30ರೊಳಗೆ ಬ್ಯಾಂಕಿನಲ್ಲಿ ಠೇವಣಿಯಿಡುವಂತೆ ಕೇಂದ್ರ ಸರ್ಕಾರ ತಿಳಿಸಿತ್ತು. ಆ ನಂತರ ಹೆಚ್ಚಿನ ಪ್ರಮಾಣದಲ್ಲಿ ಬ್ಯಾಂಕಿನಲ್ಲಿ ಹಣ ಠೇವಣಿಯಾದ ಬಗ್ಗೆ ಇಲಾಖೆಗೆ ಮಾಹಿತಿ ಸಿಕ್ಕಿತ್ತು. 2 ಲಕ್ಷದಿಂದ 80 ಲಕ್ಷದವರೆಗೆ ಮತ್ತು 80 ಲಕ್ಷದಿಂದ ಹೆಚ್ಚು ಹಣವನ್ನು ಠೇವಣಿಯಿರಿಸಿದ್ದನ್ನು ಪ್ರತ್ಯೇಕಗೊಳಿಸಿತ್ತು. ಠೇವಣಿಯಿಟ್ಟ ಹಣ ಮತ್ತು ಠೇವಣಿದಾರರ ಪರಿಚಯವನ್ನು ಹೊಂದಿಕೆ ಮಾಡಿ ಹೊಂದಾಣಿಕೆಯಾಗದವರಿಗೆ ಆದಾಯ ತೆರಿಗೆ ಇಲಾಖೆ, ಯಾವ ಮೂಲದಿಂದ ಹಣ ಬಂದಿದೆ ಎಂದು ತೋರಿಸುವಂತೆ ಎಸ್ಎಂಎಸ್ ಮತ್ತು ಇ-ಮೇಲ್ ಕಳುಹಿಸಿತ್ತು.