ನವದೆಹಲಿ: ಸೆಲ್ಯುಲಾರ್ ಆಪರೇಟರ್ ಗಳು ಮೊಬೈಲ್ ಸಂಖ್ಯೆಗೆ ಆಧಾರ್ ಜೋಡಿಸುವ ಪ್ರಕ್ರಿಯೆಗಾಗಿ ನೂತನ ಮಾದರಿಗಳನ್ನು ಜಾರಿಗೆ ತರಲು ಇನ್ನೂ ಕೆಲ ಸಮಯ ಕಾಲಾವಕಾಶ ಬೇಕೆಂದು ವಿಶಿಷ್ಟ ಗುರುತಿನ ಪ್ರಾಧಿಕಾರ (ಯುಐಡಿಎಐ) ಕ್ಕೆ ಮನವಿ ಸಲ್ಲಿಸಿದ್ದಾರೆ.
ಹೊಸ ನಿಯಮ ಜಾರಿಗೆ ಪ್ರಸ್ತುತ ಗಡುವು ಡಿ.1 ಎಂದು ನಿಗದಿಯಾಗಿದ್ದು ಯುಐಡಿಎಐಗೆ ಕಳುಹಿಸಲಾದ ಪತ್ರದಲ್ಲಿ, ಭಾರತದ ಸೆಲ್ಯುಲರ್ ಆಪರೇಟರ್ಸ್ ಅಸೋಸಿಯೇಷನ್ (ಸಿಒಎಐ) ಹೊಸ ವ್ಯವಸ್ಥೆಯನ್ನು ಕಾರ್ಯಗತಗೊಳಿಸಲು ಇನ್ನೂ ಹೆಚ್ಚಿನ ಕಾಲಾವಧಿ ಅಗತ್ಯವಾಗಿದೆ ಎಂದು ಹೇಳಿದೆ. "ನಾವು ಇನ್ನೂ ಸಿದ್ಧವಾಗಿಲ್ಲ. ನಾವು ಯುಐಡಿಎಐ ಮತ್ತು ದೂರಸಂಪರ್ಕ ಇಲಾಖೆಗೆ ಈ ಕುರಿತ ಮನವಿ ಸಲ್ಲಿಸಿದ್ದೇವೆ" ಎಂದು ಸಿಒಎಐ ನ ನಿರ್ದೇಶಕರಾದ ರಾಜು ಮ್ಯಾಥ್ಯೂಸ್ ಹೇಳಿದ್ದಾರೆ.
"ಹೊಸ ತಂತ್ರಜ್ಞಾನದ ಭಾಗವಾಗಿ ಎಸ್ ಎಂಎಸ್ ಆಧಾರಿತ ಒಟಿಪಿ ಅನ್ನು ಸೇರಿಸಬೇಕು, ಇದರಲ್ಲಿ ವೆಬ್-ಆಧಾರಿತ ಮತ್ತು ಐವಿಆರ್ ಎಸ್- ಆಧಾರಿತ ಪ್ರಕ್ರಿಯೆಗಳನ್ನು ಈಗಾಗಲೇ ಸೇರ್ಪಡಿಸಲಾಗಿದೆ. ಗ್ರಾಹಕರ ಗುರುತಿನ ಸ್ವರೂಪವನ್ನು ಮಾರ್ಪಡಿಸಬೇಕಾಗಿದೆ, ಪ್ರಮುಖ ಸಮಸ್ಯೆಗಳನ್ನು ಬಗೆಹರಿಸಲು ಕನಿಷ್ಟ ಒಂದು ತಿಂಗಳು ಹೆಚ್ಚಿನ ಕಾಲಾವಕಾಶ ಬೇಕಾಗುತ್ತದೆ" ರಾಜಾ ಹೇಳಿದ್ದಾರೆ.