ವಾಷಿಂಗ್ ಟನ್: ಭಾರತದ ಜಿಡಿಪಿ 2019-20 ನೇ ಸಾಲಿನಲ್ಲಿ ಶೇ.7.5 ಕ್ಕೆ ಏರಿಕೆಯಾಗುವ ನಿರೀಕ್ಷೆ ಇದೆ ಎಂದು ವಿಶ್ವಬ್ಯಾಂಕ್ ಹೇಳಿದೆ.
ದಕ್ಷಿಣ ಏಷ್ಯಾ ಬೆಳವಣಿಗೆಗೆ ಸಂಬಂಧಿಸಿದಂತೆ ವರದಿ ಪ್ರಕಟಿಸಿರುವ ವಿಶ್ವಬ್ಯಾಂಕ್, ಮುಂದುವರೆದ ಬಲಿಷ್ಠ ಬಂಡವಾಳದಿಂದ ಭಾರತದ ಜಿಡಿಪಿ 19-20 ನೇ ಸಾಲಿನಲ್ಲಿ ಜಿಡಿಪಿ ಶೇ.7.5 ರಷ್ಟಾಗಲಿದೆ ಎಂದಿದೆ.
2018-19 ನೇ ಸಾಲಿನ ಜಿಡಿಪಿ ಬೆಳವಣಿಗೆ ಶೇ.7.2 ರಷ್ಟಿರಲಿದೆ. ಮೊದಲ ತ್ರೈಮಾಸಿಕದ ಅಂಕಿ-ಅಂಶಗಳ ಪ್ರಕಾರ ಆರ್ಥಿಕ ಬೆಳವಣಿಗೆ ಉತ್ತಮವಾಗಿರಲಿದೆ. ಕೈಗಾರಿಕಾ ಬೆಳವಣಿಗೆ ಶೇ.7.9 ರಷ್ಟಿದ್ದರೆ, ಕೃಷಿ ಬೆಳವಣಿಗೆ ದೃಢವಾಗಿದ್ದು ಶೇ.4 ರಷ್ಟಿದೆ.
ಇನ್ನು ಇದೇ ವೇಳೆ 2018-19 ರ ಆರ್ಥಿಕ ವರ್ಷದ ಬಹುಪಾಲು ಹಣದುಬ್ಬರ ನಿಯಂತ್ರಣದಲ್ಲಿತ್ತು ಎಂದು ವರದಿ ಹೇಳಿದೆ. ಭಾರತದ ರಫ್ತು ಪ್ರಮಾಣವೂ ಸುಧಾರಣೆ ಕಂಡಿದ್ದು, ತೈಲ ಬೆಲೆ ಕಡಿಮೆಯಾಗಿದೆ. ಪರಿಣಾಮ ಚಾಲ್ತಿ ಖಾತೆ ಕೊರತೆ ದೇಶದ ಒಟ್ಟು ಆಂತರಿಕ ಉತ್ಪನ್ನದ ಜಿಡಿಪಿಯ ಶೇ.1.9 ರಷ್ಟಿರಲಿದೆ ಎಂದು ವಿಶ್ವಬ್ಯಾಂಕ್ ಹೇಳಿದೆ.