ಬೆಂಗಳೂರು: ಬೆಂಗಳೂರು ಮತ್ತು ಬ್ಯಾಂಕಾಕ್ ನಡುವೆ ಗುರುವಾರದಿಂದ ಜಾರಿಗೆ ಬರುವಂತೆ ಹೊಸ ದೈನಂದಿನ ನೇರ ವಿಮಾನ ಸೇವೆಯನ್ನು ಆರಂಭಿಸುತ್ತಿರುವುದಾಗಿ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಘೋಷಿಸಿದೆ.

ಬೆಂಗಳೂರು ಮತ್ತು ನೆರೆಯ ಪ್ರದೇಶಗಳ ಪ್ರಯಾಣಿಕರಿಗೆ, ವಿಶೇಷವಾಗಿ ಮುಂಬರುವ ಹಬ್ಬ ಮತ್ತು ರಜಾದಿನಗಳಲ್ಲಿ ಥೈಲ್ಯಾಂಡ್‌ಗೆ ಅನುಕೂಲಕರ, ತಡೆರಹಿತ ಪ್ರಯಾಣ ಒದಗಿಸುವ ಗುರಿಯನ್ನು ಈ ಹೊಸ ಸೇವೆ ಹೊಂದಿದೆ ಎಂದು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಇಂದು ಬಿಡುಗಡೆ ಮಾಡಿದ ಪ್ರಕಟಣೆಯಲ್ಲಿ ತಿಳಿಸಿದೆ.

"ಈ ಆರಂಭವನ್ನು ಸಂಭ್ರಮಿಸಲು, ವಿಶೇಷ ಎಕ್ಸ್‌ಪ್ರೆಸ್ ವ್ಯಾಲ್ಯೂ ದರಗಳು ಒಂದು ಸುತ್ತಿನ ಪ್ರವಾಸಕ್ಕೆ ₹16,800 ರಿಂದ ಪ್ರಾರಂಭವಾಗುತ್ತವೆ. ಬೆಂಗಳೂರು - ಬ್ಯಾಂಕಾಕ್‌ಗೆ ಒಂದು-ಮಾರ್ಗದ ದರ 9,000 ರೂ. ಮತ್ತು ಬ್ಯಾಂಕಾಕ್ - ಬೆಂಗಳೂರಿಗೆ 8,850 ರೂ. " ಎಂದು ಪ್ರಕಟಯಲ್ಲಿ ತಿಳಿಸಲಾಗಿದೆ.

ಏರ್‌ಲೈನ್‌ನ ಪ್ರಶಸ್ತಿ ವಿಜೇತ ವೆಬ್‌ಸೈಟ್, airindiaexpress.com, ಮೊಬೈಲ್ ಅಪ್ಲಿಕೇಶನ್ ಮತ್ತು ಇತರ ಪ್ರಮುಖ ಬುಕಿಂಗ್ ಚಾನೆಲ್‌ಗಳಲ್ಲಿ ಈಗ ಬುಕಿಂಗ್ ಲಭ್ಯವಿದೆ.

ಏರ್‌ಲೈನ್ಸ್ ಕಂಪನಿಯ ಪ್ರಕಾರ, ಬೆಂಗಳೂರಿನಿಂದ ಬ್ಯಾಂಕಾಕ್‌ಗೆ ಪ್ರತಿದಿನ ಬೆಳಗ್ಗೆ 11 ಗಂಟೆಗೆ(IST) ವಿಮಾನವಿದ್ದು, ಅದು ತನ್ನ ಗಮ್ಯಸ್ಥಾನವನ್ನು ಸಂಜೆ 4:45ಕ್ಕೆ (IST) ತಲುಪುತ್ತದೆ. ಬ್ಯಾಂಕಾಕ್‌ನಿಂದ ಹಿಂತಿರುಗುವ ವಿಮಾನವು ಸಂಜೆ 5.45 ಕ್ಕೆ (IST) ಮತ್ತು ಅದು ರಾತ್ರಿ 8.30 ಕ್ಕೆ (IST) ಬೆಂಗಳೂರಿನಲ್ಲಿ ಲ್ಯಾಂಡ್ ಆಗಲಿದೆ ಎಂದು ಏರ್ ಇಂಡಿಯಾ ತಿಳಿಸಿದೆ.