ಅಬುಧಾಬಿ (ಯುಎಇ): ಕ್ರಿಪ್ಟೋಕರೆನ್ಸಿ ಇತಿಹಾಸದಲ್ಲೇ ಅತ್ಯಂತ ಭೀಕರ ಹಾಗೂ ಬೃಹತ್ ಹ್ಯಾಕಿಂಗ್ ಹಗರಣವೊಂದು ಜಗತ್ತಿನ ಅತಿ ದೊಡ್ಡ ಕ್ರಿಪ್ಟೋ ಎಕ್ಸ್‌ಚೇಂಜ್ ಆದ ಬೈನಾನ್ಸ್ ಸಂಸ್ಥೆಯಲ್ಲಿ ಸಂಭವಿಸಿದೆ. ಅದರಂತೆ, ಹ್ಯಾಕರ್‌ಗಳು ಬೈನಾನ್ಸ್‌ನಿಂದ ಬರೋಬ್ಬರಿ $6.3 ಬಿಲಿಯನ್ (ಸುಮಾರು ₹53,000 ಕೋಟಿ ರೂಪಾಯಿ) ಮೌಲ್ಯದ ಡಿಜಿಟಲ್ ಆಸ್ತಿಯನ್ನು ಕದ್ದಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಹ್ಯಾಕ್ ನಡೆದಿದ್ದು ಹೇಗೆ?
ಬೈನಾನ್ಸ್ ಸಂಸ್ಥೆಯ ಪ್ರಾಥಮಿಕ ತನಿಖೆಯ ಪ್ರಕಾರ, ಈ ಭಾರಿ ಹ್ಯಾಕ್ ಕಂಪನಿಯ ಒಬ್ಬ ಡೆವ್‌ಆಪ್ಸ್ ಎಂಜಿನಿಯರ್‌ನ ವೈಯಕ್ತಿಕ ಲ್ಯಾಪ್‌ಟಾಪ್ ಹ್ಯಾಕ್ ಆದ ಕಾರಣದಿಂದ ಸಂಭವಿಸಿದೆ. ಹ್ಯಾಕರ್‌ಗಳು ಆ ಎಂಜಿನಿಯರ್‌ನ ಲ್ಯಾಪ್‌ಟಾಪ್ ಮೂಲಕ ಬೈನಾನ್ಸ್‌ನ ಸರ್ವೀಸ್ ಕಂಟೇನರ್ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದ್ದರು. ಇದರಿಂದಾಗಿ ಅವರಿಗೆ ವ್ಯಾಲೆಟ್‌ನ ಪ್ರೈವೇಟ್ ಕೀ ಕದಿಯುವ ಅಗತ್ಯವೇ ಬೀಳಲಿಲ್ಲ, ಬದಲಿಗೆ ಅಧಿಕೃತ ಕಂಪ್ಯೂಟರ್ ಮೂಲಕವೇ ಯಾವುದೇ ಅನುಮತಿಯಿಲ್ಲದೆ ದೊಡ್ಡ ಪ್ರಮಾಣದ ಕ್ರಿಪ್ಟೋ ಹಣವನ್ನು ಬೇರೆ ವ್ಯಾಲೆಟ್‌ಗಳಿಗೆ ವರ್ಗಾಯಿಸಿಕೊಂಡಿದ್ದಾರೆ.
ಹಾಗಾದ್ರೆ, ಈ ಹ್ಯಾಕ್ ಹಿಂದೆ ಯಾರಿದ್ದಾರೆ?
ಟಿಆರ್‌ಎಂ ಲ್ಯಾಬ್ಸ್ ಮತ್ತು ಚೈನಾಲಿಲಿಸಿಸ್ ನಂತಹ ಪ್ರಮುಖ ಬ್ಲಾಕ್‌ಚೈನ್ ತನಿಖಾ ಸಂಸ್ಥೆಗಳ ಪ್ರಕಾರ, ಈ ಹ್ಯಾಕ್‌ನ ಹಿಂದೆ ಉತ್ತರ ಕೊರಿಯಾ ಸರ್ಕಾರದ ಬೆಂಬಲಿತ ಟ್ರೇಡರ್‌ಟ್ರೇಟರ್ ಎಂಬ ಹ್ಯಾಕಿಂಗ್ ತಂಡವಿದೆ. ಕೇವಲ 20 ನಿಮಿಷಗಳ ಅವಧಿಯಲ್ಲಿ ಹ್ಯಾಕರ್‌ಗಳು 10 ಬೇರೆ ಬೇರೆ ಬ್ಲಾಕ್‌ಚೈನ್‌ಗಳ ಮೂಲಕ ಹಣವನ್ನು ವರ್ಗಾಯಿಸಿದ್ದಾರೆ. ಇದೇ ತಂಡವು 2025ರಲ್ಲಿ ಬೈಬಿಟ್ ಎಕ್ಸ್‌ಚೇಂಜ್‌ನಿಂದ $1.5 ಬಿಲಿಯನ್ ಕದ್ದಿತ್ತು. ಏತನ್ಮಧ್ಯೆ, ಹ್ಯಾಕ್ ಆಗಿರುವುದು ತಿಳಿಯುತ್ತಿದ್ದಂತೆ ಎಚ್ಚೆತ್ತ ಬೈನಾನ್ಸ್ ತನ್ನ ಬ್ಲಾಕ್‌ಚೈನ್ ನೆಟ್‌ವರ್ಕ್ ಮತ್ತು ಇತರೆ ಕ್ರಿಪ್ಟೋ ಸಂಸ್ಥೆಗಳಾದ ಟೆಥರ್ ಮತ್ತು ಸರ್ಕಲ್ ಸಹಾಯದೊಂದಿಗೆ ತಕ್ಷಣವೇ ಸುಮಾರು $3 ಬಿಲಿಯನ್ ಮೌಲ್ಯದ ಕದ್ದ ಕ್ರಿಪ್ಟೋ ಸ್ವತ್ತುಗಳನ್ನು ಆನ್-ಚೈನ್‌ನಲ್ಲಿ ಫ್ರೀಜ್ ಮಾಡುವಲ್ಲಿ ಯಶಸ್ವಿಯಾಗಿದೆ. ಇದರಿಂದ ಹ್ಯಾಕರ್‌ಗಳಿಗೆ ಆ ಕದ್ದ ಹಣವನ್ನು ಬಳಸಲು ಸಾಧ್ಯವಾಗುವುದಿಲ್ಲ. ಹಾಗಾಗಿ, ಮುನ್ನೆಚ್ಚರಿಕಾ ಕ್ರಮವಾಗಿ ಬೈನಾನ್ಸ್ ತನ್ನ ಪ್ಲಾಟ್‌ಫಾರ್ಮ್‌ನಲ್ಲಿ ಕ್ರಿಪ್ಟೋ ಡೆಪಾಸಿಟ್ ಹಾಗೂ ವಿತ್‌ಡ್ರಾ ಪ್ರಕ್ರಿಯೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ.
ಗ್ರಾಹಕರ ಹಣ ಸುರಕ್ಷಿತವೇ?
ಬೈನಾನ್ಸ್ ಸಹ-ಸಂಸ್ಥಾಪಕಿ ಯಿ ಹೆ ಮತ್ತು ಅಧಿಕಾರಿಗಳು ಸ್ಪಷ್ಟಪಡಿಸಿರುವಂತೆ, ಈ ಹ್ಯಾಕ್‌ನಿಂದ ಗ್ರಾಹಕರಿಗೆ ಯಾವುದೇ ನಷ್ಟವಾಗುವುದಿಲ್ಲ. ಕಂಪನಿಯು ತನ್ನ ಬಳಿ ಇರುವ SAFU ತುರ್ತು ನಿಧಿ ಮತ್ತು ಕಂಪನಿಯ ಸ್ವಂತ ಲಾಭದ ಹಣದ ಮೂಲಕ ಗ್ರಾಹಕರ ಎಲ್ಲಾ ನಷ್ಟವನ್ನು ತಾನೇ ಭರಿಸುವುದಾಗಿ ಅಧಿಕೃತವಾಗಿ ಘೋಷಿಸಿದೆ. ಇನ್ನು, ಈ ಭೀಕರ ಹ್ಯಾಕಿಂಗ್ ಸುದ್ದಿಯಿಂದಾಗಿ ಜಾಗತಿಕ ಕ್ರಿಪ್ಟೋ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಯಾಗಿದ್ದು, ಬಿಟ್‌ಕಾಯಿನ್ ಬೆಲೆ ಶೇಕಡಾ ಕೆಲವರಷ್ಟು ಕುಸಿದು $77,000 ಮಟ್ಟಕ್ಕೆ ತಲುಪಿದೆ. ಸದ್ಯ ಬೈನಾನ್ಸ್ ಕಾನೂನು ಜಾರಿ ಸಂಸ್ಥೆಗಳೊಂದಿಗೆ ಸೇರಿ ಕದ್ದ ಹಣವನ್ನು ಮರಳಿ ಪಡೆಯಲು ತನಿಖೆ ಚುರುಕುಗೊಳಿಸಿದೆ.