ಶಂಕರ್ ನಿರ್ದೇಶನದ 2.0 ಚಿತ್ರ ನವೆಂಬರ್ 29 ರಂದು ಬಿಡುಗಡೆಯಾಗಲಿದ್ದು ಚಿತ್ರತಂಡ ಪ್ರೊಮೋಷನ್ ನಲ್ಲಿ ಕಾರ್ಯನಿರತವಾಗಿದೆ. 

ರಜನಿಕಾಂತ್, ಅಕ್ಷಯ್ ಕುಮಾರ್, ಆಮಿ ಜಾನ್ಸನ್, ಆದಿಲ್ ಹುಸೇನ್, ಸುಧಾಂಶು ಪಾಂಡೇ ತಾರಾಗಣವನ್ನು ಹೊಂದಿರುವ 2.0 ಅಕ್ಷಯ್ ಕುಮಾರ್ ನ್ನು ಕಾಲಿವುಡ್ ಗೆ ಪರಿಚಯಿಸಿರುವ ಸಿನಿಮಾ ಕೂಡಾ ಆಗಿದೆ.  ತಮಿಳು, ತೆಲುಗು, ಹಿಂದಿ ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿರುವ ಈ ಸಿನಿಮಾದ ಬಗ್ಗೆ ನಿರ್ದೇಶಕ ಶಂಕರ್ ಹಾಗೂ ಅಕ್ಷಯ್ ಕುಮಾರ್ ಪತ್ರಿಕಾಗೋಷ್ಠಿ ನಡೆಸಿದ್ದು, ಚಿತ್ರದಲ್ಲಿ  ಅರ್ನಾಲ್ಡ್ ಶ್ವಾರ್ಜಿನೆಗ್ಗರ್ ಬದಲು ಅಕ್ಷಯ್ ಕುಮಾರ್ ನಟನೆ ಮಾಡಿದ್ದೇಕೆ ಎಂಬುದಕ್ಕೆ ಕಾರಣವನ್ನು ಬಹಿರಂಗಪಡಿಸಿದ್ದಾರೆ. 

"ಅಕ್ಷಯ್ ಕುಮಾರ್ ನಿರ್ವಹಿಸಿರುವ ಪಾತ್ರದಲ್ಲಿ ನಟನೆ ಮಾಡಲು ಪ್ರಾರಂಭದಲ್ಲಿ ಅರ್ನಾಲ್ಡ್ ಶ್ವಾರ್ಜಿನೆಗ್ಗರ್ ಅವರಿಗೆ ಮನವಿ ಮಾಡಲಾಗಿತ್ತು.  ಅರ್ನಾಲ್ಡ್ ಅವರು ನಟಿಸಿದ್ದರೆ ಸಿನಿಮಾವನ್ನು ಜಾಗತಿಕ ಪ್ರೇಕ್ಷಕರೊಂದಿಗೂ ಬೆಸೆಯಬಹುದಿತ್ತು ಎಂಬ ಆಲೋಚನೆಯೂ ಇತ್ತು. ಅರ್ನಾಲ್ಡ್ ಜೊತೆ ಮಾತುಕತೆ ನಂತರ ಸಿನಿಮಾದಲ್ಲಿ ನಟಿಸಲು ಒಪ್ಪಿಗೆ ಸೂಚಿಸಿ ಕಾಲ್ ಶೀಟ್ ನ್ನೂ ನೀಡಿದ್ದರು. ಆದರೆ ನಂತರದ ದಿನಗಳಲ್ಲಿ ಭಾರತದ ಕಾಲ್ ಶೀಟ್ ಗೂ ಹಾಲಿವುಡ್ ಕಾಲ್ ಶೀಟ್ ನಲ್ಲಿ ತುಂಬಾ ವ್ಯತ್ಯಾಸವಿದ್ದ ಕಾರಣ ಎಲ್ಲವೂ ಸರಿ ಹೋಗಲಿಲ್ಲ. ಆ ನಂತರವೇ ಭಾರತೀಯ ನಟರಿಗಾಗಿ ಹುಡುಕಾಟ ನಡೆಸಲಾಯಿತು. ಈ ಸಂದರ್ಭದಲ್ಲೇ ಅಕ್ಷಯ್ ಕುಮಾರ್ ಅವರನ್ನು ಸಂಪರ್ಕಿಸಲಾಯಿತು" ಎಂದು ಶಂಕರ್ ಹೇಳಿದ್ದಾರೆ.