ಮುಂಬೈ:  ತಮ್ಮ ಮೇಲೆ ಸುಳ್ಳು ಆರೋಪ, ಅಪ ಪ್ರಚಾರ ಮಾಡಲಾಗಿದೆ ಎಂದು ಆರೋಪಿಸಿ ನಟಿ ಲುವಿಯೆನಾ ಲೋಧ್ ವಿರುದ್ಧ ಚಿತ್ರ ನಿರ್ದೇಶಕ ಮಹೇಶ್ ಭಟ್ ಹಾಗೂ ಅವರ ಸಹೋದರ್ ಮುಕೇಶ್ ಭಟ್ ಸೋಮವಾರ ಬಾಂಬೆ ಹೈಕೋರ್ಟಿನಲ್ಲಿ ಮಾನನಷ್ಟ ಮೊಕದ್ದಮೆ ದಾಖಲಿಸಿದ್ದಾರೆ.

ಲೋಧ್ ನಿಂದ ಮಾನಹಾನಿಗಾಗಿ 1 ಕೋಟಿ ರೂ. ಬಯಸಿರುವ ಭಟ್,  ಆಕೆ ಮುಂದೆ ಇಂತಹ ಸುಳ್ಳು ಆರೋಪ ಮಾಡದಂತೆ ಆದೇಶಿಸಬೇಕೆಂದು ಕೋರಿದ್ದಾರೆ.

ಈ ಅರ್ಜಿಯ ತುರ್ತು ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಕೆ ಮೆನೆನ್ ಅವರನ್ನೊಳಗೊಂಡ ಏಕ ಸದಸ್ಯ ಪೀಠ, ಪ್ರತಿಕ್ರಿಯೆ ನೀಡುವಂತೆ ಲೋಧ್ ಗೆ ತಿಳಿಸಿದ್ದು, ಮುಂದಿನ ವಿಚಾರಣೆಯನ್ನು ಮೂರು ವಾರಗಳ ಕಾಲ ಮುಂದೂಡಿದೆ.

 ಕಳೆದ ವಾರ ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ವೊಂದನ್ನು ಫೋಸ್ಟ್ ಮಾಡಿದ್ದ ಲೋಧ್, ಮಹೇಶ್ ಭಟ್ ಸೋದರಳಿಯ ಎನ್ನಲಾಗುವ ಸುಮಿತ್ ಸಬರ್ ವಾಲ್ , ಡ್ರಗ್ಸ್ ಪೂರೈಕೆ ಮತ್ತು ಸಾಗಾಟದ ವ್ಯವಹಾರ ಮಾಡುತ್ತಿದ್ದಾರೆ. ಮಹೇಶ್ ಭಟ್ ಈ ವ್ಯವಹಾರವನ್ನು ನಡೆಸುತ್ತಿದ್ದಾರೆ ಎಂದು ಆರೋಪಿಸಿದ್ದರು.