ಸಿಯೋಲ್: 'ವೂ ಇಸ್ ಗಾಡ್' ಸಿನೆಮಾದ ಚಿತ್ರೀಕರಣಕ್ಕೆ ದಕ್ಷಿಣ ಕೊರಿಯಾದ ಖ್ಯಾತ ನಿರ್ದೇಶಕ ಕಿಮ್ ಕಿ-ಡುಕ್ ಅವರಿಗೆ ಚೈನಾ ವೀಸಾ ನಿರಾಕರಿಸಿದೆ. 

ದಕ್ಷಿಣ ಕೊರಿಯಾ ಮತ್ತು ಚೈನಾ ನಡುವೆ ನಡೆಯುತ್ತಿರುವ ಭೌಗೋಳಿಕ-ರಾಜಕೀಯ ವಿವಾದದಲ್ಲಿ ಕಿ-ಡುಕ್ ಅವರು ಬಲಿಪಶುವಾಗಿರುವ ರೀತಿಯಲ್ಲಿ ಇದು ಕಾಣುತ್ತಿದು "ಕೇವಲ ಒಂದು ತಿಂಗಳವರೆಗೆ ಕಿಮ್ ಕಿ-ಡುಕ್ ಅವರಿಗೆ ಪ್ರವಾಸ ವೀಸಾ ಮಾತ್ರ ನೀಡಲಾಗಿದೆ. ಆದರೆ ಅವರು ಮೂರು ತಿಂಗಳುಗಳ ಕಾಲ ಚಿತ್ರೀಕರಣ ನಡೆಸುವುದಕ್ಕೆ ವೀಸಾ ಕೋರಿದ್ದರು" ಎಂದು ಸಿನೆಮಾದ ನಿರ್ಮಾಪಕ ಜೂಲಿಯಾ ಜಾಂಗ್ ಹೇಳಿರುವುದಾಗಿ ವೆರೈಟಿ.ಕಾಮ್ ವರದಿ ಮಾಡಿದೆ. 

"ಇದಕ್ಕಾಗಿ ನಮಗೆ ಇನ್ನು ಅಧಿಕೃತ ವಿವರಣೆ ಸಿಕ್ಕಿಲ್ಲ. ಈ ಸಮಯದಲ್ಲಿ ಹಲವು ಕೊರಿಯಾದ ಕಲಾವಿದರು ಚೈನಾದಲ್ಲಿ ಎದುರಿಸಬೇಕಾದ ಪರಿಸ್ಥಿತಿ ನಮಗೂ ಒದಗಿದೆ ಎಂಬ ಸಂಶಯವಿದೆ. ಈ ಪರಿಸ್ಥಿತಿ ಶೀಘ್ರದಲ್ಲೇ ಬದಲಾಗದಿದ್ದರೆ, ಕಿಮ್ ಅವರು 'ವೂ ಇಸ್ ಗಾಡ್' ಸಿನೆಮಾದಲ್ಲಿ ಕೆಲಸ ಮಾಡಲು ಸಾಧ್ಯವಿಲ್ಲ" ಎಂದು ಜಾಂಗ್ ಹೇಳಿದ್ದಾರೆ. 

ಯುದ್ಧ, ಶಾಂತಿ ಮತ್ತು ಬೌದ್ಧ ಧರ್ಮದ ಬಗೆಗಿನ ಚಿತ್ರ ಇದಾಗಿದೆ. ಸದ್ಯಕ್ಕೆ ವೆನಿಸ್ ಸಿನಿಮೋತ್ಸವದಲ್ಲಿ ಪಾಲ್ಗೊಂಡಿರುವ ಕಿಮ್ ನಾನು ಕಳೆದ ವರ್ಷದಿಂದ ಅಲ್ಲಿಂದ ಇಲ್ಲಿಗೆ ಓಡಾಡುತ್ತಿದ್ದೇನೆ. ನಾನು ಅಕ್ಟೊಬರ್ ನಲ್ಲಿ ಚಿತ್ರೀಕರಣ ಪ್ರಾರಂಭಿಸಬೇಕಿತ್ತು, ಆದರೆ ಈಗ ವೀಸಾ ತೊಂದರೆ ಬಂದೊದಗಿದೆ. ನನಗೆ ಸರಿಯಾದ ಕಾರಣ ತಿಳಿದಿಲ್ಲ" ಎಂದು ಕಿಮ್ ಹೇಳಿರುವುದಾಗಿ ಮಾಧ್ಯಮವೊಂದು ವರದಿ ಮಾಡಿದೆ. 

"ಇದು ಬದಲಾಗದೆ ಹೋದರೆ ನಾನು ಕಾರ್ಯಕಾರಿ ಕಲಾತ್ಮಕ ನಿರ್ದೇಶಕನಾಗಿ ಕೆಲಸ ಮಾಡಲಿದ್ದೇನೆ ಅಂದರೆ ಚೈನಾದಲ್ಲಿ ಒಬ್ಬ ನಿರ್ದೇಶಕನನ್ನಿಟ್ಟು ಕೊರಿಯಾದಿಂದಲೇ ಅವರಿಗೆ ನಿರ್ದೇಶನ ನೀಡಬೇಕಾಗುತ್ತದೆ" ಎಂದು ಕೂಡ ಕಿಮ್ ಹೇಳಿದ್ದಾರೆ.