ಹೈದರಾಬಾದ್: ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದ ರಂಗ ಕಲಾವಿದ ಹಾಗೂ ನಟ ಜೆ.ವಿ.ರಮಣ ಮೂರ್ತಿಯವರು ಬುಧವಾರ ನಿಧನರಾಗಿದ್ದಾರೆ.

ಶಂಕರಾಭರಣಂ ಖ್ಯಾತಿಯ ಜೆ.ವಿ.ಸೋಮಯಾಜುಲು ಅವರ ಸಹೋದರನಾಗಿರುವ ಇವರು ಹಲವು ದಿನಗಳಿಂದ ಹೃದಯ ಸಂಬಂಧಿ ಸಮಸ್ಯೆಯಿಂದ ಬಳಲುತ್ತಿದ್ದರು. ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಇವರು ಚಿಕಿತ್ಸೆ ಫಲಕಾರಿಯಾಗದೆ ನಿನ್ನೆ ಕೊನೆಯುಸಿರೆಳೆದಿದ್ದಾರೆ.

ಮೇ.20, 1933ರಲ್ಲಿ ಆಂಧ್ರಪ್ರದೇಶದ ವಿಜಯನಗರಂ ಜಿಲ್ಲೆಯಲ್ಲಿ ಜನಿಸಿದ್ದ ಜೊನ್ನಾಲಗಡ್ಡ ವೆಂಕಟ ರಮಣ ಮೂರ್ತಿ(83)ಯವರು, ಬಾಲ್ಯದಿಂದಲೇ ನಟನಾರಂಗಕ್ಕೆ ಕಾಲಿಟ್ಟಿದ್ದರು. ಎನ್ ಜಿಒ, ಕಪ್ಪಾಲು, ಎವರು ದೊಂಗ ಮತ್ತು ಕೀರ್ತಿ ಶೇಷುಲುದಂತಹ ಹಲವು ನಾಟಕಗಳಲ್ಲಿ ನಟಸಿದ್ದಾರೆ. ಇದಲ್ಲದೆ, ಟಾಲಿವುಡ್ ನಲ್ಲಿ 150ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ಇವರು, ಬಟಸಾರಿ, ಮರೋ ಚರಿತ್ರ, ಗೋರಿಂಟಾಕು, ಆಕಲಿ ರಾಜ್ಯಂ, ಸಪ್ತಪದಿ, ಶುಭಲೇಖ, ಸಿರಿವೆನ್ನಿಲ, ಆನಂದ ಭೈರವಿ, ಕರ್ತವ್ಯಂ, ಶಂಕರ್ ದಾದಾ ಜಿಂದಾಬಾದ್ ಚಿತ್ರಗಳಲ್ಲಿ ನಟಿಸಿ ಖ್ಯಾತಿ ಗಳಿಸಿದ್ದಾರೆ.