ನವದೆಹಲಿ: ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ ‘ಕಬಾಲಿ’ ಹವಾ ಆರಂಭಗೊಂಡಿದೆ. ಎಲ್ಲೆಡೆ ಕಬಾಲಿ ಬಿಡುಗಡೆ ಪೂರ್ವ ಪ್ರಚಾರ ಶುರುವಾಗಿದ್ದು, ವಿಮಾನಯಾನ ಕಂಪನಿ ಏರ್​ಏಷ್ಯಾ ಈಗ ಅಧಿಕೃತ ಪ್ರಚಾರ ಪಾಲುದಾರರಾಗಿ ಚಿತ್ರ ತಂಡದ ಜತೆ ಕೈಜೋಡಿಸಿದೆ.

ಕಬಾಲಿ ಚಿತ್ರತಂಡಕ್ಕೆ ವಿಭಿನ್ನವಾಗಿ ಶುಭಕೋರುವ ಉದ್ದೇಶದಿಂದ ಹಾಗೂ ಪ್ರಚಾರಕ್ಕಾಗಿ ಏರ್ ಏಷ್ಯಾ ‘ಕಬಾಲಿ’ ವಿಶೇಷ ವಿಮಾನವನ್ನೇ ಸಿದ್ಧಗೊಳಿಸಿದೆ. ವಿಮಾನದ ಮೇಲೆ ಕಬಾಲಿ ಪೊಸ್ಟರ್ ಗಳನ್ನು ಹಾಕಲಾಗಿದೆ.

ರಿಯಾಯಿತಿ ದರದಲ್ಲಿ ಈ ವಿಮಾನದಲ್ಲಿ ಪ್ರಯಾಣಕ್ಕೆ ಅವಕಾಶ ಕಲ್ಪಿಸಿಕೊಡುವ ಉದ್ದೇಶ ಹೊಂದಿರುವ ಏರ್​ಏಷ್ಯಾದ ಈ ವಿಶೇಷ ವಿನ್ಯಾಸದ ‘ಕಬಾಲಿ’ ವಿಮಾನ ಬೆಂಗಳೂರು, ನವದೆಹಲಿ, ಗೋವಾ, ಪುಣೆ, ಚಂಡೀಗಢ, ಜೈಪುರ, ಗುವಾಹಟಿ, ಇಂಪಾಲ್, ವಿಝಾಗ್ ಮತ್ತು ಕೊಚ್ಚಿ ನಡುವೆ ಸಂಪರ್ಕ ಸೇತುವಾಗಿ ಹಾರಾಡಲಿವೆ. ಕಂಪನಿ ಇದಕ್ಕೆಂದೇ ಒಟ್ಟು 6 ವಿಮಾನವನ್ನು ಮೀಸಲಿರಿಸಿದೆ.

ಮೊದಲ ದಿನದ ಮೊದಲ ಶೋವನ್ನು ಚೆನ್ನೈನಲ್ಲಿ ನೋಡಲಿಚ್ಚಿಸುವ ಬೆಂಗಳೂರಿನ ಅಭಿಮಾನಿಗಳಿಗಾಗಿಯೇ ವಿಶೇಷ ವಿಮಾನ ಪ್ರಯಾಣಕ್ಕೆ ಸಿದ್ಧತೆ ಮಾಡಿಕೊಳ್ಳಲಾಗಿದೆ ಎಂದು ಕಂಪನಿ ತಿಳಿಸಿದೆ. ಬೆಂಗಳೂರಿನಿಂದ ಚೆನ್ನೈ ಗೆ ವಿಶೇಷ ವಿಮಾನ ಪ್ರಯಾಣಕ್ಕೆ ಅವಕಾಶ ಕಲ್ಪಿಸಲಿದೆ.