ಬೆಂಗಳೂರು: ನಟ ಪುನೀತ್ ರಾಜಕುಮಾರ್ ತಮ್ಮ ಹುಟ್ಟುಹಬ್ಬವನ್ನು ಈ ವರ್ಷ ವಿನೂತನವಾಗಿ ಆಚರಿಸಿಕೊಳ್ಳಲಿದ್ದಾರೆ. ತಮ್ಮ ನಟನೆಯ 'ಚಕ್ರವ್ಯೂಹ' ಸಿನೆಮಾದ ಆಡಿಯೋ ಅವರ ಹುಟ್ಟುಹಬ್ಬವಾದ ಮಾರ್ಚ್ ೧೭ ರಂದೇ ಬಿಡುಗಡೆಯಾಗುತ್ತಿರುವುದು ವಿಶೇಷ. ಆಡಿಯೋ ಬಿಡುಗಡೆಯಲ್ಲಿ ಹಿರಿಯ ನಟ ಅಂಬರೀಶ್ ಕೂಡ ಭಾಗಿಯಾಗಲಿದ್ದಾರೆ.
ಅಂಬರೀಶ್ ಆಡಿಯೋ ಬಿಡುಗಡೆಯಲ್ಲಿ ಭಾಗಿಯಾಗುತ್ತಿರುವುದಕ್ಕೆ ಹರ್ಷ ವ್ಯಕ್ತಪಡಿಸಿದ ನಿರ್ಮಾಪಕ ಎನ್ ಕೆ ಲೋಹಿತ್, "'ಚಕ್ರವ್ಯೂಹ' ಚಿತ್ರದ ಮೂಲ ಶೀರ್ಷಿಕೆ ಅಂಬರೀಶ್ ಅವರದ್ದೇ ಆಗಿರುವುದರಿಂದ ಆಡಿಯೋ ಬಿಡುಗಡೆ ಅವರೇ ಸೂಕ್ತ ಎಂದೆನಿಸಿತು. ಅವರ ಚಿತ್ರ ೧೯೮೩ ರಲ್ಲಿ ಬಿಡುಗಡೆಯಾಗಿತ್ತು"ಎನ್ನುತ್ತಾರೆ.
"ಬೆಂಗಳೂರಿನಲ್ಲಿ ಆಡಿಯೋ ಬಿಡುಗಡೆ ವೈಭವಯುತವಾಗಿ ನಡೆಯಲಿದೆ. ಆ ಆಡಿಯೋ ಬಿಡುಗಡೆಯಲ್ಲಿ ಸಾರ್ವಜನಿಕರು ನಾಯಕ ನಟನ ಹುಟ್ಟು ಹಬ್ಬದ ಸಮಾರಂಭಕ್ಕೂ ಪ್ರೇಕ್ಷಕರಾಗಿರುತ್ತಾರೆ. ಆಹ್ವಾನದ ಮೂಲಕ ಕಾರ್ಯಕ್ರಮ ನಡೆಸಲಾಗುವುದು" ಎನ್ನುತ್ತಾರೆ ಲೋಹಿತ್.
ಎಸ್ ಎಸ್ ತಮನ್ ಈ ಸಿನೆಮಾಗೆ ಸಂಗೀತ ನೀಡಿದ್ದು, ಆನಂದ್ ಆಡಿಯೊದಿಂದ ಆಲ್ಬಮ್ ಹೊರಬರಲಿದೆ. ಸಿನೆಮಾ ಏಪ್ರಿಲ್ ೮ಕ್ಕೆ ಬಿಡುಗಡೆಯಾಗುವ ಸಾಧ್ಯತೆಯಿದೆ.
ಈ ಮಧ್ಯೆ 'ಚಕ್ರವ್ಯೂಹ' ಸಿನೆಮಾಗಾಗಿ ಜೂನಿಯರ್ ಎನ್ ಟಿ ಆರ್ ಹಾಡಿರುವ 'ಗೆಳೆಯಾ ಗೆಳೆಯಾ' ಹಾಡು ಕನ್ನಡ ಮತ್ತು ತೆಲುಗು ಪ್ರೇಕ್ಷಕರ ನಡುವೆ ವೈರಲ್ ಆಗಿದೆಯಂತೆ. ಈ ಹಾಡು ಸಾಮಾಜಿಕ ಜಾಲತಾಣದಲ್ಲಿ ಬಿಡುಗಡೆಯಾದ ೨೦ ಘಂಟೆಗಳಲ್ಲಿ ವೈರಲ್ ಆಗಿ ೧ ಲಕ್ಷಕ್ಕೂ ಹೆಚ್ಚು ಜನ ವೀಕ್ಷಿಸಿದ್ದಾರಂತೆ.