ನವದೆಹಲಿ: ಬಾಲಿವುಡ್ ಬೆಡಗಿ ದೀಪಿಕಾ ಪಡುಕೋಣೆ ತನ್ನ ಆಪ್ತ ಸ್ನೇಹಿತೆಯ ಮದುವೆ ಕಾರ್ಯಕ್ರಮದಲ್ಲಿ ಭಾಗವಹಿಸಲು ನಿನ್ನೆ ಶ್ರೀಲಂಕಾಕ್ಕೆ ಹಾರಿದ್ದಳು. ಅಲ್ಲಿ ಆಕೆಯ ಬಾಯ್ ಫ್ರೆಂಡ್ ರಣವೀರ್ ಸಿಂಗ್ ಆಕೆಗೆ ಸಾಥ್ ನೀಡಿದ್ದಾನೆ.

ತನ್ನ ಮೊದಲ ಹಾಲಿವುಡ್ ಚಿತ್ರ ಎಕ್ಸೆಕ್ಸ್: ದ ರಿಟರ್ನ್ ಆಫ್ ಕ್ಸೇಂಡರ್ ಕೇಜ್ ನ ಶೂಟಿಂಗ್ ಗೋಸ್ಕರ ಕೆನಡಾದಲ್ಲಿರುವ ದೀಪಿಕಾ ಸ್ನೇಹಿತೆಯ ಮದುವೆಗಾಗಿಯೇ ಶ್ರೀಲಂಕಾಕ್ಕೆ ತನ್ನ ತಾಯಿಯೊಂದಿಗೆ ಹೋಗಿದ್ದಳು. ಅಲ್ಲಿಗೆ ರಣವೀರ್ ಕೂಡ ಹೋಗಿದ್ದಾನೆ. ಮದುವೆ ಕಾರ್ಯಕ್ರಮದ ವೇಳೆ ದೀಪಿಕಾ ಮತ್ತವಳ ತಾಯಿ ರಣವೀರ್ ಜೊತೆಗಿರುವ ಫೋಟೋವನ್ನು ಆಕೆಯ ಸ್ನೇಹಿತರೊಬ್ಬರು ತೆಗೆದು ಟ್ವಿಟ್ಟರ್ ನಲ್ಲಿ ಹಾಕಿದ್ದಾರೆ.

ದೀಪಿಕಾ ಎಲ್ಲೇ ವಿದೇಶಕ್ಕೆ ಹೋದರೂ ಅಲ್ಲಿಗೆ ರಣವೀರ್ ಕೂಡ ಇತ್ತೀಚೆಗೆ ಹೋಗುತ್ತಿದ್ದಾನೆ. ಕಳೆದ ತಿಂಗಳು ಫೆಬ್ರವರಿಯಲ್ಲಿ ವ್ಯಾಲೆಂಟೈನ್ಸ್ ಡೇ ದಿನ ಟೊರೊಂಟೋದಲ್ಲಿ ಶೂಟಿಂಗ್ ನಲ್ಲಿ ದೀಪಿಕಾ ಇದ್ದ ಸೆಟ್ ಗೆ ಭೇಟಿ ನೀಡಿ ತನ್ನ ಪ್ರೇಯಸಿಗೆ ಸರ್ ಪ್ರೈಸ್ ನೀಡಿದ್ದ. ಇನ್ನು ಇತ್ತೀಚೆಗೆ ನಡೆದ ಪ್ರಶಸ್ತಿ ಪ್ರದಾನ ಸಮಾರಂಭವೊಂದರಲ್ಲಿ ರಣವೀರ್, ದೀಪಿಕಾಳನ್ನು ತನ್ನ ಅರ್ಧಾಂಗಿ ಎಂದು ಹೇಳಿ ಎಲ್ಲರನ್ನೂ ಆಶ್ಚರ್ಯಚಕಿತಗೊಳಿಸಿದ್ದ. ಇವೆಲ್ಲ ದೀಪಿಕಾ-ರಣವೀರ್ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ.